Lôch bơi 10 khay n’glăp dŏng n’gâng kan 2 gưl, ngăn geh ta n’gor Lâm Đồng an saơ, ndrel đah tâm pă gưl kan dăng, kloh rvah n’hanh glêh tam nuĭh kan, nău ŭch n’hao tam kan, nsĭt geh nău dơi mât bôk kan dôl nar lơn ma khlay jăch ndăn. Tâm rnôk nê, ntrôl dăng rgâl mbrô mô dơn lah trong rƀŏng khlay ma hôm lah trong nkra n’gâng tơm, kơl buăt nthoi mbluh soih đah ăp gưl n’gâng kan, n’hao săk blău rhŏ dŏng nuĭh ƀon lan n’hanh doanh nghiệp, rƀŏng tât ƀư kloh rvah n’hanh geh nău tam lơn.

Phường Phú Thuỷ, n’gor Lâm Đồng dơi njêng nsing ta nău n’glăp nsum 3 phường, lah: Phú Thủy, Thanh Hải n’hanh Phú Hài mpeh n’gor Bình Thuận ơm. Ntrŏng pah kan rgâl mbrô lah nău dơn kan rgum tơm, đăt ndal, lôch n’glăp dŏng n’gâng kan 2 gưl, phường Phú Thuỷ ngăch dăp rgum ăp tŏng Rmôt kơl ngăch Công nghệ n’hanh Nău blău kơl nkra ƀư siƀŭt; njêng 23 Rmôt công nghệ nsum mpôl lah 130 nuĭh n’hanh njêng trong leo ƀư tâm kơl nti mbrô. Nô Phan Anh Tiến, Bí thư Đoàn phường Phú Thuỷ, an gĭt, ntik n’hao nuih n’hâm dâk chŏl lor, nău râng êng bah druh ndăm, rlău 4.400 đoàn viên druh ndăm bah phường mhe dâk leo lor tâm kơi năp nti, n’hao nău blău dŏng mbrô nkre ntop kơl nuĭh ƀon lan “jut bah mâl công nghệ”:

“Đoàn phường way hăn nkoch trêng, kơi năp nti rgâl mbrô an đoàn viên druh ndăm. Ăp chi đoàn hăn tĭng ƀon, goh tĭng mpông ntop kơl ăp kônh yơn lơn lah đah bu ranh n’hanh nuĭh quet nte gĭt dŏng điện thoại pet lât, pơk lăp VNeID rnoh 2. Gĭt trong nôp hồ sơ pơk sŏng dăng ta ntŭk rhŏ dŏng nsum. Rnôk ntĭm nti bu kuâng ranh mô hŏ dơi tât công nghệ ân ntĭm âk tơ̆ gay ăp kônh yơ̆ gĭt. Tâm pơh Đoàn phường đă mpôl gŭ kâp kan bah ntŭk rhŏ dŏng ƀư siƀŭt ntop kơl ƀon lan ndơ̆ siƀŭt hồ sơ”. 

Bơi 10 khay aơ ndrel đah đăp mpăn n’glăp dŏng kan, Đảng uỷ phường Phú Thuỷ, n’gor Lâm Đồng hŏ ƀư jêng ngăn ngăn rnoh tât rgâl mbrô ngăch lơn, geh nău tam lơn n’hanh dăch dêh ƀon lan lơn. Ăp trong ntĭt leo, nău kan: “Trong ndơ̆ prăk mô kâp dŏng prăk măt”, rơh an ƀư âk 60 măng nar ƀư tài khoản định danh điện tử nkre đah trong leo ƀư “Ăp du hê nuĭh – Du săk ntơ mbrô”; rơh 90 nar măng ƀư geh ndrŏng, ƀư kloh ntŭk rgum prăp nău lư mpeh neh ntu ta phường; 90 nar măng rgum mât prăp nău lư tâm gŭ ur sai; pơk lăp uănh nău lư phần mềm mbơh ntŭk rgum mât prăp nău lư njrăng n’gang ŭnh sa… rgop n’hao nău dơi tam mât uănh ngih dak n’hanh nău di nuih n’hâm bah nuĭh ƀon lan, doanh nghiệp. Wa Nguyễn Hữu Thông, Bí thư Đảng uỷ phường Phú Thuỷ, lah rjăp, Đảng uỷ phường ntrŏng rgâl mbrô n’hanh dŏng công nghệ thông tin tâm mât dŏng n’gâng kan tâm dâng lah rnoh tât kan khlay gay uănh năl nău blău rđău đă, mât bôk kan tâm ban kơt bah tĭng cán bộ đảng viên:

“Lôch jêh rgâl mbrô, dŏng công nghệ thông tin tâm mât dŏng n’gâng kan ta ntŭk bah Phú Thuỷ dŭt di ma rnê. 100% cán bộ công chức dŏng trong ƀư siƀŭt ma điện tử, nkra nău kan ta ntŭk keh mbrô. Rnoh âk nkra ƀư hồ sơ pơk sŏng dăng bah phường rlău 70%, du đêt trong kan hôm âk lơn. Tâm năm 2025 rgâl dơh glêh siƀŭt phường Phú Thuỷ dâk tâl 3 ta rlău 124 xã, phường, đặc khu. Phường tĭng kơn dŏng keh mbrô hồ sơ n’hanh rdâk njêng ntŭk mât prăp nău lư nsum, ntrôl dăng rhŏ dŏng pơk sŏng dăng nta trong dơh an nuĭh ƀon lan n’hanh doanh nghiệp”.

