Đah rlău 5,3 rkeh nuĭh Việt dôl gŭ rêh pah kan ta dak bah dih, nar Giỗ Tổ Hùng Vương lah “rnôk khlay” gay rƀŏng sĭt tu tơm. Mât nău djăt tĭng ƀư brah Hùng Vương ta dak bah dih lah mât nău uĕh Việt, kơl kon se deh ta dak bah dih mô chuêl tu tơm bah nơm.

Bah năm 2015, Nău nchrăp ƀư Nar Quốc Tổ Việt Nam lam ntŭr neh dơi ƀư lĕ boăt nthoi nsum mpôl nuĭh Việt ta âk dak gay ndrel ƀư lễ Giỗ Tổ Hùng Vương tĭng du trong way ƀư nsum. Nar Quốc Tổ Việt Nam lam ntŭr neh lah nău ƀư văn hóa geh nkô̆ khlay ngăn, mô knŭng đah nsum mpôl nuĭh Việt Nam dôl gŭ rêh, nti, mĭn njêng n’hanh pah kan ta dak bah dih, ntrŭt ntrôl tâm boh dăch dêh đăp mpăn đah Việt Nam n’hanh băl bên lam ntŭr neh.

Tât aƀaơ, nău nchrăp ƀư lĕ boăt nthoi trực tuyến lễ Giỗ Tổ n’hanh ntô̆ n’hao kon sau Kđăch Hùng ta bơi 50 dak ta 5 nkual neh, n’hao boăt nthoi nsum mpôl nuĭh Việt ta lam ntŭr neh, nkre mpla nsơ rup ndah Việt Nam tât băl bên dak bah dih.

Tâm mông nar uĕh tam, nsum mpôl nuĭh Việt Nam ta n’gor U-đon Tha-ni, nkual Đông Bắc Thái Lan, lĕ ƀư Lễ Giỗ Tổ Hùng Vương. Wa Lương Xuân Hòa, Kruanh Rmôt nuĭh Việt Nam n’gor U-đon Tha-ni mĭn lah nău ŭch bah kônh wa gŭ dak bah dih:

Ăp năm mpôl hên ƀư kơt aơ gay kon sau nkah gĭt he geh dak mham Kđăch Hùng. Bôl deh n’hanh têh ta neh Thái, yơn dak mham Việt Nam hoch tâm play nuih, n’hanh mpôl hên hôm e du nuih n’hâm rƀŏng sĭt ƀon tơm neh ntu u che.

Mât uĕh nău khlay Giỗ Tổ Hùng Vương mô knŭng rlu tay ta nău ƀư ăp nău ôp brah têh ma hôm rnôk mât ndrăy, rong nuih n’hâm rŏng dak n’hanh nău wât tâm rnglăp tâm ăp nuĭh Việt. Aơ lah tu tơm soan dăng, lah nău uĕh gay rnoi nuĭh Việt Nam nâp nâl rgum lăp ma hôm hăn ndrel. Bôl ta ntŭk gŭ, knŭng an rƀŏng sĭt nar 10/3, hôm e ƀư brah Kđăch Hung, ri tu tơm rnoi nuĭh hôm e hoch mro, boăt nthoi nsum mpôl nuĭh Việt jêng du rkum tâm ban ŭch, nâp nâl.