Nar ăp rnăk tâm ntŭk geh dak bŭk Hoà Thịnh ntĭnh che Táo sĭt trôk, lôch năm mhe Ất Tỵ, kŏ lah nar ma ăp nau kan bah Bôk nau “Năm mhe Quân khu 5 tâm rnglăp tâm boh tahen ƀon lan’. Tâm ntŭk nkah ơm yau neh dak Hoà Thịnh, nŭih ƀon lan, cán bộ, tahen ndrel nklâm bánh ndrel gâm bánh chưng; tâm rlong thể thao, tâm n’ur njroh mprơ. Oh kon se jê̆, bu êh geh tahen leo hăn kreh sŏk. Ăp me, ăp yuh ri rvăt ndơ tâm ntŭk bu ân dơm. Wa Phạm Văn Mạnh, nŭih ƀon lan xã Hoà Thịnh, rhơn ntoh nau:

‘Ê lor gâp lah ueh rđau kan bah Đảng, nau kơl an bah tahen. Rơh dak lip mhe rlau hŏ kơl an ndơ sa, ndơ ngêt. Ăp rmôt tahen, ăp n’gâng kan kŏ mât chăm, kŏ geh piăng sông, geh phe sa, plŏ tay duh răm, ngih vâl kŏ geh ndâk nâp nâl”.

Hoà Thịnh lah ntŭk dak lip jru ngăn tâm khay 11 năm 2025. Tâm rnôk khuch nê, ngih vâl geh dak trăm, 4 ding lah dak rkăt thăng, ăp rmôt tahen hŏ tât ta ntŭk nê, ndrel ma gưl uỷ, n’gâng kan tâm n’gor tâm dăch ma ƀon lan ntơm bah nau kơl an, rklaih nau khuch bah dak lip ân tât nau ndâk tay ngih vâl, ndâk tay nau rêh leo bâr gơm ân kônh wa jêh dak lip. Jêh “Nau ndăng Quang trung” geh nau dơi tâm xã Hoà Thịnh, uănh rup gui tahen Wa Hồ nâp rjăp tâm nuih n’hâm ƀon lan đah nau rnơm ueh ngăn. Đại tá Đinh văn Hưng, Chính uỷ N’gâng kan rđau tahen n’gor Dak Lak lah rjăp, Bôk nau kan “Năm mhe Khu 5 tâm rnglăp-Tết duh răm tâm boh tahen ƀon lan” rnôk aơ du tŏ tay đŏng ƀư rjăp nau tâm boh tahen ƀon lan lơn ma nâp nâl:

‘Bah ăp bôk nau kan nar aơ ri nơm lŏ ƀư rjăp du nau geh tơm khlay ngăn tâm nau kan neh dak lam ƀon lan, đăp măpn ƀon lan mô knŭng ma nau kan jâk, ma ăp rmôt kan nơm ê lor ân geh ƀư đah nau tâm rnglăp tâm dăch tâm nuih n’hâm tahen ndrel ƀon lan. Rnôk ma nuih n’hâm ƀon lan đăp mpăn, ƀon lan rnơm ri nê lah nau dăng nâp ngăn ân nau đăp mpăn hun hao nâl nâl bah rnoi mpôl”.

Tĭng wa Phương Văn Lành, Bí thư Đảng uỷ xã Hoà Thinj, ntơm bah phŭt dak lip tât nar geh ndâk tay nau “Ndăng Quang trung’ ân tât rnôk aơ, hoà Thịnh hôm ndơn geh âk ntơm bah drăp ndơ ndrel nuih n’hâm bah Đảng ndrel Ngih dak, ăp ntŭk kan chính trị, rêh jêng, ăp rmôt tahen, ăp ntŭk ƀư kơl an ndrel dôl rêng ngăch bah nau rngot ji rnôk trôk nar lơh. Bôk nau kan Xuân Khu 5 tâm rnglăp rnôk aơ, du tŏ tay đŏng ntop tay nau nsôih ân n’gâng kan tâm nau ƀư ân dơi ăp nau kan tâm năm 2026:

‘Ndrel ma ăp gưl uỷ, n’gâng kan, ăp rmôt ri hŏ rgum mât chăm kơl an ân kônh wa. Ngăn lah nar aơ Quân khu 5 leo năm mhe khu 5 tâm rnglăp, tâm boh tahen ƀon lan tât ma kônh wa ƀon lan xã Hoà Thịnh, aơ lah du rnôk ueh gay kơl an kônh wa, nsum ty đah kônh wa rklaih ăp nau jêr, ân kônh wa geh tay nau rnơm rhơn ndrel kơl an ân kônh wa geh du Tết ueh răm, rhơn m’ak, ueh lăng”.

Ăp nŭih ƀon lan Hoà Thịnh rhơn ngăn ma nau vay tâm lơh rjăp tâm rơh cách mạng, ƀư jêng nau ndâk lơh kơl an Hoà Thịnh tâm ăp năm 60, rnôk aơ lŏ nsôih rlet âk nau jêr jŏt trôk nar lơh. Tết aơ kônh wa nkuăl dak lip geh tết duh răm nau tâm boh bah nau nsum ty bah ƀon lan. Nau rêh mhe dôl ntoh tâm ăp ngih vâl. Du năm mhe dôl tât êp tâm lŏ ƀon lan geh ntơm ndâk Hoà Thịnh./.