Tĭng nău mbơh, n’gor Lâm Đồng aƀaơ geh 2.938 nău nchrăp ƀư ntuh kơl hôm e tam, dĭng lĕ prăk dăn ƀư rlău 2,1 rkeh rmen prăk. Jêh hăn uănh, geh 359 nău nchrăp ƀư mâp jêr jŏt, wăk kol đah dĭng lĕ prăk rlău 245.000 rmen prăk. Yơn lah, tât aƀaơ mhe dôh rklaih lôch ntŭk kol 22 nău nchrăp ƀư tâm dĭng lĕ 359 nău nchrăp ƀư. Ăp nău wăk kol dŭt âk rgum ta rŭn in dăp rgum ndâk ƀư-si glê-khoảng sản; samƀŭt rgâl nău ŭch dŏng neh, bri; mbrơi sŏk neh; lĕ ngăch ntuh kơl yor năm khay mkra samƀŭt jŏ; rnon nău kan prăk kaih. Wa Phạm Dũng, Kruanh HĐQT Công ty Ntuh kơl ŭnh nar Thủy điện Cam Ly, an gĭt doanh nghiệp dôl ntuh kơl 1o nău nchrăp ƀư ta Lâm Đồng. Rlău ma jêr jŏt nsum, doanh nghiệp hôm kol samƀŭt hành chính rnôk rgâl tâm pă gưl, nău dơi mkra samƀŭt rhăch nău.

Yor nău kơl mhe aơ tâm pă gưl lĕ đah nău kan mpeh an phường, bol oh nô gưl phường dŭt kơl, ƀư tĭng dŭt n’hâm yơn yor mhe ir jêng ƀư tĭng mbrơi, tă bah âk khay yơn mô dơi mkra. Tât rnôk nchrăp mkra, nchrăp na nê̆ ri 31/1 mhe rlău lŏ rgâl nău dơi mkra jêng kŏ wăk kol tay.

N’hêl na nê̆ an saơ, âk nău nchrăp ƀư roh dŭt têh mông nar knŭng gay jêh ăp nău rgâl nkra, ntop tay samƀŭt rhăch nău yor rgâl nău ntrŭnh mô lah nău dơi mkra. Rnôk samƀŭt bơi jêh ri nău ntrŭnh lŏ rgâl, samƀŭt rhăch nău ƀư tay bah ntơm, jêng ngăch ntuh kơl geh “hoach” ta samƀŭt sam tra.

Wa Hồ Văn Mười, Ủy viên Trung ương Đảng, Kruanh UBND n’gor Lâm Đồng an gĭt, n’gor lĕ ndâk njêng 6 rmôt pah kan yor 6 Groi Kruanh UBND n’gor ƀư kruanh, na nê̆ hăn uănh, uănh lah tĭng nău nchrăp ƀư. N’gor dôl ntơm năl n’hanh dôh rklaih jêr jŏt an tĭng rmôt nău nchrăp.

Aƀaơ lĕ uănh tay, lĕ uănh saơ kloh hôm, nău tât aơ tay an rgum dôh rklaih. Ăp jêr jŏt, wăk kol aơ bôl tih mô lah di, geh nkân ta 5 năm mô lah 10 năm, đê̆ đŏng 15 năm hôm, yơn he mbra hăn tĭng gưl, dơh ƀư lor jêr ƀư bah kơi, moh nău an ƀư lor ri an ƀư lor, mô hŏ khlay an ƀư đŏng yơn ƀư bah kơi. Ăp ban, nău kan, ƀon lan m’hâm dơi joi nău ngơi uĕh ngăn, đêt ngăn n’hanh săk rlăy ngăn, joi trong dôh rklaih jêr jŏt an ăp doanh nghiệp tâm nar ơm ngăn.

N’gor Lâm Đồng n’gluh an hao jêng năm aơ bah 10 tât 15%, nău soih mbluh 359 nău nchrăp rlău 245.000 rmen prăk ntuh kơl dôl kol dơi mĭn lah nău kan jăch ndăn. Wa Y Thanh Hà Niê Kđăm, Ủy viên Trung ương Đảng, Bí thư N’gor ủy, Kruanh Mpôl đại biểu Quốc hôi n’gor Lâm Đồng an lah, nău nkra mô knŭng nkra tĭng samƀŭt rhăch nău jêt chrai ma an rgâl lĕ rngôch ƀư, rhoăt đêt nar mkra, tŏng ăp đăp mpăn n’hanh di ngăn đah nău dơi mkra-gay nuĭh kan ơm rgâl jêng hao jêng ngăn ngên.

