Lơ ăp nar êp Tết, nău ngăch pah kan ta ăp ndrâm ka ta mpeh bah lơ Dak Lak lơ âk. Hang rhiăng tàu ka hăn dak lêng ta Trường Sa, hang rhiăng tàu êng lĕ plơ̆ sĭt, tâm rwa bêng âk tui kan geh rnoh khlay âk. Ăp nuĭh rhơn yor dơi wơt năm mhe đah ndơ bah dak lêng an. Wa Bùi Văn Xông, phường Phú Yên, n’gor Dak Lak răm rhơn an gĭt:

Năm aơ bôk năm nu nău joi ka dơh an kônh wa, saơ rhơn đŏng, mhe lăp ma du bôk 70-80 mlâm ka ri lah uĕh trôk neh hôm. Rnoh geh ndơ ri uĕh hôm. Rnoh khlay ka ri đăp mpăn đŏng.

Nuĭh ƀon lan joi ka Phạm Đắc Dũng, khu phố 4, phường Phú Yên rhơn:

Năm aơ mih lăng prăk uĕh, sial mô dăng, ka mô du. Gâp hăn rlău 20 nar dơi geh 2 tấn rlău, tâm pă du hê nklăp 15-16 rkeh prăk. Oh nô ƀư sa săk geh, geh prăk âk.

Nglăp nsum, ăp n’gor Tây Nguyên, kơt Dak Lak, Gia Lai, Lâm Đồng geh dak lêng da dê. Dak Lak mô knŭng lah ndơ bri dak an, tui ka ma hôm lah mpông luh tăch n’gluh an ndơ geh tuch ka têh âk ta mpeh bri krŏng yôk têh, đah cà phê, tiêu, sầu riêng, biăp-nkao geh âk da dê rnoh lam dak. Tĭng wa K’Bril-Kruanh thôn Kambute, xă Đơn Dương, n’gor Lâm Đồng Tầm, rup ndah bah lŏ mir-si-tui ka Tây Nguyên mô knŭng kơp đah rnoh neh, ma hôm kơp đah săk rnglăy bah lŏ mir thông minh.

 Aƀaơ kônh wa lĕ kơt dŏng măy kay têh, ntuh kơl trong tŏ dak mhe, kỹ thuật tăm nar lơ hao prêh... Thôn Kambute âk bah năp đaơ lah jay cấp 4, aƀaơ lah jay 2 dăp, 3 dăp, rnoh rnăk ncho ô tô dŭt âk.

Lôch năm 2025, êng rnoh khlay ndơ lŏ mir-si glê-tui ka bah Tây Nguyên-Nam Trung bộ lĕ geh 140.000 rmen prăk tĭng rnoh tâm rgâl. Trong têh hăn ngăch Khánh Hòa-Buôn Ma Thuột lĕ sa nkra âk gưl; trong têh hăn ngăch Pleiku Quy Nhơn lĕ ntơm ƀư, kơl rnoh ndơ lŏ mir-si glê-tui ka têh bah Tây Nguyên mbrơi dơh hăn ndrâm dak lêng. Groi giáo sư Tiến sĩ Lê Đức Niêm, Groi hiệu trưởng Ngih samƀŭt Đại học Tây Nguyên an lah, Tây Nguyên aƀaơ lĕ geh dăp hao wăng sa uĕh lơn.

Tây Nguyên mô knŭng hôm lah nkual tuch tăm mô lah ŭnh nar nkra njêng, ma lĕ tâm rgop rjăp đah logistics, wăng sa dak lêng, nău rhŏ, pâl nđaih, công nghiệp nkret njêng bah Duyên dải Nam Trung bộ. Yor nău ntil nĕ jêh geh nău rmeh dŭt âk gay jêng ăp trong khlay lôch uĕh.

Ndrel đah ndoh ndơ têh âk bah nkual lŏ mir-si glê-tui ka têh n’hanh âk ntil ngăn lam dak, Tây Nguyên mhe hôm geh rlău 1000km kơh dak lêng, đah âk ndrĭch dak lêng mpeh tâm ntŭk uĕh ngăn lam ntŭr neh mbra ngăch geh du plơk mhe. Tĭng wa Lương Nguyễn Minh Triết, Bí thư N’gor ủy Dak Lak, gay ƀư tâm rgop ăp ndơ geh hun hao, ăp ndơ têh âk bah nkual, ăp n’gor dôl rgum soan an rgâl mrô n’hanh ntŭk ntô boăt nthoi Đông-Tây. Ta Dak lak, rgâl mrô lĕ jêng nău kan khlay.

Ndăn ndâk njêng trong nchrăp hun hao khoa học công nghệ lvang 2026-2030... mbơh ƀư ăp nău nkra têh bah n’gor kơt mkra samƀŭt hành chính, nău rhŏ nsum, mpeh hun hao lŏ mir, pâl nđaih thông minh, njrăng n’gang trôk nar, mât uănh njrăng n’gang bri.

Bah ăp rơh tàu rlŏ rlău Tết hăn dak lêng, ăp ndrĭch dak lêng jong choih nglang tât ăp mir cà phê têh n’hanh ndrĭch mir jay bil, jay mang thông minh, rup ndah mpeh du nkual wăng sa ngăch Nam Trung Bộ-Tây Nguyên dôl ntoh kloh. Rnôk “dak lêng nhŭp ty bri” tă bah ăp trong têh hăn ngăch n’hanh ntung trong mrô, nkual aơ mô knŭng n’hao nău rêh an nuĭh ƀon lan ma hôm nchrăp hao êng nơm jêng du trong hao jêng mhe, rgop tâm di tâm trong rƀŏng tât rach năm hao săk nơm bah rnoi nuĭh.