Nkhêp geh rnôk Tết Nguyên đán Bính Ngọ 2026, nar 4/2, Groi kruanh Rnâng kan Hội đồng Dân tộc bah Quốc hội Hoàng Duy Chinh hŏ khâl, mbah rhơn Tết n’hanh ndơ̆ kơl nklâm ndơ an 200 rnăk ach o lah ƀon lan rnoi mpôl đê̆ xã n’har bri Ia Rvê, n’gor Dak Lak. Mpôl pah kan hŏ ndơ̆ kơl ndơ Tết an 200 rnăk ach o lah ƀon lan rnoi mpôl đê̆ bah xã Ia Rvê, rgop rgŏ jă kônh wa wơt Tết rhơn mƀak, ntop tay nău nsing nơm n’hanh suan ntrôl nsan hao tâm nău rêh.

Wa Hoàng Duy Chinh lah rjăp Đảng, Ngih dak n’hanh Quốc hội way uănh khlay pah kan rnoi mpôl đê̆, ăp tŏng geh nău rêh ta nkual n’har bri; dăn đă n’gâng kan ta ntŭk mât chăm tay nău rêh, ntik n’hao tâm rnglăp, mât ndray săk tơm văn hóa. Ndrel nar, mpôl hăn khâl, mbah rhơn Tết cán bộ, tahen Pôih n’har bro Yok M’Bre. Wa Hoàng Duy Chinh nchih nkah, rnê âk ăp nău nsrôih bah đơn vị tâm mât njrăng ƀư tơm, rnă njrăng n’har bri neh dak n’hanh râng rdâk njêng lam trong kan chính trị tâm dâng, mât chăm nău rêh ƀon lan ta ntŭk.