Ndrel đah cử tri lam dak, cử tri n’gor Lâm Đồng dôl nđơr rƀŏng tât Nar rgum neh dak – nar bầu cử đại biểu Quốc hội khóa XVI n’hanh đại biểu Hội đồng Nhân dân ăp gưl, năm kan 2026 - 2031 ƀư tâm Nar pơh, nar 15/3. Ntơm bah nkual dak lêng tât yôk prêh, ntơm bah nkual ƀon lan gŭ tât ntŭk ntĭm nti đại học, mông nar nchrăp an bầu cử dôl ring lam đah nuih n’hâm dơn kan, nău nsing nơm n’hanh nău mpŏng bah cử tri đah ăp nuĭh mbra ntơh măt ƀon lan mbăk anh nău dơn kan năm kan mhe. PV Khoa Điềm mbơh lư.

Ta phường Phan Thiết, phường nklang nkual dak lêng bah n’gor Lâm Đồng, ăp nar rlău aơ, nău nkoch mpeh bầu cử way khuh n’gôr tâm ăp nkual ƀon lan gŭ. Cử tri nsrôih uănh joi gĭt săk nchih, bah ntơm nău kan n’hanh bôk nău kan bah ăp nuĭh dâk tâm rlong gay sơch nuĭh ntơh măt tâm di. Đah nuĭh ƀon lan ta aơ, hăn bầu cử mô dơn lah nău geh ma hôm lah nău dơn kan đah neh dak đŏng, wa Trần Hữu Trung, Tổ dân phố 14, phường Phan Thiết, nkoch:

“Bôk năp lah tâm rnăk wâl kônh wa ƀon lan kiău ma, nkual phố dja Nar pơh tâm pă nău kan lôch nê hăn bầu cử ăp tŏng. Ta aơ nău way ơm ntơm bah kăl e tât aƀaơ djăt ma tât nŭng nar lah hăn bầu cử lôch jêh lĕ hôm. Ƀon lan, cử tri dŭt ŭch rŏng lĕ rngôch ăp nuĭh tŏng geh nău gĭt blău, nuih n’hâm uĕh lŏng gay rđău đă ƀon lan n’hanh êng năm kan dja lah rgâl mhe nău mĭn jêng cử tri rhơn nđơr ngăn”.

Mông nar nchrăp an nar bầu cử dôl ring lam tât ăp nkual yôk prêh bah n’gor Lâm Đồng. Ta thôn Long Lanh, xã Lạc Dương, ntŭk gŭ rêh bah ƀon lan K’ho, ăp nău lư mpeh bầu cử dơi nuĭh ƀon lan mât uănh khlay, tâm ôp tâm ăp rơh sinh hoạt nsum mpôl n’hanh tâm ăp rnăk wâl. Yuh Dà Ju K’Tim, an gĭt:

“Rnôk mâp băl mpôl tâm ban kơt nkoch bri tâm rnăk wâl ri gâp way tâm ôp n’hanh nđơn trêng tay du đêt nkô̆ geh tât bầu cử. Mpeh mông nar bầu cử, ăp nuĭh dâk tâm rlong râng tâm rlong rơh dja n’hanh ntŭk nklăch phiếu. Năm kan rơh dja lah du năm kan dŭt mha êng, gâp mpông gâp n’hanh ăp cử tri êng ƀa ƀă mbra sơch dơi ăp nuĭh geh nuih n’hâm uĕh lŏng, nău gĭt blău ngăn n’hanh geh nău dơn kan, geh nău rgâl mhe gay rdâk njêng neh dak bah ƀon lan, tă bah ƀon lan n’hanh yor an ƀon lan”.

Ntơm bah nkual dak lêng tât dor yôk prêh bah Lâm Đồng, lĕ rngôch dôl rƀŏng mpeh nar bầu cử đại biểu Quốc hội khóa XVI n’hanh đại biểu Hội đồng nhân dân ăp gưl năm kan 2026 - 2031 đah nău nsing nơm n’hanh nău mpŏng têh kuâng. Nar 15/3 rlău 2,7 rkeh cử tri bah n’gor Lâm Đồng đah ăp lha phiếu dơi mĭn uănh di tay na nê̆, sơch na nê̆ lah ăp nău njuăl nău nsing nơm bah ƀon lan tâm ăp nuĭh ntơh măt tâm di, ăp nuĭh tŏng geh nuih n’hâm uĕh lŏng, tŏng geh nău gĭt blău, lĕ n’hâm suan kan rhŏ dŏng an neh dak n’hanh ƀon lan./.