Ơi kônh wa ƀon lan, ndrăng băl, tahen lam dak n’hanh ƀon lan he gŭ dak bah dih,

Năm mhe Bính Ngọ hŏ tât, tâm du rân rgâl năm ơm – năm mhe, Gâp dăn njuăl tât ƀon lan, ndrăng băl, tahen lam dak n’hanh ƀon lan he gŭ dak bah dih nău mbah rhơn năm mhe manh uĕh, n’hâm suan ngăch lăng dăng soih n’hanh rhơn răm. Gâp dăn njuăl tât ƀon lan, băl mpôl dak bah dih ăp nău mbah rhơn dŭt uĕh lăng, dăn an du năm mhe đăp mpăn, rhơn mƀak n’hanh ndrel hun hao.

Năm Ất Tỵ 2025, neh dak hăn rlău njăr trong têl nkah âk nar kan khlay, geh nkô̆ hôr mha êng n’hanh geh âk nău dơi dŭt n’hao êng săk; nkre, lah du năm mhe neh dak he rlău dŭt âk jêr jŏt, ntul rlong đŏng, đah ăp nău rgoh ngơ ngăch, krit jêr, mô gĭt năl lor bah nô nău lam ntŭr neh n’hanh nkual, ndrel ăp trôk nar krit djơh, lơh roh huach jru, an tay âk nău rngot nklâng, roh yot an ƀon lan he.

Ma han săk rôih dăng, nău mĭn nsrôih ndôr êng, lam Đảng, lam ƀon lan, lam tahen he hŏ tâm rnglăp, nsum du nuih n’hâm, ntik n’hao suan dăng lam rnoi nuĭh n’hanh nău kơl bah năl mpôl dak bah dih, he ƀư wat jêh lĕ rngôch ăp rnoh tât kan ndơ̆ luh, đah âk nău têl nkah ntoh lư: Đăp mpăn, ƀư tơm, dơn ngoăy, lam lĕ rngôch neh dak, ntŭk gŭ rêh đăp mpăn dơi mât nâp; hun hao wăng sa mpeh rmôt dâk bôk năp lam ntŭr neh, jêng dak rĭng geh âk; tŏng ăp nău rêh dơi mât uănh khlay; chính trị, rêh jêng kon nuĭh dơi đăp mpăn; njrăng n’gang neh dak, rnă njrăng dơi mât nâp n’hanh n’hao dăng; tâm boh dak bah dih, lăp rgum dak bah dih dơi ntrôl dăng, ntŭk gŭ têh, nsing nơm bah Việt Nam dơi n’hao prêh ta lam ntŭr neh; njêng jâng nsing khlay gay neh dak lăp tâm rơh hun hao mhe.

Lăp tâm năm mhe Bính Ngọ 2026 - Năm lor bôk năp ƀư Nghị quyết Đại hội XIV bah Đảng, đah nău way ơm rŏng dak, nuih n’hâm tâm rnglăp, nău mĭn rôih dăng n’hanh nău nđơr nsan hao dăng, lam Đảng, lam ƀon lan, lam tahen he hŏ tâm rnglăp tay, nsum suan du nuih n’hâm, ndăn ăp trong dơh, nău tât geh, rlău ăp jêr jŏt, ntul rlong, ntik n’hao suan dăng nuih n’hâm nsing nơm, ƀư tơm êng, nsrôih ndôr êng, nsan hao êng, n’hao êng săk rnoi nuĭh, mô rlu rgâl blău mhe, dâk kan lĕ n’hâm suan gay tĭng ƀư jêng ngăn ngăn rnoh tât rdâk njêng neh dak Việt Nam bah tâm lơh tâm su, đăp mpăn, ƀư tơm, ndrŏng dăng, hun hao mblôn uĕh, rsang rnglay, rhơn răm.

Tâm nău rhơn wơt năm mhe, du tơ̆ tay đŏng, Gâp dăn an ƀon lan, ndrăng băl, tahen lam dak n’hanh ƀon lan he gŭ dak bah dih năm mhe geh nău dơi mhe; rnoi nuĭh n’hanh ƀon lan he nar lơn ma têh ndrŏng, geh nău rêh hơm răm, dah rŏng, rhơn răm.

Dăn lĕ jêh n’hanh geh nău dơi!