Lĕ jêng bên, ăp ôi, yuh Kơ Să K’Hà (rnoi nuĭh K’Ho) ta thôn 4, xă Đam Rông 4, n’gor Lâm Đông dâk bah ôi ơm an ndrŭng sa. Ăp dông ndrŭng rêh nse dơi tôch bah kêng măng nar bah năp gay mât chăm rơh ndrŭng dôl sa hôm. Yuh K’Hà nkoch, ta năp đaơ, rnăk wâlyuh an rgâl tơm tăm bahta ntŭk, ndrel đahnău nkoch trêng, rgŏ jă bah cán bộ Rmôt bu ur xă, năm 2022 rnăk wâl yuh janh rgâl du gâl rnoh neh cà phê an tăm ka yâu, mât ndrŭng.  

Gâp đă đah sai lah ur sai an tăm tơm ka yâu lor, jêh nĕ râng jrô tiăr nti mât kon ndrŭng blău mât ndrŭng lah geh kon ndrŭng geh srê ri mư gĭt năl n’hanh dơh mkra. Jêh rnôk geh ơm tâm mỉ ndrŭng, ur sai oh njrăng knng an 2 lạng n’gul ntil ndrŭng dơm. Rơh rlong lor nĕ, ur sai mât ndrŭng n’hanh dơi geh 20 kilogam, bah nĕ ur sai gâp rgâl nău geh n’hanh geh tay nău kan tăm ndrŭng brai.

Mât ndrŭng nsĭt tay nău geh âk yơn nău mâp têh yor ndrŭng dơh geh đah ntŭk ntô. Ndrung geh ntưp bu tuh ƀư khĭt âk, khuch mô uĕh bah trôk nar, khih ndơ sa yor rmeh dak si tu ndrŭng, n’hanh mâp đah uĕh kon ntil. Đah rnăk wâl yuh Kơ Să K’Hà mô dơi dêr; rnôk lĕ 4 rơh mât mô jêng, ndrŭng khĭt âk, an jăng lơi. Lĕ geh rnôk yuh ŭch ntlơi.

Yơn đah nuih n’hâm dŭt n’hâm ƀư tĭng nău ntrŭnh rgâl mrô dăp rgâl tơm tăm, rnăk wâl yuh Kơ Să K’Hà ntuh kơl hun hao tay tăm tơm ka yâu mât ndrŭng. Rơh tăch geh 7 rkeh, geh rơh tăch geh rlău 10 rkeh. Năm 2025, geh prăk bah ndrŭng mât bah rnăk wâl yuh geh rlău 50 rkeh prăk jêh lĕ nkŭp prăk dŏng.

Ntrong ƀư bah yuh Kơ Să K’Hà mô knŭng nsĭt tay săk rnglăy wăng sa an rnăk wâl, ma hôm geh soan rêng hvi nsum mpôl, rgop nâp nâl nsing nơm bah mpôl bu ur tâm nău ntrŭnh rgâl mrô nkra njêng bah ƀon lan. Yuh Kơ Să K’Bích-Chi hội trưởng chi hội bu ur thôn 4-aƀaơ lah Tổ trưởng Tổ liên kết tăm ndrŭng brai xă Đam Rông 4 an gĭt, aƀaơ geh bơi 30 nuĭh, tâm nĕ 20 nuoh mât nkra njêng ƀa ƀơ. Tă bah nĕ, ăp hội viên mô kanŭng nkoch nău blău ơm mât ndrŭng brai, ma hôm n’hao nuih n’hâm tâm rnglăp, tâm kơl ndrel tâm nău rêh. 

Ntrong ƀư aơ dơi ndâk njêng đah nău ŭch tâm rgop, tâm pă nău blău ơm mât ndrŭng n’hanh tâm kơl ndrel. Ntĭt nsa kơt rnôk mô tŏng n’ha ndrŭng mô lah mô tŏng dông, ri oh yuh an tâm manh. Nău rwăt ndrŭng yor tĭng rnăk nchrăp lor, kơt rwăt bah Công ty Duy Phương mô lah ăp ntyŭk kan êng, Rmôt tâm rgop mô nking n’gang.

 Tâm rnôk pah kan, gay n’hao nău boăt nthoi đah ăp nuĭh, Rmôt tâm rgop tăm ka yâu mât ndrŭng xă Đam Rông 4 lĕ ƀư ăp rmôt Zalô, Facebook gay nkoch nău mbơh, tâm rgâl n’hanh nti ôp nău blău ơm mât chăm, tăch ndơ. Tă bah ntrong ƀư aơ, oh yuh mô knŭng geh tay prăk ma hôm dơi n’hao nău wât mpeh rgâl ntil tơm tăm, mpa rong, tĭng njuăt pơk hvi n’hanh rgâl nău mĭn tâm nkra njêng. Yuh Kơ Să K’Bích an gĭt tay:

Tâm rnôk nkoch trêng rgâl tơm tăm, Rmôt bu ur tâm rgop nkoch trêng jŭt jă ăp nău rlŭk mâl. Yơn lah, nău aơ an geh mông nar. Mpŏng tâm năm tât, nău wât bah oh yuh mbra dơi hao, ăp nău rlŭk mâl tâm tuch tăm n’hanh nău rêh ƀư nking n’gang hun hao mbra mbrơi dơi jŭt jăng. Rnôk nău mĭn rgâl ri nău rêh mbra nar lơ uĕh lơn, dơh ŏk r’ah lơn.

Ntoh măt bah Rmôt tâm rgop, săk gâp nsrôih ƀư leo lor tâm nău tăm ka yâu, mât ndrŭng gay leo oh yuh ndrel tâm rnglăp, pơk hvi n’hanh hun hao ntrong ƀư. Gâp mpŏng nar lơ geh âk oh yuh râng gay geh tay prăk, rgâl nău rêh rnăk wâl.