Tâm ƀon Kđoh, xã Cư Pơng, n’gor Dak Lak, nau kan nkoch trêng tât nar săch kan geh ntrŭnh ntơm khay 11 năm e. Ndrel ma nau yông băng rôn, áp phích tâm ăp trong, mbơh tâm ăp loa ntoh nau, n’gâng kan tâm n’gor hôm ntrŭt dăng nau nkoch trêng bah nar rƀŭn ƀon, mbơh nchră pháp luật. Nkre mbơh nau, tài liệu nkoch tâm mạng xã hội ndrel ntŭk nkoch mbơh nau gay ma nthoi, mbơh năn tât kônh wa.

            Wa Y Hoh Niê, Kruanh ban Nau kan Mặt trận ƀon Kđoh mbơh, nkô̆ nau nkoch trêng rgum mbơh cử tri ƀư tŏng nau săch kan tâm di nau ntrŭnh, săch ăp nŭih bu rnơm, nau dơi ntoh măt ân ƀon lan:

            ‘Nkoch mbơh ân kônh wa gĭt ndrel hăn săch kan tâm di gay săch luh ăp nuih ntoh măt ngăn ngên geh nau tŏng dơi gay ma ntoh ân ƀon lan, pah kan geh nau rjăp gay leo tât nau săk rnglay ndrel kơl an ƀon lan geh nau rêh ueh lơn. Phung hên mra lŏ djăt rgum ăp nau rđau, đă rƀŏng tă bah gưl ba lơ ndrel nkoch mbơh tay ân ƀon lan ƀư dơi tâm di, gay nau săch kan geh nau ueh ngăn”.

            Bah nau nkoch trêng, ăp nau mbơh tât nar săch kan geh nkoch kloh, cử tri kŏ njoăl nau ŭch tâm ăp ntoh măt mra geh săch, nê lah ăp nŭih tŏng nau dơi bah ;uật ntrŭnh, nkre ân geh gĭt nau vay, tâm dăch ƀon lan ndrel nkoch mbơh nau ngơi bah ƀon lan nơm. Ưa Amĭ Lip, tâm ƀon Ea Klok, xã cư Pơng, mbơh:

            ‘Gâp ŭch săch kan jêh aơ mra geh săch dơi nŭih geh tŏng nau dơi, nau blau, mro kơl an ân ƀon lan, mô geh tâm nkhah ndrŏng, ach o. Mro tâm dăch ma ƀon lan, gĭt nau vay, nau rêh bah kônh wa, mro ngơi dơi nau ngơi bah kônh wa nơm”.

            Tĭng Uỷ ban săch kan n’gor Dak Lak, tât rnôk aơ, nau tâm nchră bok năp hŏ tâm ban săch 28 nŭih gay mbơh săch luh 15 nŭih ntoh măt Quốc hội gưl XVI. Tâm nê geh 5 nŭih rnoi mpôl đê̆, 9 bu ur ndrel du hê nŭih mom. Đah ntoh măt HĐND n'goê, rnoh geh săch 148 nŭih, ân săch luh 84 nŭih. Tâm gưl xã, lam n'gor geh 2.445 nŭih ntoh măt HĐND.

            Tâm dâng, nau đă mpeh nŭih rnoi mpôl đê̆ ndrel bu ur geh mbơh kloh ntơm bah bôk rnôk tâm nchră.  Wa H’Hương Bkrông, Kruanh Uỷ ban MTTQ Việt Nam phường Ea Kao, n’gor Dak Lak, mbơh:

            ‘Nau dơi bah nŭih bu ur nar lơn ƀư rjăp, mra ntoh măt ân nau ngơi bah cử tri nơm, nkoch mbơh nau ŭch bah bon lan, ngăn lah tâm nê lah bu ur. Ndri ma rnoh nŭih bu ur, rnoi mpôl đê̆ lah nau geh tâm rgop ân tâm di, đăp mpăn ân nau dơi bah rmôt nuih aơ tâm rnôk ân geh săch. Aơ kŏ nkre lah nau ntoh nau dơi yơn  nkre lah kŏ lah nau kan ndrel nau dơi jâk ngăn đah ăp nŭih dơi geh mbơh gay ma ân săch”.

            Tâm rnôk geh nau rgâl mpeh nkuăl ndrel rnoh nŭih ntŭk gŭ jêh rnôk rnglăp nsum, nau nchrăp săch kan tâm Dak Lak geh năl lah nau kan chính trị tơm khlay, ŭch geh nau nchrăp ndrel nau tâm rgop rjăp đah ăp gưl kan ntŭk kan. Nau kan kơp, rgâl nŭih, rnoi mpôl ndrel rnoh nŭih ân geh săch dơi geh ƀư rjăp, tâm di nau đă, ƀư nau dơi ân ăp nhoat tâm nchră ba kơi tay.

            Tĭng wa Cao Thị Hoà An, Groi Bí thư Rnâng kan n’gor uỷ, Kruanh HĐND n’gor, Kruanh Uỷ ban săch kan n’gor Dak Lak, ăp nau kan nchrăp ƀư dôl geh ntrŭnh tâm ban, đăp mpăn nau đă mpeh rnoh nŭih, rnoi rnoi mpôl ndrel nau dơi ăp ntoh măt:

            ‘Ăp nau kan tât rnôk aơ ri Uỷ ban săch kan geh nau tâm rgop rjăp ndrel nchrăp ƀư jêh ueh ndrel ơm lơn nau ngăch đă. Tâm rnôk tât ri lŏ ƀư ăp nau kan gay mât đăp mpăn tâm di nau ntrŭnh, nau dơi bah rnoh nuih, rnoh rnoi ndrel nau dơi ăp tŏng bah ntoh măt tâm di nau ntrŭnh”.

            Mât đăp mpăn rnoh  ntoh măt lah nŭih rnoi mpôl đê̆ ndrel bu ur tâm nau săch kan mô êng tŏng dơi nau ŭch đă bah luật, ma hôm rgop nau ƀư nâp nau rnơm bah cử tri. Đah n’gor geh âk rnoi êng êng kơt Dak Lak, nau mât đăp mpăn rnoh nuih geh săch mra geh pơk  trong nơih  ƀư dơi nau kan ntoh măt bah ntŭk kan ƀon lan săch, pơk nau tâm ban, tâm di tâm ăp kơn ƀon lan./.