Rơh bôk năp leo rnăk nơm tă bah Xã Buôn Đôn, n’gor Dak Lak, hăn tât Nha Trang, n’gor Khánh Hoà rlu n’aih, nô Y Trang Niê nkoch nau geh saơ dak lêng, hăn pâl tâm nkuăl ƀon têh dak lêng ndrel sa ăp ntil tă bah dak lêng. Nô nkoch:

            ‘Phung hên jur tât ta aơ, uănh nkuăl ƀon têh dak lêng Nah Trang, tât dak lêng  Dốc Lết ŭm dak lêng, dak lêng ta aơ mô jru ôh, n’ganh dak lêng mô dăng ơm, hên hôm sa âk ndơ sa tâm dak lêng. Lam trong cao tốc Khánh Hoà-Ban Mê Thuột ƀư jêh ơm ri ƀư nau kan tăch rgâl ba lơ, tâm dâng kŏ kơt lah năch hăn pâl n’aih mra âk lơn đŏng. Yơn trong hăn rnôk aơ ri âu yôk, âk sop ngăn”.

            Ntơm bah nau ngăn bah bu năch, ăp ntŭk ƀư nau kan pâl n’aih ta Khánh Hoà ndrel Dak Lak dôl nchrăp tâm nthoi gay ndâk ăp ntil ndơ tâm lam nkuăl. Wa Nguyễn Minh Trí, Công ty pâl n’aih Minh Trí Travel, n’gor Dak Lak mbơh:

            ‘Ntơm bah trong aơ ri mra geh tay âk ntŭk tât, trong ri geh nkre dak lêng, nkre bri yôk, nkre nau ơm yau, ndơ ngêt sa. Mra dơi nthoi Dak Lak ndrel Khánh Hoà jêng du du nau kan nsum tâm ban ueh. Tâm 3 nar, jêh rnôk năch tât Khánh Hoà ŭm dak lêng, mra veh tâm dak lêng mpeh ba lơ Dak Lak uănh thác Nghênh Phong, hăn mpeh ba dâng Dak Lak mra geh nau uănh âk nau ơm yau, dak me, bri yôk, nglau, leng”.

            Ntơm bah nau ngăn nê, âk ntŭk ƀư nau kan tăch rgâl tâm n’gor dôl ntơm ndâk ăp nau kan ƀư nsum, pơk hvi ntŭk uănh pâl bah bu năch rgâl ma dŏng êng ăp nkuăl nơm tât êng. Nau kan 2 n’gor geh rgum jêng tă bah 4 n’gor bah năp nơh hŏ njêng du “rup pâl n’aih” âk ntil, rgum sial, dak lêng, yôk prêh, bri ndrel ntŭk ƀư ăp nau pâl n’aih ăp rnoi. Ăp nkuăl geh nau dăng êng, rnôk nthoi mra njêng ăp ntil ndơ pâl n’aih tâm kơl, ƀư ân nau kan bah bu năch geh tât pâl âk lơn, gŭ jŏ lơn ndrel dŏng âk lơn.  Aơ lah nau gay ma ntŭk ƀư nau kan tăch rgâl nkra ăp ntrong ‘du ntrong hăn-âk nau uănh pâl” ăp nhoat ntrơn nau pâl n’aih nkuăl tă bah nau dŏng ăp nau dơi ân jêng hun  hao nâp nâl, jru.

            Groi Giáo sư, Tiến sĩ Lê Chí Công, Kruanh khoa pâl n’aih, Ngih săm ƀŭt Đại học Nha Trang kơp dơn Tây Nguyên-Nam Trung Bộ lah ntŭk hun hun hao êng ueh, rgum bri-dak lêng-gôl yôk ndrel ăp nau ơm ueh bah ăp rnoi. Yơn lah, ntŭk nkol têh rnôk aơ lah tring hăn nthoi Khánh Hoà-Dak Lak ê tâm ban, nau kan rdeng leo năch roh âk mông, khuch tât nau ndâk ntỏng hăn ăp nkuăl. Êp nê, nau mô tŏng tât nŭih ndrel nau dăng ô̆ng nau kan khoa học-công nghệ kŏ dôl ƀư nkol nau rgâl hao bah pâl n’ah nkuăl.

