Nar dŭt pơh, ra xă Ea Kly, n’gor Đắk Lắk, n’gŭr răm mông nar nchrăp săch. Bah ôi ơm tât măng la, cán bộ ăp thôn lĕ tâm pă jêng âk rmôt jêt, rêng hăn ăp ƀon lan, nkual ƀon lan gŭ, “hăn tĭng trong, gŏ tĭng jay” gay phăt phiếu cử tri n’hanh nkoch trêng, rgŏ jă ƀon lan râng săch đại biểu Quốc hội khóa 16 n’hanh HĐND ăp gưl năm kan 2026-2031. Ta thôn Chợ, xă lĕ ndâk ƀư 7 rmôt pah kan na nê̆ tât tĭng rnăk ƀon lan phăt phiếu săch cử  tri. Nô Nông Ngọc Thắng, nuĭh rmôt rnă njrăng thôn Chợ, an gĭt, thôn geh bơi 1.400 nuĭh ƀon lan. Tât aƀaơ phiếu cử tri lĕ dơi ndơ̆ tât ty nuĭh ƀon lan.

Aơ lah gâp phăt phiếu an kônh wa, hôm hăn ta “ntŭk săch) ri geh âk rmôt ntĭm an kônh wa mpeh trong treh mô lah mô treh an tâm di. Tât moh jay lah kônh wa tâm rgop jay nĕ yor aơ lah nău dơi bah khân pơng.

Nău phăt phiếu cử tri tât tĭng rnăk dơi ƀư rĭng, ndăn ta lĕ rngôch ăp xă, phường ta lam n’gor Đắk Lắk. Mô knŭng êng lah ndơ̆ phiếu tât ty nuĭh ƀon lan, cán bộ ta ntŭk hôm tâm rgop nkoch trêng, rblang, ntĭm nuĭh ƀon lan mĭn joi gĭt nău mbơh mpeh ăp nuĭh dơi săch, gĭt kloh nău dơi n’hanh lĕ đah nău kan bah nơm ta năp nar săch. Tă bah nĕ, kơl nău mbơh mpeh săch ntơm rêng hvi, rgop n’hao nău wât n’hanh nuih n’hâm lĕ đah nău kan bah nuĭh ƀon lan đah nar rgum têh bah neh dak. Wa Nguyễn Doãn Kiều, tổ dân phố 6A, phường Thành Nhất, n’gor Đắk Lắk nkoch:

Gâp lĕ dơi nkoch trêng ta tổ dân phố, jêh nĕ ăp trong mbơh nu nău, đê̆ đŏng lah Ủy ban Mặt trận Tổ quốc lĕ nkoch trêng tât lôch tât dŭt n’hanh gâp dŭt rhơn. N’hanh gâp nchrăp hăn ƀư nău kan n’hanh nkre rgŏ jă ăp nuĭh râng săch rơh aơ.

Ta Đắk Lắk, bah meng nkoch trêng tât na nê̆, âk ntŭk pơk hvi trong mbơh nău an nuĭh ƀon lan dơh gĭt tât lơn. Rlău ma rƀŭn ƀon lan, loa ntuh pơl nău ngơi, pano, ăp ntŭk hôm kơt dŏng công nghệ mrô, mạng xã hội, nkoch mbơh na nê̆ gay mbơh nkoch nău rêh pah kan n’hanh bôk nău kan bah nuĭh dơi săch. Trong ƀư aơ kơl nuĭh ƀon lan ngăch, uănh gĭt nu nău, uănh săch đại biểu tâm di. Wa Đặng Gia Duẩn, Bí thư Đảng ủy, Kruanh HĐND phường Ea Kao, n’gor Đắk Lắk an gĭt:

Mpôl hên ƀư dŭt âk ăp trong nkoch trêng êng êng, bah nkoch trêng way ơm tât mhe hăn ndrel đah rgâl mrô. Mpôl hên hăn trong tâm kơt dŏng công nghệ mrô tâm nău nkoch trêng mpeh săk nău rêh pah kan bah ăp đại biểu.

Tâm ban đah nău kan nkoch trêng ta ntŭk, ăp trong nkoch mbơh i mbung dơi mbơh ƀư rĭng ta lam n’gor. Âk trong hăn, nkual ƀon lan gŭ ta Đắk Lắk lĕ ang ntơr pano, băng rôn, áp phích ntrŭt nsôr an rơh săch, jêng mông nar n’gŭr răm rƀŏng tât nar rgum bah lam ƀon lan. Tĭng wa Trần Hồng Tiến, Giám đốc N’gâng kan Văn hóa, Thể thao n’hanh Pâl nđaih n’gor Đắk Lắk, ăp ndơ nkoch trêng dơi ƀư rĭng bah n’gor tât bah dâng, rgop ndơ̆ nău mbơh săch tât êp lơn đah nuĭh ƀon lan.

Mpôl hên lĕ ndâk ƀư ăp ndơ nkoch trêng kơt ăp video clip, jêh nĕ ăp nău mhe mbơh nkoch trêng tât bah dâng, jêh nĕ tâm rgop đah ăp trong mbơh ta mạng xã hội gay n’hao trong kan nkoch trêng lor, tâm n’hanh jêh rơh săch.

Rlău 2,4 rkeh nuĭh ƀon lan ta n’gor Đắk Lắk dôl gơih nđơr nar săch. Nău lăp ndrel bah lĕ trong chính trị n’hanh âk trong nkoch trêng ngăch lĕ rgop ndơ̆ nu nău săch tât êp đah nuĭh ƀon lan, jêng nău nsing nơm n’hanh nchrăp râng nar rgum têh bah lam nuĭh ƀon lan./.