Mô sŏk prăk lăp mpông pêr, knŭng geh ntŭk ntô bah lŭ n’hanh lŭ, ăp nuĭh rnôk tât mbŭch Lŭ blu mbra hăn rlău ƀon bah lŭ moh săk Phú Hạnh. Dăch aơ ƀon ntoh lư tâm mạng n’hanh wăch rgum âk năch pâl nđaih dăch ngai tât đah ƀon gay uănh ăp ntŭk bah lŭ. Ntŭk aơ mô knŭng dŏng lŭ neh uĕh ơm, ma hôm mât ndrăy âk têl jâng kăl e. nău mha lah ta ƀon aơ mô e mât ăp ntu dak lŭ yău hôm e nđik njŭng. Nuĭh mĭn njêng lịch sử văn hóa Nguyễn Danh Hạnh rnôk hăn uănh mpeh ăp drăp ndơ lŭ yău bah ƀon Phú Hạnh uănh lah mpeh ăp ntu dak lŭ yău:

Jêh hăn uănh mpôl hên saơ ăp ntu dak aơ lĕ geh nklăp 200 năm. Gâp mĭn lah nău nĕ an mât ndrăy gay bah kơi aơ mô knŭng ăp nuĭh he mĭn joi tay mpeh rnôk kăl e bah u che ma hôm rhŏ an hun hao mpeh pâl nđaih.

Ta pĭt ntu dak lŭ, ƀon Phú Hạnh hôm wăch rgum ăp trong hăn lŭ yău njok tĭng ăp ntrong tơm duối têh rhiăng năm jêng ăp trong hăn uĕh ngăn tĭng năm khay. Ndrel đah nĕ lah ăp mpêr n’gar dơi dăp đah lŭ dơi tăm ăp ntil nkao, nkao sống đời, xương rồng... ăp ntil tơm tâm ŭch đah trôk nar mha êng. Sĭt Phú Hạnh, âk nuĭh ndrăt rnôk măt saơ ăp jay dơi dăp đah lŭ, ăp ndrung nong mpa rong dơi ƀư bah lŭ da dê n’hanh n’ăp jay môch lŭ. Lĕ rngôch lăp ndrel jêng ntŭk ntô bah ƀon drăp ndơ lŭ yău.

Ta ƀon Phú Hạnh geh du trong lŭ yău geh tât ăp ntrong tơm duối yău chông prêh dêh dơi kuăl lah yôk Cổ Thạch. Bah bôk yôk aơ măt uănh mpeh dak lêng dơi uănh lĕ Hòn Yến, vịnh Xuân Đài n’hanh ndrĭch kơh dak lêng yôk Cổ Thạch tâm măt uănh. Năch pâl nđaih tât ta aơ lĕ geh an he ƀư ngăn jêr chuêl. Kơt âk năch rơh bôk năp tât ƀon lŭ Phú Hạnh n’hanh hao yôk Cổ Thạch, nô Nguyễn Chí Tường, năch tât bah n’gor Đồng Nai, ŭch ngăn:

Yôk Cổ Thạch dŭt uĕh, yôk yău kơt Châu Âu, oh ŭch đah mbôr lŭ dơi bu dăp jêng tĭng dăp ƀư oh saơ ŭch ngăn, oh saơ hao ta aơ dŭt tâm di.

Rlet rlău âk năm khay mih duh, ăp ndơ ƀư lŭ ta ƀon Phú Hạnh hôm e mro đah năm khay, geh nău uĕh êng an ƀon. Wa Nguyễn Lâu, thôn Phú Hạnh, xă Tuy Anh Đông, n’gor Dak Lak dŭt ntô̆ n’hao mpeh drăp ndơ hôm e mât ndrăy ta ƀon nơm n’hanh aƀaơ wa dôl rhŏ an năch pâl nđaih uănh nsong ntŭk aơ.

Năch tât ta aơ way kuăl gâp ntĭm hao yôk cổ thạch, khân pơng ôp gâp lŭ aơ moh ndơ, ri gâp nkoch aơ lah lŭ yău, kăl e bu dăp mô geh xi măng ma hôm e nâp lĕ rngôch. Bah rnôk nĕ rup gui an tât aƀaơ hôm e kơt nĕ.

Dŭt âk ntŭk tâm ƀon Phú Hạnh aƀaơ hôm mât ndrăy ăp ndơ lŭ hăn ndrel đah nău rêh nuĭh ƀon lan. Aơ mô knŭng lah du ntŭk mât ndrăy lŭ geh ơm đah âk ndơ rhiăng năm ma hôm lah rup ndah geh ơm uĕh ngăn, răm m’ak kơl năch pâl nđaih boăt nthoi đah lịch sử n’hanh nău uĕh ơm geh bah nkual neh-nkual neh bah ăp drăp ndơ yău./.