- Ta nkual gôl yôk mpeh nhâp nar n’gor  khu vực miền núi phía Tây tỉnh Quảng Ngãi, ƀon lan ăp mpôl rnoi ƀư brah Giỗ Tổ Hùng Vương, mpŏng sĭt let tu tơm mpôl rnoi, geh âk bu năch tât râng. Ta meng nău tât râng uănh ăp ntŭk ntô ueh, geh gĭt nău ueh êng ăp mpôl rnoi ta ntŭk, âk bu năch lĕ geh ntêm âk mông nar tât ăp ntŭk geh way mbah ryơk ăp kađăch Hùng, kơt Đình Lương Khế ta phường Kon Tum, chuà Tháp Kỳ Quang, xã Đăk Hà, gay ma ndrel đah ƀon lan ta ntŭk mpoh su nhang mpŏng sĭt let tu tơm mpôl rnoi. Yuh Y  Kha, ta xã Đăk Mar an gĭt. “Mpôl hên tât râng tur chĭng goh gong, njroh xoang gay ma kahgĭt n’hanh ryơk nău kan têh dăng bâh yău ye kăl e lĕ geh nău kan rdâk njêng ƀon tơm, neh dak”.

-Ta Di tích lịch sử văn hóa ngih dak Đình Lạc Giao, phường Buôn Ma Thuột, N’gâng kan n’hanh nuĭh ƀon lan n’gor Dak Lak ƀư Lễ Giỗ Tổ Hùng Vương gay nkah gĭt ăp Kđăch Hùng lĕ geh soan ndâk njêng neh dak. Nar ƀư tâm mông nar ntơr uĕh đah ntơm gŏ gâr, tŭr chĭng tĭng nău nsơr way ơm; mpoh nhang, an ndơ bah nuĭh ƀon lan ta n’gor Dak Lak; ƀư mbơh soan, răk samƀŭt nkah gĭt tay lịch sử têh dăng bah rnoi nuĭh. Ta aơ hôm ƀư ăp nău ƀư nchih thư pháp, nkoch ndơ sông sa ƀon lan, ƀư mprơ chèo, quan họ, tâm nđŭr câu lạc bộ đàn tính, mprơ then... n’hanh mpla ăp ndơ OCOP bah n’gor Dak Lak.

- Ta ntŭk mbah ryơk Âu Lạc ta nklang yôk Phượng Hoàng ta nkual pâl nđaih yôk Prenn Đà Lạt, n’gor Lâm Đồng ntoh n’gôr ƀư brah Giỗ Tổ Hùng Vương, geh âk bu năch n’hanh ƀon lan tât râng. Lôch geh nău way vơt ndơ huêng khlăy, mbah ryơk yău ye neh dak n’hanh ƀư brah way ơm, nuĭh leo kan n’hanh ƀon lan Lâm Đồng ndrel đah âk bu năch pâl nđaih lĕ geh an su nhang kahgĭt yău ye neh dak. Ta aơ hôm nha geh âk nău kan ntoh lư kơt ƀư nghệ thuật way ơm, ăp nău pâl rlưn kơt cờ tướng, hao jrŏng ngi, mbang glah uk, rơh tăch ndơ sông sa, ntŭk mbơh tơih ntŭk ngêt trà Việt Nam, thư pháp n’hanh pla n’hơ rup...mpơl tay ăp nău ueh êng văn hoá way ơm ntoh lư.

-Ta đền thờ Kđăch Hùng ntŭk nkual n’har bri Tuy Đức, n’gor Lâm Đồng, kônh wa ăp rnoi nuĭh ƀư lễ Giỗ Tổ Hùng Vương. Đền thờ yor kônh wa ƀon tơm Phú Thọ ndâk njêng bah năm 2018 tâm nkual neh rlău 2.100m2. Aƀaơ lĕ jêng ntŭk ƀư âk nău rƀŏng sĭt tu tơm, mât ndrăy n’hanh ƀư uĕh nău way ơm, rgop nâp nâl tâm rnglăp rnoi nuĭh ta n’har bri. Wa Chử Anh Chường, nuĭh Ban tự quản đền thờ Kđăch Hùng ta Tuy Đức, an gĭt: "Lĕ rngôch ăp nuĭh rƀŏng sĭt tu tơm, nău wât bah kônh wa he lah “Bôl nuĭh ntŭk hăn, nkah gĭt nar giỗ Tổ nar 10/3 ri sĭt”. Kônh wa ăp nuĭh way lah kơt nĕ".

- Nar aơ, ƀon lan ƀon tơm Phú Thọ dôl gŭ rêh ta ăp xã mpeh nhâp nar n’gor Gia Lai lĕ rgum sĭt ta ntŭk mbah ryơk kađăch Hùng ta phường Pleiku, mbah ryơk mpoh su nhang. Ta aơ, nkah tay tu tơm ơm yău, ƀon lan tâm nkah ƀư tĭng ueh nău ntrŭnh, nău kơl kan bâh Đảng, ngih dak n’hanh rgum rdâk njêng rnăk vâl wăng sa, rdâk njêng  nău rêh ueh ta nkual ƀon lan gŭ. Wa Đỗ Xuân Thu, rnâng kan tâm ôp nău Hội đồng hương Vĩnh Phú ta n’gor Gia Lai an gĭt. “Ăp năm mpôl hên geh ƀư brah gay ma kahgĭt tât ăp kađăch Hùng, kađăch bâh lĕ mpôl rnoi Việt Nam. Mpôl hên ryơk n’hao mpư lah kon neh yău, dŭt rhơn ngăn”.