Nchrăp wơt Tết Nguyên Đán Bính Ngọ, ta nkual ƀon têh Hồ Chí Minh, Kruanh Quốc hội Trần Thanh Mẫn tât khâl, mbah rhơn Tết ăp Kruanh dak ơm Nguyễn Minh Triết, Trương Tấn Sang; Thủ tướng Chính phủ ơm Nguyễn Tấn Dũng; Rnâng kan Ban Bí thư ơm, Đại tướng Lê Hồng Anh.

Kruanh Quốc hội Trần Thanh Mẫn mpŏng ăp kruanh rđău kan ơm Đảng, Ngih dak mât uănh tay, tĭng groi nđôi, rgop âk nău khlay an hun hao bah neh dak, yor an đăp mpăn hơm răm, bah ƀon lan. Njuăl nău mpŏng tâm năm kan mhe, ăp kruanh rđău kan ơm Đảng, Ngih dak nsing nơm Quốc hội khóa XVI mbra ntik n’hao dăng nuih n’hâm tâm rnglăp, mbluh soih ăp tơm ndơ bah nău tă ơm gĭt kăl e gay rgâl lam lĕ rngôch. Bah nê, lah rjăp nău khlay bah nhih pah kan dơi kan dŭt têh ngih dak, tĭng ƀư geh nău dơi ăp nău dơn kan rgum tơm bah trong geh mhe hun hao neh dak.