Ôp uănh âk trong nchrăp ƀư rgum tơm, Kruanh UBND n’gor Lâm Đồng Hồ Văn Mười đă ntrôl ngăch ntrơn du, nkre êt lhăt tĭng jăp ntuh kơl, rgum nkra bah ăp kô̆ yơn “kol khan” mpeh siƀŭt, njêng suan ntrôl an hun hao.

Kruanh UBND n’gor Lâm Đồng Hồ Văn Mười mhe hăn ôp uănh, rƀah gĭt nău lư ăp ntŭk nchrăp ƀư n’hanh đă ăp nuĭh tơm ntuh kơl, nuĭh dơn ƀư ntrôl ngăch rnoh tĭng ƀư. Mpôl hăn hŏ tât khâl n’hanh pah kan đah Công ty TNHH Luyện kim Trần Hồng Quân (xã Nhân Cơ) gay rbah gĭt rnoh ngăch ƀư Nhih máy Điện phân nhôm Đắk Nông. Ntŭk nchrăp ƀư geh lĕ rngôch tơm prăk ntuh kơl bơi 18.500 rmen prăk, rnoh dăng weh ƀư 450.000 tấn nhôm/năm. Nhih máy lah rêng ƀư njêng, nkret njêng jru n’glĕ dŭt bah ăp rêng công nghiệp lơh joi bô xít – nkret njêng alumin n’hanh ƀư njêng loih nhôm. Nchrăp, tâm quý II năm aơ mbra ƀư lôch jêh ntuh kơl, n’glăp dŏng, đah rnoh ngăch dăng 150.000 tấn/năm; tât quý III/2027 geh tât bêng rnoh weh ƀư. Lôch hăn ôp uănh, Kruanh UBND n’gor Hồ Văn Mười lah rjăp aơ lah nhih máy ƀư njêng loih nhôm lor bôk năp bah Việt Nam, ân êng uănh khlay đăp mpăn nchuăt dŏng, lơn lah tơm điện, nkre đă ăp n’gâng kan ƀư nsum droh rklaih jêr jŏt an doanh nghiệp.

UBND N’gor Lâm Đồng mhe hop uănh năl di tay trong nchrăp ntuh kơl lvang năm 2026–2030 đah 24 ntŭk nchră hŏ dơi tâm ban ŭch. N’gor đă ndăn ơm ƀư lôch jêh siƀŭt, ơm dâk ƀư, ntrôl ngăch n’gluh tơm prăk; Sở Tài chính lor nchrăp tâm pă tơm prăk, ăp n’gâng kan ân ngăch đă ntrơn du. Yơn lah, n’gluh tơm prăk ntuh kơl bah Lâm Đồng dôl dŭt đêt, mô hŏ tât 4% trong nchrăp. Lĕ rngôch tơm prăk năm 2026 dơi jao bơi 15.800 rmen prăk yơn lĕ quý I mhe n’gluh geh nklăp 578 rmen prăk dơm. Nkô̆ tơm lah wăk kol đă ntrơn du, nău dơi kan bah nuĭh tơm ndranh đêt, siƀŭt jêr jŏt n’hanh nău dơn kan du đêt  nuĭh tơm ntuh kơl mô hŏ âk. Groi kruanh UBND n’gor Lâm Đồng Nguyễn Ngọc Phúc an gĭt n’gor dôl rgum droh rklaih wăk kol, lơn lah trong tâm di an ntuh kơl:

“Ân gĭt lah tâm rnôk dja he ân droh rklaih kô̆ yơn kol khan na nê̆. Lah pring xăng hao ri he rgum tâm nkra dơh glêh siƀŭt tâm di mpeh ntuh kơl lor, lôch nê lah tât ăp ntŭk I mbrơi dơi ƀư ngăch dĭl. Ntĭt kơt, djăt ma tâm ban ŭch ăp xã lah 3 ndơ ƀư n’hanh ƀư dĭl gay n’gluh tơm prăk ntuh kơl, yơn ân sơch ăp ndơ ƀư geh ring tam dĭl, n’glăp dŏng dĭl, ăp ntŭk ƀư mô kâp đă ntrơn du”.