Rơh mih dak lip hô tâm dŭt năm rlau aơ hŏ lơh khuch ngăn ân âk n’gor, nkuăl ƀon têh miền Trung-Tây Nguyên. Jêh mih dak lip, nŭih ƀon lan ta aơ dôl ăp nhoat ndâk tay, ơm đăp mpăn nau rêh.

Mô êng kơl an ƀon lan tâm rnôk dak lip, jêh rnôk bah lip, tahen lŏ tât âk n’gor gau ma năn rklaih kơl an. Ăp nô kơl an rklaih dak băm, dak bok tâm ngih dak si, pă ndơ sa ân ƀon lan ndrel mât chăm nau ji ân ƀon lan dôl săm âk nar jêh dak lip. Nau dak si Võ Thôi, Groi giám đốc Ngih dak si Đa khoa nkuăl Quảng Nam, mbơh:

‘Rnôk geh mih dak lip ri N’gâng kan rđau kan tahen nkuăl ƀon têh Đà Nẵng jêh ri Ntŭk kan njrăng rdâng tâm nkuăl 5 hŏ đă ndrel mro lah ntŭk nthoi gay mât nâp nau geh tât. Rnôk dak rhuăt tâm ngih dai si nklăp hôm 6 cm ri N’gâng kan rđau kan tahen bah nkuăl ƀon têh Đà Nẵng kŏ kơt lah ntŭk kan njrăng rdâng nkuăl 5 kơl an ân ngih dak si gay ma rep dak bŭk. Lah ueh ăp rmôt kơl an bah ăp tahen hŏ kơl ân hên”.

Âk rbăn nŭih ƀon lan hŏ năn geh tahen kơl an rklaih bah dak lip lơh. Rnôk ma ăp rnôk dak lip tât ndal ngăn mhe rlau, ê năn rlu rlau, cán bộ, tahen lŏ hăn ƀư tay nau kan. ƀư nau kan “Ndăng Quang Trung” yor Thủ tướng Chính phủ rgŏ jă, tahen Quân khu 5 lŏ tât tâm nkuăl geh nau khuch khat jâk ngăn gay kơl an bon lan ndâk tay ngih vâl.

Ăp nar aơ, âk rbăn cán bộ, tahen nsoh tâm săk nơm nau kan mhe-ƀư nŭih ndâk nkra, dôl ndâk tay ăp mir ngih, chor jay kơl an ân kônh wa nkuăl geh dak lip. Pah kan chuêl n’apơ ma mông sông, mô rlu, bĭch mô âk, ăp nô ndăn ăp bri duh nar đah nau ŭch kơl an ƀon lan ơm geh ngih ân nâp, đăp mpăn nau rêh bah năp têt năm mhe.

Trung uý Phạm Ngọc Dân, Tiểu đoàn 303, Trung đoàn 584, N’gâng kan rđau tahen n’gor Dak Lak, dôl ndrel ma ăp tahen êng ndâk tay ngih ân ƀon lan, nkoch:

‘Ƀư nau kan Thủ tướng Chính phủ rgŏ jă, rmôt tahen Quân khu ndrel ăp rmôt bah tahen N’gâng kan neh dak hŏ ntơm hăn ƀư nau kan ngăn, năn, ƀư tâm nar, ƀư tâm măng, n’ăp ma bri mih, duh nar. Oh nô rklaih nau jêr tât drăp ndơ, ndơ dŏng, nsôih tât lơ 15/1/2026 mra ƀư jehe đê̆ ngăn 50% rnoh ngih n’gâng kan tâm nkual hŏ jao ân rmôt tahen Quân khu 5 ndrel ăp rmôt bah N’gâng kan neh dak tâm nkuăl”.

Âk rbăn cán bộ, tahen Quân khu 5 hŏ ndrel dôl tât kơl an tâm ăp thôn, ƀon geh nau khuch yor trôk nar lơh, kơlan ndâk mhe, nkra nâp ngih vâl ân ƀon lan geh djơh khuch. Nuih n’hâm kan têh, gơih n’ơn tâm nau kan bah ăp tahen Wa Hồ hŏ geh nau rêng, ƀư ueh nuih n’hâm bah kônh wa miền Trung-Tây Nguyên.

Saơ tahen mâp nau jêr rgănh, kônh wa tâm thôn, ƀon kŏ nsum ty rgop n’hâm. Nŭih n’gon piăng, nŭih gâm dak, nŭih kơl an, ndrel tâm kơl an pă rklaih nau jêr, tâm nkuăl nkuăl neh khuch jêh dak lip, nau tâm boh tahen, ƀon lan ntơm tâm dăch, duh răm nau tâm boh. Wa Nguyễn Thih Mận, tâm xã Hoà Thịnh, n’gor Dak Lak, mbơh:

‘Saơ ăp kônh tahen pah kan jêr rgănh ri ma oh nur hên kŏ tât kơl an ƀư nau kan đŏng. Phung hên tât kơl an tahen, n’gon piăng ân tahen sông sa ân kah oi gay geh n’hâm soan kơl ndâk ngih vâl ân ƀon lan”.

Ndrel sa, ndrel gŭ, ndrel kan, ndrel ngơi nau ngơi bah kônh w ăp rnoi. Nau tâm boh tahne, ƀon lan nar lơn ma nâp rjăp, njêng “nuih n’hâm ƀon lan” nâp nâl, ntop tay tay n’hâm dăng gay rmôt tahen Quân khu 5 mât nâp nhoat jâng tâm ăp ntrong ndâk ndrel mât neh dak. Thiếu tướng Lương Đình Chung, Chính uỷ Quân khu 5 lah rjăp, tâm lôch 81 năm ndâk, tâm lơh ndrel têh jêng, Tahen ƀon lan Việt Nam mro ntoh kloh nau dơi leo trong, hăn leo trong lor, yor ƀon lan kơl an:

‘Tahen nơm tă bah ƀon lan ma njêng, yor ƀon lan ma tâm lơh. Gŭ kan tâm nkuăl miền Trung Tây Nguyên, neh geh âk nau khuch khat, cán bộ, tahen rmôt tahen Quân khu 5 ndơn saơ jru ngăn lah, kơl an ƀon lan lah nau đă bah play nuih, tât ma ƀon lan ơm ngăn, ngăch ngăn. Phung hên kŏ rgop n’hâm ndrel ma lam ntrong kan chính trị ndrel lam rmôt ƀon lan tâm quân khu hŏ rlet rlau ăp nau jêr jŏ, ah rgănh tâm rnôk mih dak lip. Rnôk ƀon lan ndrel ăp nkuăl rlet rlau dơi ăp nau tât bah khuch mih dak lip ri cán bộ, tahen rmôt Quân khu saơ ueh ngăn ndrel răm nuih n’hâm”.

Tâm nklang yan mih dak lip lơh ndrel nau jêr rgănh hôm ơm, rup rui ăp nŭih tahen Quân khu 5 hŏ kơl an ƀon lan, tâm dăch ma ƀon lan hŏ jêng ntŭk nsing rnơm nâp nâl ân kônh wa ăp rnoi miền Trung-Tây Nguyên. Năm khay mra dơi rlet rlau, yơn nau tâm boh tahen, ƀon lan mro hôm. “Tahen wa Hồ-Tahen bah ƀon lan”-rup gui nê mro nkah tâm nau nkah bah kônh wa miền Trung-Tây Nguyên./.