Ta du ngih nkret njêng ndơ lŏ mir ta phường Buôn Ma Thuột, ăp play sầu riêng dŭm êr dơi ndơ̆ an pâr ranh-công nghệ kơl mât tŏng ƀô kah, săk uĕh n’hanh ngi geh êng. Bah ntil play rih tĭng yan, sầu riêng aƀaơ lĕ jêng ndơ nkret njêng jru, ntoh tâm ăp hộp ndơ tâm an khlay. Wa Nguyễn Thị Hường, Giám đốc Công Ty Cổ phần Nông sản N&H ta Buôn Ma Thuột an gĭt:

Sầu riêng pâr dơi tâm di ăp rnoh an ƀư mât nâm ơm ƀô kah, rup gui; rnoh an ƀư 5 mô: mô sĭk, mô dak si mât prăp, mô dak si ăp ntil, mô ntô duh n’hanh mô dŏng dak ngi. Nuĭh dŏng bah Dak Lak mpŏng ŭch geh âk ndơ ma geh kah bah Dak Lak tât ăp nuĭh gŭ ntŭk êng, n’gor êng, ntĭt mpơl êng bah Dak Lak nĕ lah sầu riêng pâr n’hanh khân pơng lĕ njuăl ăp ndơ tâm an tâm rơh Tết năm aơ.

Bah meng play pâr, grăp mắc ca-dơi moh lah “bu ur uĕh bah ăp ntil grăp”-dôl rgop măt âk lơn tâm ăp dông ƀănh mứt bôk năm. Bah pâr đêt gay mât ngi lăi, tât pâr ŭnh long an ƀô kah ntĭt mpơl êng, mắc ca Dak Lak mbrơi jêng săch bên bah âk ntŭk tâm ăp nar Tết. Wa Phạm Trần Tú Anh, ntoh măt du ntŭk nkra njêng mắc ca pâr ŭnh long ta xă Krông Năng, n’gor Dak Lak nkoch:

Mpôl hên dŭt răm rnôk saơ dơn bah nơm ntoh ta nsưng trà nar năm mhe bah âk rnăk. Mắc ca mô knŭng lah ndơ sa kah ma hôm geh trong dŏng rƀŏng tât săk soan, nău mhe n’hanh uănh khlay ndơ lŏ mir ƀon tơm.

 Rơh Tết mhe rlău, rnoh khlay bah ăp ndơ OCOP bah Dak Lak lơ dơi saơ na nê̆. Mô hôm êng lah ndơ an, ăp ndơ ƀon lan jêng ntung nthoi nkah gĭt ƀô kah ƀon tơm, jêng uĕh êng an ntŭk rgum rƀŭn bôk năm. Ta nsưng trà nar năm mhe, bah meng ƀănh mứt cha, mứt rpŭng way ơm, nău ntoh bah mắc ca, sầu riêng pâr, cà phê wâr mô lah trà dak si jêng nău lăp nsum đah ơm n’hanh mhe, đah nău way ơm n’hanh mhe. Yuh Nguyễn Minh Anh, du hê phường Buôn Ma Thuột, n’gor Dak Lak nkoch:

Ăp rơh Tết năm mhe tât, rnăk wâl gâp way mpơl tay ăp ndơ ntĭt mpơl bah Dak Lak tâm mang ƀănh mứt. Năch tât pâl dŭt ŭch sầu riêng pâr mô lah grăp mắc ca. Nkre kah, nkre lăp mbung, lŏ saơ nău khlay ndơ lŏ mir ƀon lan.

Nău ntoh bah ndơ OCOP-ndơ ntĭt mpơl bah ăp nkual ƀon tơm ăp nar Tết, mô knŭng lah nău dŏng, ma hôm lah du njoat hăn khlay tâm trong n’hao khlay. Đah năm mhe bri têh, ƀô cà phê, mắc ca, sầu riêng pâr lăp ndrel đah sial, jêng nău kah ntĭt mpơl êng bah Dak Lak. Ăp ndơ OCOP dôl njuăl nău ntô̆ n’hao mpeh nău uĕh văn hóa n’hanh nsrôih rgâl mhe bah nuĭh ƀon lan ta ntŭk. “Hêng ƀô yan puh” bah lŏ mir Dak Lak dôl rêng răm m’ak tĭng ăp jay, tĭng nău nkoch rgum rƀŭn bôk năm mhe.