Ta ăp n’gor Miền Trung n’hanh Tây Nguyên, Quân khu 5 ƀư ndơ̆ jao jay rơh 2 bah "Trong kan ndăng Quang Trung”, bah nê, ƀư lôch jêh trong kan lôch rlău 1 khay an ƀư, ơm lơn 5 nar rđĭl đah nar Thủ tướng Chính phủ jao ƀư. Rơh 2 dja, Quân khu 5 ndơ̆ jao 435 mblâm jay mhe, lôch rnôk hŏ ndơ̆ jao 175 mblâm jay tâm bôk khay 1, ƀư wat jêh ngăn “Trong kan ndăng Quang Trung”, nău dơi ngăch prăl mbah rhơn Đại hội đại biểu lam dak tâl XIV bah Đảng.

Wat jêh lĕ rngôch 610 mblâm jay mhe n’hanh 314 mblâm jay nkra, Quân khu 5 mpôch dŭt tay “Trong kan ndăng Quang Trung” tâm nău rhơn bah nuĭh ƀon lan nkual dak bŭk, an tay nău têl nkah jru mpeh rup gui “Tahen Wa Hồ”. Ăp cán bộ, tahen hŏ geh măt rnôk dŭt jêr jŏt, ndrel nuĭh ƀon lan rlău trôk nar lơh, đăp mpăn nău rêh. Đah nuih n’hâm “ƀư nar mô năn, ndăn lĕ ma măgng ƀư”, “mih mô rlu, kan mô nsrŭng”, cán bộ, tahen Quân khu 5 uănh nău kơl Ƀon lan rdâk tay jay lôch dak bŭk lơh lah nău ntrŭnh đă bah play nuih. Ăp chor jay ƀư lôch jêh nar aơ mô dơn lah ndơ rdâk mon, ma hôm lah nău nsing nơm, lah nău tâm rŏng tahen – ƀon lan dơi bôr dăp tâm krit jêr.