Nklang khay wai kro phang Tây Nguyên, rnôk mir ba dôl êt rdâng tâm kroh khar, trôk nar kro đang, ta buôn Ky, phường Thành Nhất, n’gor Đắk Lắk, kônh wa nuĭh Rđe ƀư nău way ôp brah mih. Nkre njuăl nău ŭch rŏng mpŏng geh mih lăng prăng uĕh, nău way lah rnôk gay ƀon lan tâm dêh rŏng nsum tâm rnglăp n’hanh mât ndray ăp rnoh khlay văn hóa way ơm. PV H Xíu nchih nkoch ăp nău uĕh êng bah nău way ôp brah ta aơ, jă kônh wa n’hanh băl mpôl djăt ndrel.

Ta nâm n’hâm tơm si bah năp jâng gung jay rgum ƀon buôn Ky, phường Thành Nhất, n’gor Dak Lak, nău nteh ndrău wai rsĭk n’gôr. Bah ơm ôi, nuĭh tâm ƀon hŏ wăch mpưm gay nchrăp ndơ ôp brah mih. Nuĭh ndrăp ndơ ôp răch, nuĭh kuaih uĕh tay ntŭk neh soih, nuĭh chraih uĕh tay chĭng gong, ndăch rvăch. Nô Y Zoang H Đơk, nuĭh ta buôn Ky an gĭt, bah năp nê bar pe nar, ăp bu ranh n’hanh druh ndăm hŏ ơm nchrăp ndơ ndrel rdâk chuanh n’hanh ƀư ăp ntŭk rhŏ dŏng an ôp răch:

“Râng nar ôp brah tă bah ƀon he ƀư, lĕ rngôch ăp nuĭh hŏ nsum ti, ndrel kơl an ăp nău kan gay lôch jêh nar ƀư ôp brah”.

Tât mông uĕh nar lăng, nău nchrăp hŏ lôch jêh, kônh wa tâm ndơ nsoh way ơm, njôm wăr bah năp jâng gung jay rgum ƀon. Nău nteh chĭng gong n’gloh lam, nău way ôp brah mih hŏ ntơm ngăn. Nău ôp brah mih ƀư bar gâl: ôp dăn mih n’hanh răch dăn ngăch dăng n’hâm suan an ƀon lan. Nuĭh tơm răch ƀư ăp nău way ơm, njuăl nău mbah dăn tât huêng brah, dăn an mih tŭp jŭr, mbo ba nđĭr uĕh.

Bu ranh ƀon Y Bang Byă, nuĭh dơi ôp dăn n’hâm suan ngăch lăng an gĭt, răch dăn n’hâm suan ngăch lăng mô dơi lah mô geh tâm nău way bah nuĭh Rđe, dăn an nuĭh dơi mpih n’hanh ăp nuĭh râng geh n’hâm suan ngăch dăng, geh âk nău lap n’hanh đăp mpăn.

“Nar aơ lah nar ôp răch dăn mih, lah nar mpih n’hâm suan an bu ranh ƀon. Nê lah nău lap an săk gâp nơm, mpŏng n’hâm suan ngăch dăng lăng soih gay năm bah kơi tay ƀư ôp răch uĕh lơn đŏng nău way săk tơm rnoi nuĭh he nơm, rhŏ dŏng an kônh wa”.

Lôch ôp răch, ăp nău rdâk tay nău kan dơi ƀư, bah tăm ba tât nchron pănh. Rup gui “tŭp mih” dơi njêng ƀư tâm nar kơt du nău njuăl nău ŭch rŏng mpŏng geh an khay tuch tăm mhe mih lăng prăng uĕh, mbo ba nđĭr jêng.

