Đah lir lar dak, ndru dak lêng Phú Quý (n’gor Lâm Đồng) aƀaơ kơt du lŭ mblar. Luh nău rêh ndĭn ndăn, luh rwê Hà Nội, yuh Ngô Thị Hồng Ánh joi tât đah duh, sial n’hanh nău ngăn ngên bah kon nuĭh ndru dak lêng ta Phú Quý. Aơ mô di rơh bôk năp yuh tât jâng gôl dak uĕh aơ, yơn nău ŭch bah neh, nău rŏng bah nuĭh ntŭk Đặc khu Phú Quý hôm ƀư yuh kơt mâp tay du hê nuĭh băl ơm. Ăp nar hăn ngăn ta nklang dak lêng pŭt lah ăp nar yuh Ánh dơi lăp săk tâm nău ngăn n’hanh nău uĕh bah gôl dak.

Gâp saơ hăn pâl nđaih Phú Quý nsĭt tay ăp nău hăn ngăn dŭt uĕh. Nŭih ƀon lan ta aơ dŭt uănh khlay mât njrăng ntŭk ntô gŭ âm, ăp nuĭh dŭt rah rơch đah năch. Rnoh khlay ndơ ta Phú Quý dŭt tâm di lĕ rngôch mô geh nău rgâl. Ăp nău hăn ngăn đah Phú Quý tă bah năp tât aƀaơ rơh aơ nsĭt tay âk nău răm dŭt uĕh.

Jêh nglăp nsum, n’gor Lâm Đồng mhe đah ntŭk ntô geh n’ăp Dak Nông n’hanh Bình Thuận ơm lĕ pơk luh mpŏng ŭch hun hao têh. Aƀaơ, năch pala nđaih dơi ƀư ngăn du nkual 3 njônh têh: Đà Lạt-rbăn nkao “Châu Âu ta n’gul nkual nđik”; Mũi Né-“lŭ mblar khlay bah pâl nđaih dak lêng Đông Nam Á” n’hanh Tà Đùng-“Vịnh Hạ Long ta yôk prêh”. Nô Lê Văn Thức, Giám đốc du công ty pâl nđaih ta Đà Lạt nkoch, aơ mbra lah trong pâl nđaih tŏng ăp, ngăn ngên uĕh bah bri yôk têh mâp dak lêng pŭt.

Gâp nsing nơm lah ntung trong năm tât mbra dơi jêh boăt nthoi bah Đà Lạt jŭr Mũi Né, bah Đà Lạt rlău Gia Nghĩa mô lah Tà Đùng jêng du njônh 3 nkual kơt nĕ ri dŭt uĕh.

Ndrel đah Lâm Đồng, nău âk bah pâl nđaih rêng hvi tât Dak Lak. Đah nkual drăp ndơ yău, ntŭk kơt nsrŭng tâm nău nteh chĭng gông lam yôk bri, nău uĕh bah kon nuĭh n’hanh ăp nău uĕh bah nkual neh aơ lĕ lăp tât play nuih bah âk năch ntŭk ngai. Rơh bôk năp tât jâng ta nkual neh chăng bazan, wa Nguyễn Văn Minh, năch pâl nđaih tât bah nkual ƀon têh Đà Nẵng dŭt ŭch đah ăp nău khlay văn hóa bah Dak Lak:

Văn hóa chĭng gông dŭt uĕh n’hanh ndrănh yăng ta aơ ri ngêt dŭt kah, dŭt uĕh. Aơ lah rơh bôk năp gâp tât hăn uănh, rmôt nuĭh kan dŭt gơih.

Nău tơm bah trong uănh năm aơ lah n’gor Gia Lai, ntŭk ndâk ƀư Năm Pâl nđaih lam dak 2026. Wa Phạm Anh Tuấn, Kruanh UBND n’gor Gia Lai an gĭt, n’gor dôl nsrôih ƀư mhe rup ndah đah trong ƀư na nao, tâm rgop uĕh đah nău têh hvi n’hanh âm nhạc lam ntŭr neh mhe. Aơ lah trong an Gia Lai rgâl mhe, ndơ̆ pâl nđaih jêng nău kan wăng sa khlay n’hanh ntăm nău moh êng “Nkual yôk prêh bri krŏng mâp dak lêng” ta rup gui pâl nđaih lam ntŭr neh.

N’gor Gia Lai ton mbra ƀư lôch uĕh năm Pâl nđaih Lam dak 2026 đah nuih n’hâm blău kan, đăp mpăn, dăch dêh, uĕh lăng gay ăp năch tât dơi saơ nău ngăn ngên, êng m’ha n’hanh dơi nkah gĭt.

Jêh nglăp nsum hành chính, ăp n’gor Tây Nguyên-Duyên hải Nam Trung bộ geh du ntŭk hun hao êng, rgum bri-dak lêng-nkual yôk prêh bri krŏng n’hanh nău uĕh văn hóa ăp rnoi nuĭh. Bah ngăn ngên nĕ, âk doanh nghiệp dôl ntơm ndâk njêng ăp ndơ pâl nđaih ăp nkual, pơk hvi ntŭk ƀư ngăn an năch pâl nđaih saơ. Wa Nguyễn Minh Trí, du doanh nghiệp joi ƀư trong pâl nđaih Dak Lak-Khánh Hòa nkoch:

Du njăr trong mbra geh tay âk ntŭk tât lơn, njăr trong nĕ geh dak lêng, nkre bri, nkre văn hóa, ndơ ngêt sa. Mbra boăt nthoi Dak Lak n’hanh Khánh Hòa jêng du ndơ tŏng ăp. Tâm 3 nar, rnôk năch tât Khánh Hòa nkre ŭm dak lêng, mbra wêh hăn bah lơ Dak Lak uănh dak leng Nghênh Phong, hăn Dak Lak hăn uănh văn hóa, dak diăng, bri, n’glău, dak leng.

“Bri krŏng yôk têh mâp dak lêng pŭt” mô knŭng lah nău boăt nthoi mpeh neh ntu, ma hôm nglăp ndrel bah drăp ndơ yău n’hanh saơ nău răm. Rnôk nuĭh ƀon lan gĭt uănh khlay san hô, rnôk n’gâng kan ƀon lan ton nău ngăn n’hanh nău blău, nĕ lah rnôk năch pâl nđaih ngăn ngên jêng nău kan wăng sa khlay, nâp nâl, ƀư lư du Việt Nam têh dăng n’hanh âk nău uĕh.