Lơ 11/3/1945, nau ndâk lơh Ba Tơ geh dơi. Lơ 12/3/1945, Tahen Du kích Ba Tơ geh ndâk đah nau ton nâp: Khĭt yor neh dak. “Chông ŭnh Ba Tơ hŏ rêng lam miền Trung. Du kích Vũ Hùng, tâm Quảng Nam, Đội Tự vệ hoả xa Diêu Trì, ta Bình Định, Đội Tự vệ Tuy Hoà, ta Phú Yên, Đội Tự vệ công nhân Hòn Khói, ta Khánh Hoà ndrel Đội Tự vệ tâm lơh bah công nhân đồn điền Ca-da tâm Dak Lak... ntơm ndâk njêng.

 Ntơm bah ăp ntŭk kan nê, rmôt tahen Quân khu 5 hŏ njêng, leo tâm săk nơm nau janh dăng, nâp nhoat hăn tay. Nŭih janh dăng rmôt tahen ƀon lan, Trung tướng Nguyễn Trung thu, Groi Kruanh n’gâng kan nchră nau Tahen ƀon lan Việt Nam, rđau kan Quân khu 5 ơm, nkah tay ăp năm khay lơh Mỹ: "Cán bộ tahen ndrel ƀon lan Quân khu 5 du nuih n’hâm ndrel nuih n’hâm mô klach Mỹ, lơh Mỹ ndrel dơi rlau ma Mỹ. Khu uỷ Khu 5 ndrel N’gâng kan rđau tahen Quân ku 5 ƀư nau kan ‘Trong kan nkhĭt Mỹ”.

Aơ lah du nau ntrŭnh geh nau mhe, geh nau tâm di ngăn rnôk nê. Tâm ntŭk geh Mỹ ri lah geh Trong kan nkhĭt Mỹ. Phung he ƀư rmôt kan rgum nsum gay ma nchueng, lơh tâm ntŭk gŭ bah phung rlăng”.

Jêh nar neh dak đăp mpăn, rmôt tahen Quân khu 5 hŏ ndrel ma Đảng, ƀon lan ndrel tahen rgum rklaih nau khuch bah tâm lơh, doh rklaih ƀom mìn, ndâk tay neh ntu, ăp nhoat đăp mpăn nau rêh bah ƀon lan. Tâm nau kan mhe, ƀư nau dăng dơi bah tahen tâm lơh, tahen hăn kan, tahen pah kan tuch tăm, rmôt tahen Quân khu 5 lŏ geh âk nau dơi tâm nau ndâk rmôt cách mạng, nâp dăng, blau ngăch, ăp nhoat mhe, ndơn, ƀư tĭng nau ơm dăng ndrel nau kan ueh bah “Tahen Wa Hồ” rgop nau ndrel tahen ndrel ƀon lan lam dak tâm nau ndâk ndrel mât neh dak Việt Nam xã hội chủ nghĩa. Trung tướng Lê Ngọc Hải, Rđau kan Quân khu 5 lah rjăp:  “Rmôt tahen Quân khu 5 mô nsrŭng têh dăng mpeh ăp ding, hŏ nchrăp nau ntrŭnh ân jru nâp nau ntrŭnh bah Đảng, bah Ngih dak, Quân uỷ Trung ương, N’gâng kan neh dak, nchrăp mât nu nau, tâm rgop ma gưl uỷ, N’gâng kan tâm n’gor ƀư ntrŭnh nau kan tahen neh dak tâm lam quân khu. Nau nâp bah neh dak lam ƀon lan geh nsum ma nau nâp đăp măpn ƀon lan ndrel nau nâp bah tahen biên phòng lam ƀon lan nar lơn geh ƀư nâp. Nau nâp ntĭm nti, nau dăng mra tâm lơh, ndâk njêng nau dơi têh, ƀư tĭng nau nchâp mhal ân nâp”.

  Ntŭk geh ƀon lan jêr, tâm nê geh tahen. Cán bộ, tahen Quân khu 5 mro ƀư ueh rmôt kan bôk năp tâm ăp nkuăl geh khuch, nkuăl jêr. Bol ma rluh neh tâm ăp yôk prêh Đà Nẵng, Quảng Ngãi mô lah dak lip tâm ăp n’gor Gia Lai, Dak Lak, Khánh Hoà, tahen kŏ năn tât ndrel mro kơl an.

Tâm ntŭk tơm bah phŭt sial, cán bộ, tahen hăn tâm bri mih, bri sial, kơl an ƀon lan, rdâng, rklaih nau khuch khat tă geh mih nar, srê ji, kơl an ƀon lan ăp ntil ndrel ngăch đăp mpăn nau rêh. Cán bộ ndrel ƀon lan ăp n’gor duyên hải miền trung nkoch tât nau kan ndrel nau rŏng bah tahen Quân khu 5 kơt aơ: ‘Oh nô cán bộ tahen rgum ƀư ueh nau kan, kơl an ân ăp rnăk vâl ƀon lan. Gâp saơ rhơn ngăn, lah ueh ma ăp kônh tahen”.

Rlau 80 năm rlau aơ, nau ton “Khĭt yor neh dak” bah Du kích Ba Tơ nar nê nơh lŏ lah chông ŭnh ang mro, nkoch pă, ang mro tâm play nuih ăp kơn cán bộ ndrel tahen Quân khu 5./.