Nar 9/3, Ban Chỉ huy Tahen n’har bri n’gor Dak Lak hŏ hăn ôp uănh pah kan nchrăp bầu cử ta ăp đơn vị dơi ƀư bầu cử ơm.

Tahen n’har bri Dak Lak ntrŏng wat jêh uĕh nău kan nklăch phiếu bầu cử ơm, nkre đăp mpăn lam lĕ rngôch tâm rơh bầu cử. Mpôl pah kan bah Ban Chỉ huy Tahen n’har bri n’gor Dak Lak hŏ hăn ôp uănh ta ăp đơn vị lah: Ăp Pôih n’har bri Ea H’Leo, Ia Rvê, Yok M’Bre, Sê Rê Pốk, Bo Heng, Yok Đôn, Mpông n’har bri Đắk Ruê n’hanh Tiểu đoàn Huấn luyện – Cơ động.

Ta ăp đơn vị, mpôl pah kan hŏ djăt kruanh mât bôk tahen ăp pôih n’har bri mbơh lôch jêh pah kan nchrăp bầu cử, tâm nê rgum tâm nău đăm jru ăp siƀŭt rđău đă bah gưl bah lơ; pah kan nkoch trêng, đăm gĭt pháp luật mpeh bầu cử an cán bộ, tahen n’hanh ƀon lan nkual n’har bri; pah kan mât đăp mpăn rnă njrăng, rĭng grep nkual nklăch phiếu; nchrăp drăp ndơ, lĭr ntơr uĕh nkual nklăch phiếu, thŭng phiếu tơm n’hanh thŭng phiếu rhŏ dŏng an bầu cử ơm.

Đại tá Đỗ Quang Thấm, Chính uỷ Ban chỉ huy Tahen n’har bri n’gor Dak Lak rnê âk nuih n’hâm lor nchrăp, dơn kan bah gưl ủy, kruanh mât bôk ăp pôih tahen tâm nău kan nsum lhăt đah gưl ủy, n’gâng kan ta ntŭk an ƀư ăp nkô̆ nchrăp bầu cử di nău way, đăp mpăn mprang uĕh, ăp dăp; dăn đă ăp pôih n’hao dăng tay pah kan nkoch trêng gay cán bộ, tahen n’hanh ƀon lan ta ntŭk wât kloh nkô̆ hôr, nău khlay bah rơh bầu cử, nsrôih râng bầu cử ăp tŏng, di quy định. Nkre, lor nchrăp rƀah gĭt nô nău ta ntŭk, n’hao dăng pah kan mât đăp mpăn rnă njrăng, uĕh lăng, tâm n’hanh bah kơi rơh bầu cử, lơn lah ta ăp nkual nklăch phiếu.

Đah ăp pôih ƀư rơh bầu cử ơm, mpôl pah kan njrăng đă gưl ủy, kruanh mât bôk tahen ăp pôih kan nsum lhăt đah n’gâng kan ta ntŭk ƀư jăp pah kan nchrăp, đăp mpăn nkual nklăch phiếu di nău way; nchrăp ăp tŏng ăp thŭng phiếu rnă lor gay hăn bầu cử ta ăp ntŭk gŭ kâp njrăng n’har bri, nta trong dơh gay cán bộ, tahen dôl tĭng ƀư nău kan nha hôm dơi râng bầu cử ăp tŏng, đăp mpăn di quy định bah pháp luật đŏng. Đại tá Đỗ Quang Thấm an gĭt:

“Geh bar pe nkô̆ dăn đă ăp oh nô njrăng uănh, pôih ăp oh nô kan nsum tay đah ăp pôih ƀư jăp pah kan nkoch trêng tâm ƀon lan gay ăp cử tri hăn bầu cử jêng nar rgum lam ƀon lan ngăn ta nkual n’har bri. Tâl bar, nkoch trêng tâm pôih gay n’hao nău gĭt êng bah cán bộ, tahen tâm nău tĭng ƀư nău dơn kan bầu cử lor, gay hôm tĭng ƀư ăp nău kan mât rnă njrăng, rĭng grep, đăp mpăn ngăn ta nkual n’har bri tâm rơh bầu cử.”