Lôch n’glăp nsum, Dak Lak lăp tâm năm 2026 đah du nuih n’hâm rhơn nđơr mhe: n’gor tuch tăm mpơl saơ săk bah jâng wăng sa dak lêng. Ntơm bah ăp njăr trong Đông – Tây mhe mbluh, du trong wăng sa bri – dak lêng” dôl luh jêng, nthoi bah ăp trong tâm ƀah ngai ơm gay nchih tay du plơp mhe mpeh têh ndrŏng nâp dăng an me neh nklang Tây Nguyên.  

Lôch n’glăp nsum n’gor, ta ăp njăr trong nthoi bah luh nar tât nhâp nar n’gor Dak Lak n’hoch ndơ tăch mpơl kloh. Ndơ tuch tăm bah nhâp nar n’hoch tĭng bôk ndeh jŭr dak lêng, tui ka bah dak lêng hao rlơ̆ nkual yôk bri; ndrel du tơ̆, rnoh năch pâl nđaih bah nhâp nar jŭr hao âk đŏng, jêng ăp njăr trong “hăn dak lêng- sĭt hao bri” mbro. Ndrel đah ăp bôk ndeh rdeng ndơ lah ăp rơh mâp, rơh tâm ôp, ký ton tâm boh đah ăp doanh nghiệp bar mpeh. Wa Nguyễn Thị Nga, Kruanh hội bu ur doanh nhân Phú Yên an gĭt, lôch n’glăp nsum, rnoh âk rsong hăn luh nar– nhâp nar hŏ hao rlău du n’gul rđĭl đah ntơm nơh – du rnoh an saơ “dak lêng” n’hanh “bri” dôl tâm têk ti nsum tâm ndrel du ntŭk wăng sa dơn ngoăy.

“Mpôl hên ndrel geh nău tâm gĭt wât nsum, joi gĭt tay mpeh ntŭk tăch rgâl, mpeh luh nar joi gĭt mpeh tuch tăm mpeh nhâp nar ri joi gĭt mpeh tui ka dak lêng. Aƀaơ gâp saơ kơt lah ăp băl ta mpeh  nhâp nar Dak Lak, hŏ jŭr mpeh luh nar rvăt tui ka n’hanh pâl nđaih dŭt âk.”

Ndrel đah âk tâm rsong tăch rgâl ndơ luh nar- nhâp nar, pâl nđaih geh nău rgâl âk đŏng gay mât dŏng lĕ săk geh dơh uĕh “du n’gor- bar bôk tơm wăng sa”.  Năm 2026, Dak Lak năl săk ntơ “Joi gĭt mpeh drăp ndơ ơm yău ntlơi an tay”, mât dŏng rnoh khlay văn hóa mpơl săk n’hanh mô mpơl săk, rƀŏng tât wơt geh 8 rkeh tơ̆ năch, nsĭt geh 16 rbăn rmen prăk. Suan rhôp bah Dak Lak mbra dơi rêng lam dăng ma 41 tập phim “Dak Lak hăn lah gân nkre” pơk ta ăp mbrô ƀoh rup, năl di du ntŭk tât wăch rgum săk tơm ndơ ngêt sa, kon nuĭh n’hanh bri dak têh hvi.

 Wa Trần Hồng Tiến, Giám đốc Sở Văn hóa Thể thao n’hanh Pâl nđaih Dak Lak an gĭt, n’gor mbra ƀư rêng pâl nđaih tĭng puăn khay, nkre đah lễ, Tết n’hanh ăp rơh rlu jong nar, njêng ndơ geh ƀư wăr năm. Ndrel đah nê lah ntrôl dăng nkơnh n’hơ rup gui, âk ndơ geh ƀư rlong saơ n’hanh pâl nđaih măng, nthoi njăr trong hăn bah dor yôk prêh jŭr duyên hải.