            Wa Lê Chí Công ân lah, ăp nau rgâl nau kan geh Đại hội XIV bah Đảng năl nê lah “nau ơh” ân ăp nau ê dơi aơ:

            ‘Ê lor, tĭng gâp nau rgâl mhe mpeh nau tâm rgop ntŭk ntu mra pơk trong ân njêng ăp trong hăn ndrel ntŭk pâl n’aih ăp nkuăl nsum, nthoi ân tam đah ăp nkuăl yôk ndrel gôl yôk, bah nê ntoch jong mông rlu rlau, n’hao nau geh dơi dŏng ndrel n’hao n’hâm ntul rlong bah ntŭk tât. Tal bar, hun hao nŭih ƀư nau kan pâl n’aih prêh mhe, ndrel ma nau ntrŭt dăng pâl n’aih nsum mpôl ndrel njêng nau geh dơi nâp nâl ân ƀon lan tâm nkuăl”.

            Gĭt nau rƀĭng têh bah Đại hội XIV, nsum mpôl ntŭk ƀư kan tăch rgâl Khánh Hoà dol nchrăp ndâk tay nau kan, rƀŏng tât ăp ntil ndơ geh rnoh ƀư kan prêh, n’hao nau nâp nau kan ndrel tâm rgop rnoh. Kruanh rmôt kan Pâl n’aih n’gor Khánh Hoà Phạm Minh Nhựt mbơh:

            ‘Phung hên mra dŏng lĕ ăp nau ma nơm dôl geh, mhâm ƀư ri ndâk geh dơi ăp ntŭk bôk nau kan rnoh ndoh ndơ, nau kan, n’hao nau nâp kơl an. Mhâm ƀư ân năch tât n’gor Khánh Hoà âk lơn, nkô̆ nau hun hao 2 rnoh mrô tĭng nau ntrŭnh bah Đại hội XIV. Ân ndâk tay ntŭk, nau kan, ntrơn rgâl mrô, hun hao văng sa tâm di tĭng trong ndrih ndrel nâp nâl. Aơ mô di lah nau kan ma lah nau ŭch tơm ân geh ƀư”.

            Khánh Hoà lah n’gor geh nau văng sa rgum pâl n’aih hun hao ngăch tâm nkuăl Nam trung bộ-Tây Nguyên yơn nau geh dơi ê dơi ndâk tâm di, ngăn lah tă bah nau kan mô tŏng ăp ntŭk rvăt năp, nau kan têh; văng sa măng ê njêng ƀư dơi ngăn. Pâl n’aih Khánh Hoà ê geh ƀư nâp nau leo trong, kơl an dăng ân ăp nkuăl êp nê”.

            Đah nkô̆ nau vơt 18,8 rkeh tŏ năch, nau geh 77 rbăn rmen tâm năm 2026, Khánh Hoà dôl ŭch nau pâl n’aih jêng văng sa tơm, rgop nau khlay tâm rnôk hun hao bar rnoh mrô bah n’gor. Wa Nguyễn Long Biên, Groi Kruanh UBND n’gor Khánh Hoà mbơh kloh:

            ‘Phung nơm ân geh tâm nthoi, njêng ăp ntil ndơ leo 2 nau geh dơi êng êng, nơm geh dơi âk nau nkhêp yor âk ntil nau, ntŭk gay hun hao. Dăch tât ân geh rgum ân âk nau kan, nau ƀư, pơk tay âk rơh mpar, âk trong hăn mhe. Ƀư ăp bôk na kan, nau ƀư geh nau dăng, nkoch mbơh nau ƀư kan kŏ geh ân tâm di”.

            Tâm rnôk mhe, nau tâm rgop nkuăl Tây Nguyên-Nam Trung Bộ mô knŭng lah trong kan bah năp măt, ma lah trong rƀŏng kan jŏ jong. Rnôk gung trong geh doh rklaih, ntŭk kan tăch rgâl mhe geh nau mĭn, nau kan, n’gor ân nchrăp pơk trong ueh gay hun hao, pâl n’aih Khánh Hoà lah êng ndrel Nam Trung Bộ lah nsum ngăn lah ma dơi mpar hao, hun hao nâp nâl ndrel tâm rgop nar lơn têh ân văng sa nkuăl ndrel neh dak./.