Trong khôm ôxy ri ƀư I ty, phung pah kan an dâk êp lò gŭch, na nâ̆ ntrŭt dĭng khôm ôxy tâm lò, dŭt klăch yor duh âk, mprănh loih geh đăt tâm nuĭh. Bah nê̆ na nê̆ nĕ, gâp mĭn luh trong nkra njêng ndơ khôm dŏng măy điện, ntop ƀĭt joet bah ngai. Lôch jêh, oh nô dơi dâk ta ƀah đăp mpăn gay pơk ƀĭt, nkre săk rnglăy nkre dơi dêr nău klach.

Công ty CP Thép Asean aƀaơ geh 340 đoàn viên, gŭ âm ta 2 rmôt công đoàn. Tĭng wa Nguyễn Hữu Thống, Kruanh Công đoàn công ty, tâm nău kan loih, mĭn ƀư mhe kỹ thuật rgop khlay kơl ntêm nkrem prăk, n’hao geh nkra njêng n’hanh uĕh nâp ndơ. Doanh nghiệp ntrŭt đă nuĭh pah kan rgâl mhe, mĭn ƀư mhe n’hao dơi tâm rlong. Bah nĕ, âk kỹ sư, phung pah kan lĕ geh âk mĭn ƀư mhe ngăn ngên; êng nô Lê Trung Hiếu geh 3 ndơ mĭn ƀư mhe ntoh lư lah rgâl mhe trong bơm dak trôm ntu tŏ ntêm nkrem điện, nkra nam châm điện n’hanh rgâl rnoh khlay dĭng khôm ôxy, nkre dôl mĭn njêng trong pơk ŭnh. Wa Thống an gĭt: "Ăp mĭn ƀư mhe bah nôi Hiếu lĕ rgop đêt prăk nkra njêng, n’hao uĕh nâp ndơ, ntrôl văn hóa rgâl mhe, rgop kơl doanh nghiệp hun hao nâp nâl"

Tâm rnôk nô Lê Trung Hiếu gơih nđơr pah kan, mĭn ƀư mhe tâm ngih măy, ri yuh H’Chuyên Niê, đah nău kan kor ntăk cao su, lĕ geh rgop geh dŭt khlay ta mir tơm. Lah nuĭh pah kan Nông trường cao su Phú Xuân, geh 10 năm tĭng đah nău kan, yuh Chuyên lôch jêh uĕh mro nău kan. Yuh ƀư geh săk rnglăy âk lơn bơi 20% nkôp đah nău săk geh nsum. Yuh H’Chuyên nkoch: "Gâp an nsrôih dâk ơm, hăn ơm mô lah sĭt la lơn ăp phung pah kan ưêng. Rnôk kor ri rlăp mro, mô kor ndal gay ntăk mô luh bah dih. Pêh kor ri ăp nar ân theng an hơr, ăp ndơ dŏng kơt ngan, thùng, loih ndăl mô lah rse kăt dơi năp tŏng ăp.

Lam n’gor Dak Lak geh bơi 62 rbăn đoàn viên công đoàn, gŭ âm ta rlău 1.350 Công đoàn bah dâng. Ăp năm bah năp, ntrong leo tâm rlong pah kan nkra njêng dơi mbơh ƀư jru hvi, wăch rgum nău rƀŏng tĭng dŭt n’hâm bah đoàn viên, tă bah nĕ trong hăng rbăn nău mĭn ƀư mhe, rgâl kỹ thuật, rgop n’hao săk rnglăy nkra njêng, tăch rgâl. Gay ntrŭt nuih n’hâm rgâl mhe, Liên đoàn Lao động n’gor Dak Lak ƀa ƀơ rnê rhơn, nkhôm ngăch n’hanh pơk hvi ăp ntoh lư gĭt blău. Wa Nguyễn Phú Lập-Groi Kruanh Liên đoàn Lao động n’gor Dak Lak an gĭt: "Năm aơ, đah bôk nău kan pah kan mĭn ƀư mhe, Liên đoàn Lao động n’gor lĕ mbơh ƀư ăp trong nchrăp n’hanh văn hóa ntĭm rđău, njuăl công đoàn bah dâng gay nchrăp lor ntrŭt nsôr, nuĭh pah kan gơih nđơr tâm rlong pah kan nkra njêng, ntơm ndâk njêng ƀon lan nar lơ hun hao. Tâm Khay phung pah kan, mpôl hên tâm rgop đah N’gâng kan Nội vụ n’gor ndrel ƀư “Nar rgum phung pah kan” ta Nkual công nghiệp Hòa Hiệp (phường Hòa Hiệp) tâm lơ 5/5 đah rnoh nuĭh rlău 3.000 nuĭh râng. Mpŏng ŭch năm aơ mbra geh âk prăk ntop kơl âk lơn an nuĭh pah kan".

Tâm trong luh rgâl mhe n’hanh rgâl mrô, ăp phung pah kan kơt nô Lê Trung Hiếu n’hanh yuh H’Chuyên Niê dôl mĭn lah nău khlay đah nuih n’hâm mĭn njêng mhe n’hanh lĕ đah tâm nău kan. Bah ngih măy thép tât nông trường cao su, ăp mĭn ƀư mhe n’hanh nsrôih bah khân pơng rgop n’hao săk rnglăy nkra njêng n’hanh tâm di đah nău đă rgâl mhe.