Năl geh ngăn ta âk xã, phường bah n’gor Lâm Đồng an saơ, rgâl mbrô dôl tĭng kơn ƀư rgâl trong mât bôk kan. Lơn lah, rnôk rnoh âk nău kan rsŭn sĭt tâm dâng âk lơn, rgâl mbrô jêng “suan ntop kơl” khlay. Nơm geh dŏng công nghệ thông tin, cán bộ, công chức gưl xã nkra nău kan ngăch, di lơn, nkre n’hao nău dơi buăt nthoi, tâm rgâl nău lư đah gưl n’gor du trong năn ngăch. Gay nuĭh ƀon lan ta nkual jru, nkual ngai, nkual jêr jŏt bah n’gor mô geh ntlơi tay bah kơi tâm rơh rgâl mbrô, rmôt cán bộ tâm dâng bah n’gor Lâm Đồng mbra pah kan jâk r’ah lơn. Wa Đặng Thiện Viên, Groi Kruanh UBND xã Liên Hương, n’gor Lâm Đồng, an gĭt:

“Ta ntŭk Liên Hương lơn âk lah ƀon lan kan lŏ mir, nuĭh ƀon lan way dŏng lha siƀŭt âk lơn. Aƀaơ cán bộ công chức bah xã rnôk nkra ƀư siƀŭt nkre ƀư ma lha siƀŭt an kônh wa nkre ntĭm nti ƀư ma keh mbrô gay tât dŏng công nghệ mbrô tĭng trong nchrăp rđău đă bah n’gor”.

Đăm jru hvi Nghị quyết mbrô 57 bah Bộ Chính trị, Nghị quyết mbrô 71, bah Chính phủ mpeh đăt ndal hun hao khoa học, công nghệ, rgâl blău ƀư mhe n’hanh rgâl mbrô gưl neh dak, n’gor Lâm Đồng dôl ntrôl dăng rgâl mbrô tĭng Đề án lvang năm 2026-2030. Tâm nê, ntrŏng ndơ dŏng mbrô n’hanh mât prăp nău lư mbrô lah jâng nsing glo tơm; rgum hun hao Ntŭk mât prăp nău lư tĭng trong rƀŏng uĕh blău mhe, ăp kôp; rdâk njêng ăp ntŭk mât prăp nău lư đăp mpăn “di, tŏng, srăch, rêh, dơn ngoăy, dŏng nsum” gay buăt nthoi, tâm pă geh nău tam đah ăp nhih pah kan….Wa Võ Thành Công, Giám đốc Sở Khoa học n’hanh Công nghệ n’gor Lâm Đồng, an gĭt:

“Sở dôl an ƀư trong nchrăp mât prăp nău lư dŏng nsum. Trong nchrăp dja geh tât 11 sở, n’gâng kan. Lôch ƀư jêh mbra jêng ntŭk rgum mât prăp nău lư lam lĕ ma n’gor, tâm nê mbra geh ăp phần mềm way n’gâng kan bah ăp n’gâng kan n’glăp ta ntŭk dŏng nsum gay rblang luh rhŏ dŏng an pah kan rđău đă, ƀĭt juet”.

Đah ăp nău nsrôih tâm rgâl mbrô, tât aƀaơ 100% siƀŭt gưl n’gor n’hanh gưl xã bah Lâm Đồng hŏ wơt dơn, nkra ƀư, mplơ̆ lôch jêh ăp kôp, dơn ngoăy ta lam n’gor. Rnoh âk keh mbrô hồ sơ, lôch jêh nkra ƀư siƀŭt bơi tât 90%. Rnoh âk dŏng tay nău lư, keh mbrô geh bơi 93%. Lâm Đồng hŏ geh rlău 14.000 chứng thư chữ ký mbrô way dŏng. Rƀŏng tât rdâk njêng n’gâng kan mbrô, wăng sa mbrô n’hanh nău rêh mbrô, n’gâng kan ta ntŭk dôl ntuh kơl tay, n’hao têh dăng ndơ dŏng mbrô, nkre ntrôl dăng ntĭm nti, kơi năp nti nău blău kan an rmôt cán bộ, công chức gay n’hao dăng lơn đŏng săk tam rhŏ dŏng an nuĭh ƀon lan, doanh nghiệp./.