Nău nchih 2: Rdâk nău nsing nơm nuih n’hâm ƀon lan

Ăp nar dja, lam ăp nkual geh tât khuch hô bah phŭt Miền Trung - Tây Nguyên, "Trong kan ndăng Quang Trung" dôl ƀư dŭt jăch ndăn, rdâk njêng, nkra tay jay gay ƀon lan wơt năm mhe tâm jay mhe. Ăp mblâm jay mon bah trong kan dja mô dơn mpơl nău nsrôih chính trị jăch ndăn ma hôm mpơl trong hăn let năp tay, ndơ̆ luh rnoh tât kỹ thuật, đăp mpăn âk, gay kơl ƀon lan bên di jŏ jong ta ăp nkual way geh dak bŭk. Aơ mô dơn lah nău nsrôih plơ̆ njêng tay ntŭk ntô ndơ dŏng ntung trong, ma hôm hŏ jêng du trong kan bun dăp nău nsing nơm n’hanh nău rdâk tay nău nsing nơm nuih n’hâm jru hvi.

Nklang mih phŭ brui brui, ta jâng jay chôt rlâm, ndâp bŏk neh, wa Phạm Dũng, ta thôn Phú Hữu, xã Hòa Thịnh, n’gor Dak Lak hŏ yô̆ uănh mpôl tahen dôl rdâk jay mhe. Păng an gĭt, Chính phủ hŏ geh 3 ntil jay ntĭt lor gay an păng sơch n’hanh moh ntil an păng đăp mpăn yor weh ƀư nâp uĕh gay tŏng suan rdâng đah phŭt sial dôl nar lơn ma krit djơh.

“Ntil 1, ntil 2 đah ƀon lan ta aơ, đah n’gâng kan ta aơ lah dŭt tâm di. Yor n’gâng kan ta aơ lah dak bŭk, sơch ntil jay n’hanh aơ lah di đah n’gâng kan ta aơ hôm, mô geh ntil ma lah đŏng ôh.”

Ndrel đah rnăk wa Dũng, âk rnăk ƀon lan ta xã Hoà Thịnh tâm ban ŭch da dê ntơm bah rnôk dơi mbơh gĭt mpeh ntil jay weh ƀư “3 nâp” – lah jâng jay nâp, rpaih nâp, chor nâp, dŏng tâm "Trong kan ndăng Quang Trung". Wa Nguyễn Thị Thiểu, thôn Phú Hữu, xã Hoà Thịnh mpơl nău.

“Mbơi mô mĭn lah dơi geh Ngih dak ntop kơl dŭt ngăch, dŭt uĕh kơt aơ. Ơm geh ntŭk gŭ wơt Tết, Ngih dak uănh khlay tât ƀon lan kơt aơ lah rhơn ngăn.”

Đah nuĭh ƀon lan nkual dak bŭk, nău ntoh bah mpôl tahen mô dơn lah ntop kơl mpeh drăp ndơ, ma hôm lah ntŭk nsing nuih n’hâm, lah nău đăp mpăn an lah khân păng mô geh ntlơi êng bah kơi. Tâm rnôk an ƀư “Trong kan ndăng Quang Trung", dơi nkah năp nkah kơi đah cán bộ, tahen lah nuih n’hâm “ƀư an ƀon lan tâm ban kơt nuĭh tâm rnăk he nơm”. Thượng uý Đỗ Đình Tuấn, Trung đoàn 143, Sư đoàn 315 (Quân khu 5) nkoch:

“Rnôk hăn kơl tât tĭng rnăk ƀon lan, mpôl hên uănh jay bah ăp kônh yơ ta aơ tâm ban kơt jay bah he nơm. Kơl ƀon lan lah tâm ban ma kơl an rnăk wâl he nơm đŏng.”

Mô dơn lah ăp mbal kŭk ta ntŭk ƀư jay mô lah ăp măng rdâk mon tât ôi ang, "Trong kan ndăng Quang Trung" jăch ndăn hôm mpơl kloh nău lăp kan ăp kôp bah lam trong kan chính trị. Ta nkual dak bŭk Khánh Hoà, Kruanh UBND n’gor Trần Phong lah rjăp, Mpôl tahen n’hanh Công an ƀư nău kan n’gâng tơm kơl nuĭh ƀon lan rdâk tay nhih jay; n’gâng kan ta ntŭk dơn nău kan rgum jă, tâm pă kan n’hanh dŏng ntêr lĕ tơm ndơ rgop nsĭt geh ntil, đăp mpăn ăp ntil ndơ ntop kơl hăn sŏng tât nuĭh ƀon lan.

“Tơm ndơ ntop kơl rdâk mon jay an kônh wa nkual dak bŭk dơi n’hao dăng, geh lĕ ma mpôl tahen, Công an. Ăp n’gor ân mhâm ƀư gay prăk bah n’gor, bah ăp nuĭh lŏng nuih n’hâm kơl rong an rvăt lŭ choih, bah ir n’glăp dŏng tâm nar luh kan. Yor kơt nê̆, nău dơn kan bah ăp xã, phường lah dŭt khlay.”

Đah nău nsrôih chính trị dŭt âk, "Trong kan ndăng Quang Trung" hŏ rgop jêng du suan dăng lam rêh jêng kon nuĭh tâm rdâng lơh nău tât trôk nar: nău dơi leo ƀư, nău dơi kan nsum n’hanh ăp nău dơi kan tĭng trong nchrăp. Ăp nău dơi nê hŏ njêng rnoh ngăch ndal, nsĭt tay ăp mblâm jay nâp uĕh n’hanh nsĭt tay lĕ ma nău nsing nơm. Đại tá Dương Văn Long, Groi Giám đốc Công an n’gor Gia Lai an gĭt:

“Nuih n’hâm nsrôih pah kan lah mô geh nar rlu, mô geh kơp mông nar, mô kơp mih n’hach. Mpôl hên nsrôih mhâm ƀư gay tât Tết Nguyên Đán, lĕ rngôch ăp rnăk ƀon lan ma dơi ntop kơl, geh jay gŭ da dê, geh ntŭk rlu rlău n’hanh nău rêh đăp mpăn. ”

“Trong kan ndăng Quang Trung” mbra lôch jêh tay rnôk ăp mblâm jay n’glĕ dŭt dơi ndơ̆ jao, yơn ăp rnoh khlay ma trong kan an tay mbra ring lam tay. Nê mô dơn lah rlău 1.600 mblâm jay nâp uĕh n’hanh 40.000 mblâm jay dơi nkra, kơl nuĭh ƀon lan đăp mpăn bah năp krit djơh bah trôk nar, ma hôm an năl saơ nău dơi kan, nău buăt nthoi n’hanh krêp dêh!

Ăp mblâm jay “3 nâp” bah "Trong kan ndăng Quang Trung" mbra lah ăp “ntŭk gŭ nde” bah nuih n’hâm ƀon lan, dơi rdâk ma nău mĭn plơ̆ njêng tay lor nchrăp n’hanh lĕ ma ăp suan rhal ndăng măng nar bah ăp nuĭh tahen. Ntơm bah ntu jâng jay bŏk jru, du nău rêh mhe dôl sĭt rêh tay, nâp djhư̆n. Du “ntŭk nsing nuih n’hâm ƀon lan” dôl bôr dăp mbra jêng du suan ntrôl hun hao bah neh dak tâm rơh hun hao mhe./.