Djăt sŏng dăng ăp nău nkoch, nău ŭch rŏng bâh âk nuĭh oh yuh oh nô pah kan, Tổng Bí thư Kruanh dak Tô Lâm mpơl nău ŭch rhơn yor geh âk nuĭh kan dŭt ueh rnê ryơk, nkoch nău ueh êng bâh nuĭh pah kan Việt Nam nar aơ, nsrôih kan, gơih kan, âk nău dơi, geh dơn kan, rêh geh nău dơn kan, gĭt tâm pêt tâm rŏng rnăk vâl, dăch bên đah băl kan ndrel, đah doanh nghiệp, đah ntŭk kan Công đoàn n’hanh đah neh dak. Tổng Bí thư, Kruanh dak lah na nê, Đảng n’hanh Ngih dak way geh uănh năl nuĭh ah kan lah mpôl kan dŭt khlăy ngăn tâm njăr trong rdâk njêng n’hanh mât  neh dak. Tâm ăp rơh kan cách mạng, nuĭh kan Việt Nam way geh tât râng ta ăp ntuk dut jêr  jŏt, ŏ r’ah ta ntuk kan, tâm ngih máy, tâm nkual công nghiệp, tâm ăp trong pah kan, mbơh kơl kan, nchoăn rdeng, công nghệ, nkret njêng, nkra ƀư. Mpang ti, bôk rngok, dak rhal n’hanh nău mĭn kan bâh yuh nô lĕ ntop ƀư jêng ăp nău dơi hun hao bâh neh dak aƀaơ. Tổng Bí thư, Kruanh dak Tô Lâm đă an geh uănh tay nău mât kơl nău rêh nuĭh kan, nuĭh pah kan lah du njăr trong nău kan khlăy  mpeh chính trị, ƀa ƀơ n’hanh jŏ jong. Nkuăl ƀon têh an geh uănh năl na nê̆ lơn nău ŭch mpeh ngih jay gŭ,  jay gŭ rlu, ngih nti , jay mât oh kon se, ngih dak si, njêng nău kan văn hoá, nkual pâl nđaih ntuk rêh jêng ăp nkual công nghiệp, nkual nkret ƀư n’hanh ăp ntŭk geh âk nuĭh pah kan gŭ rêh. Mhâm ƀư gay ma nuĭh kan mô dơn geh nău kan, ma hôm nha geh ntŭk gŭ đăp mpăn, mô dơn geh nău geh, ma hôm nha geh nău dơi ntĭm nti oh kon, mĭn kơl an mê̆ bơ̆ ta ƀon, mô dơn pah kan ma hôm nha geh rlu rlău, nti ren, pâl rlưn, n’hao nău rêh nău mĭn.