Nău way ôp brah mih mpôch tay, gâl ngêt sa  pâl rlưn nthoi tay khuh n’gôr nsum mpôl lam ƀon. Yuh H Zê Na Byă, nuĭh tâm ƀon mpơl nău:

“Nar aơ lah nar dŭt rhơn mƀak mha êng. Tâm mông nar dŭt khuh n’gôr đah ăp păk jâng ti njroh mprơ, đah ăp nău nteh chĭng gong rlai lăp nsum. Tâm rơh hun hao công nghệ mhe aƀaơ đah ăp ntil âm nhạc êng êng, ri nău way ơm bah nuĭh Rđe ân mât ndray an ăp rơh kơn kơt gâp n’hanh ăp rơh kơn bah kơi tay đŏng”

Tâm khuh n’gôr bah nar ôp brah mih, năch tâm dak n’hanh bah dih dak dơh rlai lăp nsum tĭng ăp râng râp ndăch rvăch, tâm râp chĭng gong n’hanh n’hŭm ƀô kah ndrui ndrănh yăng kah hâr bah ƀon lan đŏng. Nău way ôp brah mih mô hôm dơn n’glĕ ta nău way huêng khlay bah nuĭh ƀon lan tâm ƀon, ma jêng ntŭk pơk hvi ntŭk an nuĭh ƀon lan n’hanh năch nklân năl jru lơn nău rêh văn hóa bah nuĭh Rđe đŏng.

Wa Antonie, năch tât bah Pháp, nkhêp geh râng nar ôp brah mih ta buôn Ky tâm rnôk dja. Ăp nău nteh chĭng gong, gŭr ntơr ndơ nsoh way ơm n’hanh mông nar krêp dêh bah nsum mpôl ƀon lan hŏ nsĭt an păng du nar rlong uănh saơ mha êng:

“Gâp mĭn aơ lah du nău way ôp brah dŭt uĕh reh. Gâp hŏ djăt dŭt âk nău mprơ dŭt uĕh, âk nău nchreng an uănh săk ntơr, kônh wa nsoh ăp ndơ nsoh dŭt uĕh êng. Gâp mĭn nuĭh Rđe ta ntŭk dŭt uĕh. Gâp saơ dŭt gân djăng nău way ôp brah dja”

Bơi jât năm aơ, nău way ôp brah mih dơi rdâk ƀư tay n’hanh ƀư ăp năm ta buôn Ky tâm kêng dŭt khay pe mô lah khay puăn. Nklang nău rêh mhe aƀaơ, gay mât kơn mbro nău way ôp brah mih dja ân geh nău nsrôih lĕ ma ƀon n’hanh n’gâng kan ta ntŭk.

Tĭng wa Nguyễn Đình Tâm, Kruanh UBND phường Thành Nhất, rnôk ntŭk gŭ rêh văn hóa nar lơn ma huêt, nău mât ndray ăp nău way ơm bah ƀon lan nar lơn ma ân geh nău ndrel hăn, ntop kơl ăp tŏng rêng bah n’gâng kan ta ntŭk. Yor kơt nê̆, phường Thành Nhất dôl tĭng kơn ndrel kônh wa ăp ƀon rdâk njêng trong nchrăp jŏ jong gay mât mbro ăp nău way ơm, nkre buăt nthoi ăp nău kan văn hóa – pâl nđaih. Wa Nguyễn Đình Tâm an gĭt:

“Phường ntrŏng geh trong nchrăp jŏ jong gay jêh aơ tay krêp dêh, buăt nthoi đah ăp nău way ôp brah lah yang, ăp nău pâl rlưn. Ma ăp bôk nău kan, ăp ntŭk pơk uănh nău lư gay ƀư tât leh gay ntik n’hao, mât ndray n’hanh hun hao pâl nđaih ta ntŭk”.

Mpôch dŭt tay nău nteh chĭng gong n’hanh ndrănh yăng kah hâr, nău way ƀư ôp brah mih ta buôn Ky mô dơn njuăl nău ŭch rŏng mpŏng geh mih lăng prăng uĕh, ma hôm nkah sĭt mpeh tu tơm văn hóa bah nuĭh Rđe. Tâm nău rêh nar aơ, nău nteh chĭng gong ta buôn Ky mô dơn kuăl ma hôm kuăl mpeh nău nkah kăl e bah ƀon lan./.