Ndrel hăn đah Tổng Bí thư Tô Lâm geh Thủ tướng Chính phủ Phạm Minh Chính, Kruanh Quốc hội Trần Thanh Mẫn ndrel đah âk đồng chí leo kan gưl têh Đảng, Ngih dak. Việt Nam n’hanh Campuchia njêng nău tâm boh kan nchră nău đah dak bah dih lơ 24/6/1967, aƀaơ Việt Nam lah dak kan ndrel tăch rgâl dŭt têh tal 3 bâh Campuchia, lôch Trung Quốc n’hanh Mỹ. Rơh pah kan bâh Tổng Bí thư Tô Lâm lah rơh gay ma ăp nuĭh leo kan têh bâh 2 dak n’hao nău tâm mbơh kan, ndâk nsơm nău knơm mpeh chính trị, ntrôl an mbơh tơih săk rnglăy ăp nău tâm ton lĕ dơi geh, bâh nĕ ƀư ueh lơn tay nău tâm boh tâm rnglăp way ơm đah 2 Đảng, 2 dak, njêng nău kan ndơ̆ nău tâm boh Việt Nam- Campuchia hun hao tât du njoat.

Bah năp nĕ, tâm rnôk rơh khâl Lào, Tổng Bí thư Tô Lâm lĕ geh rơh tâm nchră đah Tổng Bí thư, Kruanh dak Lào Thongloun Sisoulith; rgum ôp Thủ tướng Lào Sanexay Siphandone, Kruanh Quốc hội Lào Saysomphone Phomvihane; wơt Kruanh Mặt trận Lào ndâk njêng neh dak Kikeo Khaykhamphithoune; khâl Đại sứ quán Việt Nam ta Lào n’hanh mâp nsum mpôl nuĭh Việt ta Lào... Di rơh aơ, Thủ tướng Chính phủ Phạm Minh Chính mât Thủ tướng Lào Sonexay Siphandone; Kruanh Quốc hội Trần Thanh Mẫn mâp Kruanh Quốc hội Lào Saysomphone Phomvihane; kruanh du đêt n’gâng kan, nău kan 2 dak lĕ tâm mâp tâm rgâl mbơh nău, n’hao kan ndrel đah 2 dak. Tâm rnôk khâl, lĕ ƀư jao an ăp samƀŭt kan ndrel khlay đah ăp n’gâng kan, nău kan, ƀon lan bah Lào n’hanh Việt Nam ta ăp ntil nău ntĭm nti, tư pháp n’hanh kan ndrel đah ăp ƀon lan; ƀư jêng tay pháp lý n’hanh nuih n’hâm mhe, na nê̆ tâm rgop boăt nthoi têh tay tâm boh kan ndrel đah 2 dak.