Ta n’gor Khánh Hòa, Bộ Công an ƀư Tâm nchră nău kan nkoch lư chính trị, nkoch trêng, njrăng n’gang trôk nar lơh n’hanh jao ban “Trong kan ndăng Quang Trung”, ntrôl ngăch rdâk njêng, nkra jay gŭ an nuĭh ƀon lan nkual geh dak bŭk ơm đăp mpăn nău rêh.

Tât aƀaơ, Văn phòng Bộ Công an hŏ dơn geh bơi 90 rmen prăk kơl pah kan nkra bah trôk nar lơh. Tĭng ƀư “Trong kan ndăng Quang Trung” tă bah Thủ tướng Chính phủ rgŏ jă, Bộ Công an dơi jao ƀư tơm rdâk njêng mhe 429 mblâm jay kơl nuĭh ƀon lan ta 8 n’gor miền Trung – Tây Nguyên. Tât aƀaơ hŏ geh 19 mblâm jay ƀư lôch jêh, rlău rnoh ngăch ndơ̆ luh; âk jay êng geh rnoh lôch rlău 70% đŏng. Lĕ rngôch rnoh jay nchrăp ndơ̆ jao bah năp nar 15/1/2026, nsrôih ƀư lôch jêh ơm rlău ntơm bah 10 tât 15 nar ta du đêt ntŭk.

Ntơh măt kruanh rđău kan công an ăp n’gor hŏ tâm pă nău tă ơm gĭt ngăn ngăn mpeh trong rƀŏng "4 ta ntŭk” tâm trong rdâng trôk nar lơh n’hanh rgum mpôl kan n’gâng tơm gay mât nâp rnă njrăng ta ăp nkual chrŏ rđŭng dak bŭk; pah kan rƀah gĭt nău lư nô nău mih dak bŭk, nkra bah trôk nar lơh...

Thiếu tướng Nguyễn Hữu Phước, Giám đốc Công an n’gor Khánh Hòa an gĭt, rơh mih dak bŭk mhe aơ ta Khánh Hòa lơh ndâp băm jru, rlău 100.000 rnăk nuĭh ƀon lan geh tât khuch, roh huach mpeh wăng sa nchroh tât rlău 5.000 rmen prăk. Công an n’gor hŏ rgum 6.500 tơ̆ cán bộ, tahen râng kơl, ntrơn du nuĭh ƀon lan, nkra bah khuch khat trôk nar lơh. 800 bôk ndeh dơi rgum tât, hŏ kơl bơi 20 rbăn nuĭh ƀon lan tât ntŭk đăp mpăn. Lôch bah mih dak bŭk, Công an n’gor nkre rdâk mon tay 24 mblâm jay tâm trôm bôk nău kan “Ndăng Quang Trung”:

“Mpôl hên hŏ tâm pă lĕ nuĭh kan, ndeh rklư tĭng ƀư nău kan. Trong rƀŏng lah mpôl hên geh moh ndơ tâm ti rgum gay kơl nuĭh ƀon lan da dê. Cán bộ, tahen gưl xã, mpôl kan rnă njrăng đăp mpăn tâm dâng hŏ du rơh an nkra bah khuch khat dak bŭk ta n’gor. Dak rhuăt ntŭk tât, kuaih kloh uĕh tât ntŭk nê.”.

Thiếu tướng Nguyễn Hồng Nguyên, Groi Chánh Văn phòng Bộ Công an rnê âk nău dơn kan, nău lor nchrăp n’hanh lôch jêh tĭng ƀư tâm pah kan nkoch trêng mpeh njrăng n’gang ƀon lan n’hanh "Trong kan Quang Trung" bah ăp đơn vị, ăp n’gâng kan ăp n’gor; nkre lah rjăp, aơ lah nău dơn kan dơi Bộ Công an dŭt n’hâm uănh khlay rgum rđău đă rloh rlău.

Thiếu tướng Nguyễn Hồng Nguyên đă ăp đơn vị, Công an ăp n’gor grêt dăch tĭng ƀư jăp nău rđău đă bah Đảng, Ngih dak. Nkre ntrôl dăng tay pah kan nkoch trêng nău lư, lơn lah ta ntŭk mạng, njêng nău rgâl dăng mpeh nău gĭt êng, dâk kan tâm rđău đă tĭng ƀư nău dơn kan, rdâk njêng mpôl Công an ƀon lan tâm pah kan pah kan njrăng n’gang ƀon lan, đăp mpăn ăp tŏng geh nău rêh, nkra bah khuch khat trôk nar lơh đŏng. Thiếu tướng Nguyễn Hồng Nguyên lah:

“Năm 2026,mpôl Công an ƀon lan geh trong leo tâm rlong 3 dâk bôk năp: dŭt tĭng jăp, dŭt n’grŏ tĭng, dŭt dăch dêh đah ƀon lan. Yor kơt nê̆, nău dơn kan mbơh lư chính trị nkoch trêng rup gui công an ƀon lan lah âk ding, wăch rgum”.