N’gor Gia Lai geh rlău 5.700 duk ka đah bar pe jât rbăn nuĭh ƀon lan way hăn dak lêng lơh joi ka. Gay nar bầu cử jêng nar rgum ngăn bah lam ƀon lan, đah rnoh âk cử tri hăn nklăch phiếu dŭt âk, pah kan nkoch trêng dôl dơi ăp ntŭk meng dak lêng bah n’gor Gia Lai êng uănh khlay. Nuĭh ƀon lan lơh joi ka Gia Lai hŏ dăp rgum nău kan gay ngăch sĭt kơh bah năp nar bầu cử, râng nklăch phiếu.

Nkual phố 6, phường Quy Nhơn aƀaơ geh 67 bôk duk lơh joi ka đah rlău 200 nuĭh ƀon lan lơh joi ka jong nar ta dak lêng. Ăp nar mhe aơ, rnôk duk ka plơ̆ sĭt lôch jong nar hăn dak lêng, wa Mai Thị Gái, Kruanh Ban Pah kan Mặt trận nkual phố 6 hôm hăn tât ntŭk kât nsrŭng duk mpan gay nkoch trêng mpeh nar bầu cử đŏng. Ta aơ, păng phăt lha siƀŭt, mbơh lư mpeh mông nar bầu cử, nkre rgŏ jă kônh wa lor nchrăp dăp rgum mông nar gay tĭng ƀư nău dơi n’hanh nău dơn kan bah cử tri. Đah ăp duk ka hôm dôl hăn dak lêng, păng rgŏ jă nuĭh tơm duk tâm ôp ma ăp trong ôp ngơi gay mbơh gĭt nău lư, nkah nuĭh ƀon lan lơh joi ka ơm nsĭt duk gay râng nar bầu cử. wa Mai Thị Gái an gĭt:

“Ăp nar, rmôt bầu cử đă nuĭh hăn tât jay ăp rnăk ƀon lan nkoch trêng, rgŏ jă kônh wa dăp rgum mông nar hăn bầu cử. ăp nuĭh dâk tâm rlong ta phường Quy Nhơn dơi nkoch mbơh gay nuĭh ƀon lan rƀah gĭt nău lư, sơch ăp nuĭh tâm di gay sơch lăp tâm Quốc hội.”

Dơi nkoch trêng na nê̆, âk nuĭh ƀon lan lơh joi ka wât kloh lơn nkô̆ khlay bah lha phiếu n’hanh mbra râng nar bầu cử. Nuĭh ƀon lan lơh joi ka Nguyễn Văn Tuấn, ta nkual phố 6, phường Quy Nhơn an gĭt, oh nô ta duk hŏ lor nchrăp dăp rgum nău kan gay ngăch sĭt kơh tâm nar bầu cử.

“Nchrăp tât nar bầu cử 15/3, gâp tĭng jăp, mbra rlu du nar gay ơm ôi hăn bầu cử ta ntŭk đŏng.”

Bah meng ăp trong ƀư nkoch trêng saơ ma năp măt kơt pano, áp phích ta nkual bầu cử n’hanh ăp njăr trong me, n’gâng kan ta ntŭk hôm ntrôl dăng nkoch trêng na nê̆ ta nkual kât nsrŭng duk mpan, kơl ƀon lan lơh joi ka wât kloh lơn nău khlay bah rơh bầu cử. Nơm geh kơt nê, âk ƀon lan lơh joi ka hŏ lor nchrăp dăp rgum mông nar sĭt kơh gay râng nklăch phiếu. Wa Nguyễn Đức Toàn, Kruanh Ủy ban Bầu cử phường Quy Nhơn an gĭt, n’gâng kan ta ntŭk hŏ an ƀư âk trong nkra gay đăp mpăn nuĭh ƀon lan lơh joi ka, ăp cử tri way hăn dak lêng jong nar nha hôm tĭng ƀư ăp tŏng nău dơi bầu cử bah he đŏng.

“Lơn âk nuĭh ƀon lan lơh joi ka rnăk wâl gŭ ta ntŭk. Ăp nkual phố n’hanh đơn vị bầu cử hŏ an ƀư tât tĭng rnăk, phăt thẻ cử tri, n’hanh lơn lah phăt cờ an kônh wa lơh joi ka gay mbah rhơn nar bầu cử. Ăp rnăk hŏ mbơh lư ngăch gay ƀon lan lơh joi ka wât, dăp rgum mông nar sĭt kơh nar 15/3 tĭng ƀư nău dơi bầu cử tĭng quy định.”

Tĭng wa Bùi Duy Ninh, Groi kruanh UBND phường Quy Nhơn Đông, pah kan nkoch trêng rgŏ jă nuĭh ƀon lan lơh joi ka râng bầu cử dơi n’gâng kan ta ntŭk êng uănh khlay. Phường hŏ rđău đă ăp nkual phố, rmôt bầu cử kan nsum đah ăp rmôt lơh joi ka gay rƀah gĭt nar hăn dak lêng bah ƀon lan lơh joi ka gay mbơh nău lư tâm di. Nkre n’hao dăng nkoch trêng ma loa pơk ƀoh nău ngơi, ăp rơh sinh hoạt mpôl n’hanh na nê̆ ta ndrâm ka, nkual kât nsrŭng duk mpan.

“Nuĭh ƀon lan lơh joi ka ta phường dŭt âk tâm ntŭk ƀon lan gŭ n’hanh way hăn dak lêng jong nar mbro yor kơt nê̆ nău nkoch trêng rgŏ jă ƀon lan lơh joi ka râng bầu cử dơi n’gâng kan ta ntŭk dŭt êng uănh khlay. Nkre rgŏ jă nuĭh ƀon lan lơh joi ka dăp rgum mông nar hăn dak lêng tâm di gay râng nklăch phiếu ăp tŏng. ”

Đah nău lăp kan bah lam trong kan chính trị, nuĭh ƀon lan lơh joi ka ta ăp ntŭk meng dak lêng bah n’gor Gia Lai hŏ rƀah gĭt kloh nău dơi n’hanh nău way bah he, lor nchrăp dăp rgum mông nar râng rgum lam ƀon lan. Lha phiếu bah ăp cử tri way krêp dêh dak lêng mbra rgop khlay tâm nău dơi bah rơh bầu cử bơi tât./.