Tâm trôm jay mhe hvi 80m2 ta ƀon Bu Boong, xă Tuy Đức, n’gor Lâm Đồng, yuh Thị Duyên, nuĭh Bunong, ndrel sai n’hanh 2 hê kon mô ru mpêh koaih nchrăp wơt Tết. Jay nâp nâl dơi ndâk ƀư bah bôk nău kan jŭt ngih rông mpông sat, jêh bơi n’gul năm aơ, lah nău răm têh ngăn bah rnăk wâl yuh. Geh jay mhe, mir cà phê tâm yan play rah bôk năp, ntop tay phe n’hanh ndơ sa Tết dơi tahen an, yan puh năm aơ rnăk wâl yuh Thị Duyên yor rĭ răm tay tŏng ăp.

Rnăk wâl gâp dơi Ngih dak ntop kơl 90 rkeh prăk ndâk ƀư bah bôk nău kan jŭt ngih rông mpông sat, lăp gŭ geh rlău 3 khay aơ hôm, lĕ jay răm ngăn. Geh ntŭk gŭ đăp mpăn, mpôl hên đăp mpăn ƀư sa, rwê an oh kon nti nsơm. Tết aơ hôm dơi Quân khu 7 uănh kơl, an prăk n’hanh ndơ sông sa, jêng rnăk wâl an rwăt tay ndơ sông sa, năp kho ao mhe an oh kon hăn pâl năm mhe Bính Ngọ. Rnăk wâl gâp lah uĕh Đảng, Ngih dak âk ngăn.

Kơt ta Tuy Đức đŏng, nău răm wơt Tết tŏng ăp dôl rêng hvi tât âk rnăk wâl jêr jŏt njok trong n’har bri neh kơh n’gor Lâm Đồng. Ta thôn Bình Minh, xă Dak Wil, wa Lữ Thị Đan, nuĭh Thái, du hê mât kon jêh rnôk sai roh ơm. N’gul năm e, bah bôk nău kan ntop kơl joi nău rêh, wa dơi pă 250 mlâm djăr ntil n’hanh ndơ sa mpa rong n’hanh dơi cán bộ xă ntĭm ƀư ndrung wang. Êp tết, rơh djăr bôk năp tăch nsĭt tay nău geh prăk âk. N’gul rnoh prăk wa an mât tay, hôm ƀa ƀă mĭn an kon nti n’hanh ka choh kho ao mhe an kon. Ăp nar êp Tết, 30kg phe ntop kơl chính phủ ndrel ƀănh chưng, ndơ dŏng yor tahen an kơl 2 mê̆ kon dơi jăng lơi nău rwê. Wa Lữ Thị Đan, an gĭt:

Dơi dơn phe ntop kơl bah Chính phủ, ndơ Tết bah tahen, mê̆ kon gâp dŭt rhơn ngăn, lah uĕh Đảng n’hanh Ngih dak. Tết aơ 2 me kon tŏng ndơ sa, ndơ ngêt sa Tết hôm. Năm mhe Bính Ngọ, lah dơi, mpŏng Đảng, Ngih dak uănh kơl lơn tât mê̆ kon bah ir nău rêh jêr jŏt.

Nău răm m’ak dôl tât đah nkual n’har bri Lâm Đồng lah săk rnglăy bah nău ndrel ty bah lĕ trong chính trị. Ăp năm, Quân khu 7 tâm rgop đah n’gâng kan ƀon lan ƀư bôk nău kan “Xuân chiến sĩ”. Ta Lâm Đồng, bôk nău kan năm aơ dơi mbơh ƀư rĭng ta 5 xă n’har bri geh Tuy Đức, Dak Wil, Thuận An, Thuận Hạnh n’hanh Quảng Trực. Ndrel đah nău ndâk ƀư ndâk ƀư ntŭk ƀon lan gŭ tâm êp tahen-ƀon lan ta xă Quảng Trực, bôk nău kan lĕ an rlău 2.600 nklâm ndơ khlay nklăp 5 rmen prăk an tahen n’hanh ƀon lan nkual n’har bri. Hang rbăn ƀănh chưng dơi nklâm an rnăk ach o, êp ach o; âk rơh but uănh săm ji an dơm dơi ƀư; rgum tăch ndơ “mô sŏk prăk” rhŏ an kônh wa năp rwăt ndơ Tết. Đại tá Nguyễn Văn Sơn, Chính ủy Bộ chỉ huy Tahen n’gor Lâm Đồng:

Tă bah ăp nău ƀư bah bôk nău kan “Xuân Chiến sĩ” năm aơ lĕ djăt tay nkô̆ nău chính trị  têh jru, ƀư tĭng nuih n’hâm tâm rnglăp đah Tahen n’hanh nuĭh ƀon lan. Tă bah nĕ “nâp nuih n’hâm ƀon lan” nar lơ dơi nâp nâl, ndâk njêng nâp lơn ta trong n’har bri bah n’gor Lâm Đồng.

Jêh rnôk nglăp nsum bah ăp n’gor Dak Nông n’hanh Bình Thuận, n’gor Lâm Đông mhe geh rnoh neh bri bơi 24.300km2, têh ngăn lam dak, nkre geh trong n’har bri neh kơh, nkre geh n’har dak lêng. Êng trong n’har bri neh kơh jong rlău 142 km, đah 5 xă, bơi 100.000 nuĭh ƀon lan gŭ rêh, bơi n’gul rnoh nuĭh rnoi mpôl đêt. Bôl rlet rlău nglăp nsum n’gâng kan, n’gor hôm e mât săk rnglăy ăp bôk nău kan n’hŭch ach o âk trong, rgum tâm nkual dŭt jêr jŏt. Rơh Tết Bính Ngọ, n’gor lĕ rgŏ jă an 1.600 nklâm ndơ, dĭng lĕ 1,6 rmen prăk tât ăp rnăk jêr jŏt nkual n’har bri. Wa H’Vy Êban, Groi Kruanh Ủy ban MTTQ Việt Nam n’gor Lâm Đồng an gĭt:

Tă bah bôk nău kan, kônh wa geh tay nău răm, wơt Tết đăp mpăn n’hanh tŏng ăp lơn. Aơ lah nău ƀư ngăn ngên, săk rnglăy, rgop ƀư tĭng nău ntrŭnh bah Đảng, Ngih dak đah nuih n’hâm “mô an nuĭh geh ntlơi bah kơi”.

Bah ăp chor jay nâp nâl ndơn ma jay sat, ăp ntrong ƀư joi nău rêh dôl mât uĕh săk rnglăy, tât ăp nklâm ndơ geh nkô̆ an di rnôk, nău rêh bah nuĭh ƀon lan ntŭk n’har bri Lâm Đồng dôl ntơm dơi hao. Yan puh n’har bri mô knŭng uĕh dang nkao, ƀănh chưng, ma hôm lah nău răm dơi ntop tay, lah nău tâm rnglăp rnoi nuĭh dơi nâp nâl, ndâk njêng nâp nuih n’hâm ƀon lan, nâp nâl ƀư tơm n’hanh đăp mpăn ntŭk bôk Neh dak./.