“Aƀaơ Dak Lak hŏ ký ton tâm nkrêp kan nsum đah ăp n’gor kơt Khánh Hòa, Lâm Đồng, Gia Lai, Hà Nội, nkual ƀon têh Hồ Chí Minh, Đà Nẵng. Đah Khánh Hòa ri mpôl hên rgum wăch năch dak bah dih bah Khánh Hòa tât Dak Lak lơn lah lôch rnôk njăr trong cao tốc lôch jêh ri mpôl hên mbra rgum nkơnh n’hơ rup gui bah Dak Lak gay mhâm ƀư geh ăp ndơ mhe gay têk năch dak bah dih tât Khánh Hòa sĭt tât Dak Lak”

Gay ăp trong kan wăng sa bah Dak Lak mhe hao ngăch dơh uĕh, ntung trong bah n’gor geh njuat rgâl geh khlay. Trong Cao tốc Khánh Hòa – Buôn Ma Thuột hŏ mbluh kỹ thuật, Quốc lộ 14 der mpeh luh nar Buôn Ma Thuột hŏ mbluh soih, trong cao tốc Quy Nhơn – Chí Thạnh hŏ bơi tât nar sa nkra đŏng.

Tĭng wa Trần Đình Long, Groi Chủ nhiệm Ủy ban Pháp luật ơm bah Quốc hội, rnôk ntŭk hun hao dơi pơk hvi n’hanh ndơ dŏng ntêng lêng nkual dơi ƀư lôch jêh, nău tâm rsong tăch rgâl, tâm pă nuĭh kan n’hanh hun hao tăch rgâl- rhŏ dŏng mbra nta ăp trong dơh, lơn lah ta nkual tă hun hao mbrơi ntơm nơh.

“Đah Tuy Hòa n’hanh Buôn Ma Thuột  geh tâm ƀah nklang n’gul ma ta n’gul nê aƀaơ dŭt mbrơi hun hao, ma nkual nê lah nkual săk geh dŭt têh. Aƀaơ lah du n’gor lah du n’gor ri păng mô hôm lah nkual jru, nkual ngai đŏng ôh. Rnôk njêng dơi ntung trong tâm ntêng lêng nkual, nău rsong tăch rgâl, tâm pă nuĭh kan, hun hao tăch rgâl – rhŏ dŏng mbra pơk luh trong dŭt têh hvi. Aơ lah dơh geh ma aƀaơ mpôl hên mơ ntơm mât dŏng.”

Lăp tâm năm kan 2025–2030, Dak Lak ntrŏng hun hao đăt ndal nsing ta ntung trong têh jong, rgâl dơh glêh siƀŭt n’hanh ntŭk ntuh kơl sŭng aih. Kruanh UBND n’gor Dak Lak, wa Tạ Anh Tuấn an gĭt, đah rgum tơm lah buăt nthoi ntŭk bah bri tât dak lêng, n’gor mbra rdâk njêng rêng rnoh khlay pâl nđaih, tuch tăm- si gle- tui ka têh dăng:

“Buăt nthoi nkual Dor yôk đah Duyên hải n’hanh ăp trong soih dja mbra lah trong me tơm gay hun hao công nghiệp, tuch tăm công nghệ mhe n’hanh pâl nđaih rhŏ dŏng logistis. Tâl bar mbra rdâk njêng n’hanh hun hao rêng rnoh khlay buăt nthoi tuch tăm si gle tui ka tĭng trong rƀŏng nkual mpeh nhâp nar mbra lah nkual rgum tuch tăm công nghệ mhe, ŭnh nar sĭt jêng tay n’hanh nkret njêng ndơ tuch tăm, nkual mpeh luh nar mbra lah nkual rgum nkret njêng jru, rhŏ dŏng logistis n’hanh ntik n’hao săk geh bah wăng sa dak lêng.”

Năm mhe nsĭt nkre nău nsing nơm mpeh du Dak Lak đăt ndal, ntŭk bri nđĭr mâp dak lêng ư̆r rnhât ăp njăr trong pơk rlong an nđơr hăn lot ngai, gay nkual neh dor yôk prêh – duyên hải ndrel lăp tâm du njăr trong hun hao dăng n’hanh geh âk nău mpŏng.