Khay bah năp, Tổng Liên đoàn Lao động Việt Nam lĕ mbơh ƀư âk trong mkra rĭng, ƀư tĭng ăp rnoh ƀư, nău rƀŏng n’gluh an tâm trong kan nchră nău bah dih, tâm bônh rmôt n’hanh lĕ dơi geh săk rnglăy na nê̆. Tât aƀaơ, rnoh tâm ban ton pah kan rmôt geh lam hvi rlău 85% dĭng lĕ nuĭh pah kan ta ăp doanh nghiệp, ntŭk kan geh rmôt công đoàn.

Ntoh ngơi ta nar mâp măt, Groi Kruanh dak Võ Thị Ánh Xuân uănh lah rmôt cán bộ công đoàn ta bah dâng lah nsum n’hanh 101 cán bộ công đoàn bah dâng blău ntoh lư tâm trong kan nchră nău bah dih, tâm bônh rmôt lah êng khay bah năp kơl rlău 382 rbăn nuĭh pah kan dơi geh đah dĭng lĕ prăk rĭng geh rlău 6 rbăn rmen prăk/năm. Groi Kruanh dak mĭn lah, ăp săk rnglăy aơ lĕ kơl an nuĭh pah kan geh nău rêh uĕh lơn, đăp mpăn tâm boh pah kan, lah ntŭk gay nuĭh pah kan an lôch nău nsing nơm, tâm rmôt công đoàn, bah nĕ mĭn lah ntŭk gŭ, nău tơm bah rmôt Công đoàn ta tâm boh pah kan n’hanh trong chính trị. Groi Kruanh dak Võ Thị Ánh Xuân đă Tổng Liên đoàn Lao đồng Việt Nam rgâl mhe tay têh dăng rdâk ƀư n’hanh trong ƀư kan công đoàn tĭng trong ngăch dơh, săk rnglăy, tam, trong rƀŏng dăng sĭt bah dâng, sŏk đoàn viên n’hanh nuĭh pah kan ƀư tơm. Nkre rgum n’hao uĕh ntoh măt, mât uănh, njrăng n’gang nău dơi êng n’hanh nău geh tâm di, uĕh bah nuĭh pah kan; nkre gĭt nău rŏng, mpŏng ŭch, mkra ăp nău ji nuih tă bah dâng, rgop nâp nâl nău nsing nơm n’hanh n’hao tâm rnglăp têh lam rnoi nuĭh.