Mbơh tơih “Nău kan Quang Trung”, Quân khu 5 lĕ geh rgum lĕ nău kan, kơl an ƀư 610 ngih jay mhe n’hanh nkra mhe 314 ngih jay khuch âk tâm lam ntŭk. Êng ta n’gor Đăk Lăk, 331 ngih jay geh mbơh ƀư mhe,  tâm nĕ geh 96 ngih jay ƀư lôch ơm n’hanh pă jao ta rơh 1 aơ. Ntoh ngơi ta rơh lễ, Trung tướng Lê Ngọc Hải- Tư lệnh Quân khu 5 an gĭt, ƀư tĭng Nău kan Quang Trung, tahen lĕ sĭt đah ƀon lan ƀư dŭt ngăch, ƀư tay ngih jay ơm ngăn, gay ma ƀon lan ngăch ơm geh ntŭk gŭ, đăp mpăn nău rêh jêng, vơt Tết tŏng ăp, ueh răm lơn. Ăp ngih jay mhe mô dơn lah ntŭk gŭ, ma hôm nha lah ntŭk n’hao nuih n’hâm, geh tay nău knơm gay ma ƀon lan rlet rlău nău jêr jŏt, ndâk nsơm tay nău rêh jêng lôch tă geh mih sial.

Ta Khánh Hòa, rơh jao jay rơh aơ geh 6 rnăk ta phường Đô Vinh, xă Phước Hậu n’hanh xă Tây Khánh Sơn. Gay ăp jay dơi jêh di nar, đăp mpăn uĕh nâp, Bộ tư lệnh Quân khu 5 lĕ ntĭm rđău Bộ chỉ huy Tahen n’gor Khánh Hòa tâm rgop rjăp đah Nkual 4 Hải quân, Lữ đoàn Đặc Công dak 5 n’hanh rmôt dân quân ta ntŭk, mkra nău trôk nar duh mih ndal, rdâk ƀư măng nar, n’ăp nar rlu. Tâm nĕ, Bộ CHQS n’gor Khánh Hòa, Nkual 4 Hải quân n’hanh lữ đoàn Đặc công dak 5 du ntŭk kan râng ndâk ƀư 2 mlâm jay. Ntoh ngơi ta nar jao an, Thiếu tướng Trần Thanh Hải, Groi Tư lệnh Quân khu 5, mĭn lah “Nău kan Quang Trung” lah an saơ nuih n’hâm tâm yô̆ tâm kơl, nău uĕh bah nuĭh Việt Nam tâm ăp rnôk jêr jŏt; an saơ kloh nău way “Ntŭk ƀon lan mâp jêr, ntŭk nĕ geh tahen”.