Lôch geh uănh nđôi nău ngăn ta ga Đồng Đăng, Lạng Sơn, Tổng Bí thư Tô Lâm lah na nê̆, nău tâm kơl kan Việt Nam- Trung Quốc ta trong loih lah nău ŭch n’hanh nău nkhêp, lah geh ƀư ueh, mât kan di, rĭ aơ mbra lah ngoăy tâm âk ntŭk kan na nê̆, ngăn ngên, săk rnglăy đah 2 dak tâm âk năm let năp tay.

Tâm let năp tay, gay ma mbơh ƀư an geh săk rnglăy nău ntuh kơl ƀư ăp trong loih, Tổng Bí thư an lah, an geh rklaih nău rgum prăk, rdâk njêng nău kan rgum prăk âk ding n’hanh nâp nâl, tâm rgop đah rnoh kan êng êng. Nkah mbơh mpeh nău mbra jêng ƀwu tơm ndơ̆ drăp ndơ kan êng dơm. Tổng Bí thư đă hun hao ăp trong loih an geh hăn ndrel đah nău nchrăp ƀư ăp nkual công nghiệp, nkuăl ƀon têh, ntŭk kan Logistics n’hanh ntŭk ƀư drăp ndơ tâm ăp nău wăng sa bah meng, gay ma njêng ăp rnoh khlăy mhe n’hanh n’hao nău khlăy hun hao tâm dak nơm.