Ndrel đah dôh rklaih samƀŭt, n’gor nâp nâl nău mĭn nău nchrăp an mbơh ƀư di pháp luật, di tâm ton, đăp mpăn săk rnglăy dŏng neh, săk rnglăy ntuh kơl n’hanh nău geh Ngih dak, doanh nghiệp n’hanh nuĭh ƀon lan. N’gor rnê nuĭh ntuh kơl rjăp ƀư ngăn, nkre nsrôih mkra ăp nuĭh mbrơi, mbơh ƀư, jŏ jong, ƀư mpŭng lir đah prăk.

Mhe rlău, Groi Thủ tướng Rnâng kan Chính phủ Nguyễn Hòa Bình lĕ geh nar pah kan đah n’gor Lâm Đồng lĕ dôh rklaih jêr jŏt, wăk kol ăp nău nchrăp ƀư ta ntŭk. Ta nar pah kan, Lâm Đồng dăn Trung ương uănh mĭn tay, an rgop dôh rklaih 27 nău nchrăp ƀư khlay. Dŭt âk nău nchrăp ƀư dơi ŭch bah âk lvang bah năp, aƀaơ kol rgâl nău kơl mpeh neh ntu, rnoh khlay, ƀĭt joet dăp rgum n’hanh mpeh tâm nău an mkra tĭng n’glôn jêh uănh nđôi, trong ƀư rgâl tay tĭng ăp nghị quyết mhe bah Quốc hội. Ntĭm rđău ta nar pah kan, Groi Thủ tướng lah rjăp rnâng kan Chính phủ Nguyễn Hòa Bình lah rjăp, ăp nău nchrăp ƀư mbrơi ndơ̆ an dŏng dôl ƀư mpŭng lĭr âk, ƀư hŭch prăk bah doanh nghiệp n’hanh n’gor. Wa đă n’gor mkra lôch ăp nău nchrăp ƀư mpeh nău dơi mkra; đah ăp nău nchrăp ƀư hôm e wăk kol, an mbơh tŏng ăp đah Ban ntĭm rđău gay uănh mĭn tay, mkra tĭng nău ntrŭnh. Lah rjăp nău way dôh rklaih, Groi Thủ tướng Rnâng kan Chính phủ Nguyễn Hòa Bình nkoch kloh:

Lĕ rngôch ăp nău nchrăp ƀư ăp đồng chí mbơh dŭt têh mkra tĭng nghị quyết 170 n’hanh 265 bah Quốc hội, yơn an tŏng 2 nău đă. Bôk năp, lĕ dơi uănh nđôi, n’hanh geh n’glôn jêh kloh tih đŏng lah mô; lah geh tih ri an rmal cán bộ. Tal 2, nău nchrăp ƀư an geh tâm săk yor Chính phủ ƀư tĭng nău đă bah Bộ Chính trị n’hanh Quốc hội. Ŭch lăp samƀŭt săk ri an mbơh tă bah Trong 751, rnoh mrô an tŏng ăp, tâm ban ŭch.

Tâm nuih n’hâm hăn ndrel đah ƀon lan, ntĭm rđău bah Chính phủ ta nar pah kan đah n’gor Lâm Đồng du tơ̆ tay mĭn lah dŭt n’hâm dôh rklaih ăp ntŭk kol, soih luh tơm prăk yơn đăp mpăn nău way ryơk pháp luật, mô ƀư tih, mô an roh rui drăp ndơ Ngih dak. Nĕ lah trong hăn na nê̆, ƀư rgop nău ntrŭnh rgâl nkra têh dăng, jêng ntŭk ntô ntuh kơl kloh rah wah, đăp mpăn-gay Lâm Đồng nsing nơm rgâl hao, hun hao ngăch n’hanh nâp nâl tâm rach năm hao êng nơm bah neh dak.