Di rơh Giỗ Tổ Hùng Vương, nar rlu 30/4-1/5 n’hanh khay rlu nti năm 2026, rnoh năch hăn mpôl n’hanh năch rnăk vâl tât ta Lâm Đồng mbra hao ngăch. Gay ma vơt năch rơh aơ, rlău ma ăp bôk nău kan n’hao vơt năch, âk ntŭk gŭ rlu n’hanh ntŭk pâl rlưn ueh n’hao nău kan vơt năch, mât đăp mpăn ueh kơl năch ta rơh aơ. Wa Nguyễn Thị Mai, nuĭh kơl kan an Tổng giám đốc Muine Bay Resort (Phan Thiết) an gĭt, ntŭk kan lĕ geh mbơh tơih âk bôk nău kan mhe.

 Băng: Dak lêng dôl ntơm ta yan dŭt ueh ngăn. Ta Hòn Lao, năch mbra dơi geh gĭt nău pâl rlưn nd n’hông têk prit hăn let gôl dak gay ma nhâp uănh san hô lah vak SUP. Ta aơ geh sĭm, klang kok mpăr ƀư rsoăn jêng bu năch mbra geh saơ nău ueh, nkre lah gĭt rlong nhâp ta dak lêng ndrel đah ka n’hanh uănh tơm san hô”.

Wa Đinh Ngọc Khánh Vy, ntŭk kan tăch rgâl TTC World- Thung lũng tình yêu ta Đà Lạt mbơh nău, bâh bôk năm 2026, ntŭk kan lĕ geh ndơ̆ lăp dŏng sŏk 2 ntil ntŭk pâl mhe lah rhung pih n’hanh rhung phao kro. Ăp ntil ndơ aơ tâm rgop ndrel đah ntung bil Ngàn Thông nthoi let yôk Mộng Mơ n’hanh Thung lũng Tình yêu, nsĭt tay nău pâl rlưn mhe ueh ngăn an bu năch tât. "Ta rơh nar rlu 30/4 n’hanh 1/5, mpôl hên knơm mbra geh vơt klâp ma 25 rbăn năch, nchrăp mbra hao 123% đah khay aơ năm e. Mpôl hên knơm tâm rơh rlu tay mbra geh mbơh tay rnoh ntil ndơ pâl rlưn êng an bu năch mom rnăk vâl n’hanh oh kon se”.

N’gâng kan pâl nđaih Lâm Đồng dôl ntrôl dăng tour pâl trong neh n’hanh tour tâm rgop ta nkual tâm rnôk tach ndeh păr Liên Khương ntâl mpông gay ma nkra mhe. Ndrel đah nĕ, n’gor n’hao nău mbơh tơih ta n’gâng kan rnoh mbrô n’hanh rdâk njêng rup ueh pâl nđaih gay ma an ueh nău geh gĭt nău mhe an bu năch.

Tĭng wa Nguyễn Văn Hùng, Groi kruanh Hiệp hội pâl nđaih n’gor Lâm Đồng, n’gor mbra geh ƀư âk nău kan têh kơt lah: Khay pâl nđaih, Festival Kao. Êng đah năch dak bah dih tât ta Đà Lạt, ăp ntŭk leo pâl nđaih mbra geh ƀư vơt bâh tach ndeh păr Cam Ranh. "Mhe nơh, ta rơh rƀŭn nchră mbơh nău bu năch tât râng bâh ăp n’gor, lĕ rngôch lĕ geh du nuih n’hâm kơl an nău pâl nđaih Lâm Đồng n’hanh nkuăl ƀon têh Đà Lạt ơm, ndơn lah hăn ngăch đah ndeh păr kơt  ntơm nơh, aƀaơ bu năch mbra dơi rlong hăn trong  têh mô lah ăp trong bri ueh nđik. Mpôl hên lĕ geh pă ăp ntŭk rlu gay ma vơt njêng nău kan ueh mhe gay ma nău pâl nđaih rlu rlău bâh năch geh ueh lơn”.

Nău leo kan aơ geh rdâk njêng bâh du ntrong kan hun hao nâp nâl. Pe khay bôk năm 2026, pâl nđaih Lâm Đồng vơt klâp ma 6 rkeh năch, hao rlău 20% đah khay aơ năm e. Ngăn lah, năch dak bah dih  geh âk lĕ ntop khlăy ta nău hun hao bâh nkual kan pâl nđaih ta ntŭk.

Dŭt nkah ngăn, lôch nglăp nsum, n’gor Lâm Đồng aƀaơ geh ntŭk ntô ueh nđik, âk ntŭk pâl, geh ntơ lah ntŭk ueh bâh pâl nđaih rgum geh yôk prêh, dak bât hvi- dak lêng nđir, gôl dak ueh, n’hao nău ŭch râng bâh năch tâm n’hanh bah dih dak. Wa Đinh Văn Tuấn, groi kruanh UBND n’gor Lâm Đồng lah na nê̆. "N’gor Lâm Đồng dŭt geh nău dơi n’hanh nău ueh êng, mbra lah ntŭk tât rlu rlău pâl rlưn mhe an bu năch tâm dak n’hanh bah dih dak. Nău tach ndeh păr Liên Khương ntâl mpông kâp nkra tay lah du nău jêr, yơn he mbra dơi rgâl nău ntul rlong aơ jêng rơh nkhêp têh. Aơ lah rơh gay ma mbơh tơih ăp trong hăn jâng mhe, nsĭt tât an bu năch ăp nău gĭt ueh mhe êng mpeh ntŭk tât têh hvi bâh Lâm Đồng".

Đah ăp nău dơi ntoh lư tâm rgop njăr trong ueh mhe bâh bri jur dak lêng, n’gâng kan pâl nđaih Lâm Đồng knơm ta du yan pâl nđaih di rơh Giỗ Tổ Hùng Vương, rơh rlu 30/4-1/5, khay rlu nti 2026 ntoh n’gôr n’hanh ueh lư.