Nkah ndray 51 năm Rklaih luh miền Nam, dơn ngoăy neh dak, âk n’gor ta Tây Nguyên ƀư ăp nău kan văn hóa, njroh mprơ săk ntơr êng, nkre mpơl tay du njăr trong dăng janh kăl e, mpư n’hao rnoh khlay tâm rnglăp rnoi nuĭh.

Ta Đình Lạc Giao, phường Buôn Ma Thuột, Sở Văn hóa, Thể thao n’hanh Pâl nđaih n’gor Dak Lak ƀư măng njroh mprơ “Bản hùng ca Tháng Tư”, đah bar gâl “Bài ca thống nhất” n’hanh “Dak Lak - Âm vang ngày mới”. măng njroh mprơ mpơl tay du njăr trong rlăch ndăng krit jêr, ƀư ntoh lư nkô̆ hôr khlay bah nău dơi têh khay năm mhe 1975, lơn lah lơh dơi Buôn Ma Thuột, lơh dơi ntơm bôk năp pơk trong hăn hăn Tây Nguyên, rgop njêng geh nău dơi bah Trong hăn lơh Hồ Chí Minh kăl e. Nkre, hôr saơ muh măt rgâl mhe bah Dak Lak lôch rlău 50 năm rklaih luh. Ntơm bah nar 30/4 tât 3/5, ta phường Tuy Hòa ƀư rêng kan đah nkô̆ “Cá ngừ Dak Lak – Tinh hoa câu vàng” nkre đah “Lễ hội khinh khí cầu – Bay ngắm bình minh”, gay mbah rhơn ăp nar lễ têh n’hanh nkơnh n’hơ pâl nđaih ta n’gor.

Tâm Quảng trường Đại đoàn Kết, Phường Pleiku, UBND n’gor Gia Lai mhe ƀư Bôk nau kan njroh mprơ ueh “Nkuăl yôk khuh răm” ryơk n’hâm dăng tâm rnglăp ăp rnoi. Bôk nau kan geh nau khlay di nkah 80 năm nar Wa Hồ njoăl tât Đại hội ăp rnoi mpol đê̆ miền Nam ta Pleiku, du nkah 51 năm nar rklaih miền Nam, đăp mpăn neh dak. Nau ueh bah Bôk nau kan lah nau ƀư ndâk tay săm ƀŭt njoal bah Kruanh Hồ Chí Minh njoăl ăp rnoi mpôl đê̆ năm 1946. Ntoh nau tâm nar ƀư Bôk nau kan, Kruanh UBND n’gor Gia Lai Phạm Anh Tuấn lah rjăp, bah rnôk aơ 80 năm, n’ha săm ƀŭt Kruanh Hồ Chí Minh njoăl Đại hội ăp rnoi mpôl đê̆ miền Nam ta Pleiku hŏ jêng nau ƀư kan nkah têh mpeh nuih n’hâm tâm rnglăp rnoi mpôl, ƀư nâp nau rnơm ndrel nau khlay nsôih cách mạng:

‘Măng tâm n’ur ăp rnoi mpôl đah nkô̆ “Nkuăl yôk prêh khuh răm” mô êng lah nau kan văn hoá, ma hô lah nau ƀư rjăp: Phung he êng êng yơn mô geh nkhah êng. Phung he âk ntil yơn ndrel du nau ƀư. Di nkah 80 năm nau kan khlay aơ, nau khlay ngăn mô di lah nkah nau Wa, ma ƀư rjăp lơn nau khlay, mât nau mĭn bah Hồ Chí Minh mpeh nau tâm rnglăp rnoi mpôl, lŏ ƀư ngăn ma nau kan ndrel nau tă geh dơi ngăn đah nau rnơm rjăp. Dak Viẹt Nam lah ngoai, rnoi mpôl Việt Nam lah ngoai. Dak mra dơi suăt, yôk mra dơi hoach, yơn nau mĭn kan nê mô geh dơi rgâl”.