Tât ntŭk rhŏ nău hành chính nsum xă Nhân Cơ, n’gor Lâm Đồng ăp nar aơ, nuĭh ƀon lan mbơh nău ŭch đah ntŭk pah kan kloh uĕh, tĭng rjăp nău rhŏ khoa. Nău dŏng măy pet mrô luh êng kơl tĭng rep đăp mpăn, tâm ban, mô hôm nău tâm pit, kâp jŏ. Ƀư samƀŭt mbơh deh an kon, nô Trần Đình Khương, xă Nhân Cơ nkoch:

Gâp nar aư tât ta aơ ƀư saơ ntŭk ntô ta aơ dŭt kloh uĕh, măy mŏk ri mhe, nău kan ri mkra dŭt ngăch.

Tâm ban ma nĕ, ta xă Quảng Tín, knơm ntuh kơl rĭng ndoh ndơ, du khay ntŭk kan wơt dơn nklăp 600 samƀŭt rhăch nău, 100% ƀư trực tuyến, mkra di nar tât 99%. Tĭng wa Lưu Văn Gia, Giám đốc Ntŭk kan rhŏ an hành chính nsum xă Quảng Tín, bah khay 2 năm aơ, xă lĕ nchrăp lor tâm pă prăk nkra lĕ rngôch ndoh ndơ, năp rwăt, tă bah nĕ tâm di uĕh nău ŭch mkra samƀŭt hành chính an nuĭh ƀon lan.

Xă lĕ ntuh kơl nkra mhe, pơk hvi ntŭk pah kan, năp rwăt tay măy mŏk pit mrô, măy uănh joi nu nău, măy tính, măy in, măy nchih n’hanh nkra trong internet.

Hôm ta xă Kiến Đức, nău wơt dơn, mkra samƀŭt rhăch nău ta ntŭk mạng nar lơ dơh knơm ndoh ndơ mrô dơi hao. Tĭng wa Phạm Xuân Anh, Groi Giám đốc Ntŭk rhŏ an hành chính nsum xă Kiến Đức, ndoh ndơ măy tính, camera groi nđôi, ndoh ndơ joi samƀŭt dơi pơk dŏng rĭng, ntop kơl săk rnglăy an cán bộ, công chức ƀư tĭng nău kan.

Trong uănh joi, samƀŭt samtra n’hanh mạng dơi nkra uĕh jêng nău wơt dơn, mkra samƀŭt ƀư ngăch.

Lam n’gor Lâm Đồng aƀaơ geh 100% ngih pah kan, ntŭk kan boăt nthoi mạng, mbơh 2.310 samƀŭt hành chính. Rnoh mkra samƀŭt rhăch nău gưl xă di nar geh 98,38%, jêng “ntŭk ang” nkra rgâl hành chính.

Nău ntuh kơl rĭng, hăn ndrel ntrôl ngăch rgâl mrô dôl kơl gưl xă bah n’gor Lâm Đồng ngăn ngên jêng “ntŭk nsing” dăch ƀon lan, ngăn ngên ƀon lan, rhŏ an nuĭh ƀon lan nar lơ ngăch, kloh rah wah n’hanh săk rnglăy.