Nkhêp nkah ndray 51 năm Nar Rklaih luh miền Nam, dơn ngoăy neh dak, nar 27/4, Đại tướng Nguyễn Trọng Nghĩa, Ủy viên Bộ Chính trị, Chủ nhiệm Tổng cục Chính trị Tahen ƀon lan Việt Nam hŏ tât mpoh nhang nkah gĭt ăp Tahen ơm dăng janh khĭt n’hanh khâl ăp rnăk dơi kơl ta n’gor Gia Lai.

Ta Nghĩa trang liệt sĩ Quy Nhơn, n’gor Gia Lai, Đại tướng Nguyễn Trọng Nghĩa ndrel mpôl pah kan bah Trung ương hŏ nkêng săk n’guh mbah bah năp huêng khlay bah ăp tahen ơm khĭt, mpơl nuih n’hâm nkah gĭt jru đah ăp nuĭh hŏ han dăng n’groh săk yor an đăp mpăn, dah rŏng bah Neh dak. Lôch weh chop, Đại tướng Nguyễn Trọng Nghĩa ndrel mpôl pah kan bah Trung ương hŏ tât khâl ăp rnăk tahen ơm rmanh tă râng lơh Prăng n’hanh mprơh Mỹ, aƀaơ dôl gŭ rêh ta phường Quy Nhơn Nam. Mpôl hăn hŏ tât khâl rnăk wa Nguyễn Thị Minh Tâm, rnăk wa Lê Thị Minh Tâm n’hanh rnăk wa Phan Tiến.