Ta xã Ea Súp, ntŭk ma neh ntu dŭt kro phang, trôk nar duh n’heng ƀư an âk ntil tơm tăm jêr hao têh n’hanh an nău geh wăng sa đê̆, du đê̆ ntil tơm gle rĭ an saơ hao jêng ueh ta nkual neh aơ. Dơn geh nău dơi aơ, âk rnăk ƀon lan ta ntŭk lĕ nănh rgâl bâh ăp ntil tơm tăm mô jêng rgâl tăm tơm gle. Rnăk vâl wa Trần Thị Phượng, ta thôn 4 lah ngoăy tâm âk rnăk hăn lor bôk năp. Ta rnoh neh rlău 5 sào neh ntơm nơh tăm điều yơn mô geh play, bơi tât 5 năm aơ wa Phượng lĕ rgâl jêng tăm ntil gle. Gay ma n’hao an săk rnglăy pah kan jan sa, rnăk vâl wa lĕ geh ƀư ntrŭp trong dĭng dak tŏ ntruh tâm rgop đah điện măt nar, nkre mpêt nkrem prăk kan nkre geh dak tŏ an tơm tăm. Aƀaơ, đah rlău 500 tơm gle lĕ an nău geh đăp mpăn, ăp năm nău kan aơ nsĭt tay nău geh bơi tât 100 rkeh prăk an rnăk vâl wa Phượng.“Bâh ntơm kăl e tât aƀaơ geh tăm âk ntil tơm hôm, yơn rnôk rgâl tơm tơm gle rĭ saơ geh săk rnglăy ngăn yor păng an nău geh ăp năm n’hanh neh sât kro ta aơ. Gâp uănh gĭt năl rlong tăm tơm aơ saơ dơi, an nău geh ăp nar jêng lah nău geh ta rnăk vâl an nơm đăp mpăn lơn”.

Tĭng nău mbơh bâh wa Đặng Thị Thanh Nhung, Groi Kruanh rnâng kan way kan UBND xã Ea Sup, n’gor Đăk Lăk, tơm gle ntơm bôk năp nsĭt tay nău geh wăng sa âk an du đê̆ rnăk ƀon lan, yơn nău hun hao ntil tơm tăm aơ ta nkual hôm nha geh du đê̆ nău jêr. Aƀaơ, rnoh neh tăm tơm gle kanŭng nchrai dơm, ê hŏ dơi geh njêng du nkual tăm rgum têh. Nău aơ ƀư an nău tâm rgop pah kan jan sa, tăch rgâl n’hanh geh rgum âk nuĭh kan têh tât ntuh kơl nkra njêng hôm nha geh nău jêr jŏt.

Bol ma kơt nĕ, tĭng wa Nhung, âk ntil gle dơi tâm rdâng di đah nkual neh trôk nar duh phang ta ntŭk, dơh tăm, prăk ntuh ƀư mô ir âk n’hanh ngăch dơi geh dŏng, an nău geh ƀa ƀơ. Aơ lah nău kan tâm di đah nău dơi pah kan jan sa n’hanh nău rêh bâh ƀon lan nkual neh sât ntang kro phang. Bâh nău ngăn nĕ, xã Ea Sup dôl nchrăp pơk hvi rnoh neh tăm gle tĭng trong njêng nkual tăm rgum, nkre lah nsrôih kuăl jă doanh nghiệp tât uănh năl, ntuh kơl tâm rgop pah kan n’hanh rvăt ndơ geh ƀư.“Ủy ban nhân dân xã lĕ geh rdâk njêng ăp nău nchrăp kan n’hanh njoăl nău mbơh tơih ŭch ntuh kơl, kuăl đă ăp doanh nghiệp bâh ntŭk êng tât ta xã gay ma tâm rgop ndrel đah ăp rnăk ƀon lan, hun hao têh dăng lơn đah tơm gle aơ”.

Mô dơn nsĭt tay nău wăng sa, tơm gle hôm nha geh uănh năl geh âk nău dơi mpeh ntŭk gŭ rêh, ngăn lah tâm rnôk rgâl trôk nar mih sial ăp nar lơ ma jêr njrăng aƀaơ. Tơm gle têh jêng ngăch, dơi rêh tay dăng, kơl mât ueh jêng neh, njrăng dak rchoih neh n’hanh rhôp carbon ueh. Đah klâp ma 3.500ha tơm gle aƀaơ geh, Đăk Lăk hôm nha geh âk nkual neh gay ma hun hao n’gâng an mât tăm gle tât geh dŏng ăp nău mpŏng kan mât bri. Tĭng wa Nguyễn Hoàng Tiệp, Groi Giám đốc ntŭk kan Kơp dơn mât bri nâp nâl, nău dŏng ăp nău mpŏng kan mât bri nâp nâl, ngăn lah chứng chỉ FSC đah bri gle (kơp dơn bri n’hanh ăp ntil ndơ bâh bri geh mât uănh tĭng trong nâp nâl), kơl n’hao nău khlăy ntil ndơ n’hanh pơk hvi rơh nkhêp geh dăch đah ntŭk tăch rgâl.“Chính phủ lĕ geh ntrŭnh Nghị định 06 mpeh plơ̆ tơl nsuk ƀơ̆, tâm nĕ geh nău ntrŭnh na nê̆ mpeh nău kan tăm bri lah nsum tâm ban kơt bri tơm gle lah êng, geh tât nău kan n’huch rnoh nsuk djơh. Yor nĕ, Đăk Lăk an geh ăp ntrong kan ntĭm mbơh na nê̆ an ƀon lan tâm nău ka kĩ thuật tăm ăp nar gay ma n’huch bah ir plơ̆ tơl ndơ nsuk ƀơ̆”.

Tĭng nău ntrŭnh hun hao tuch tăm nâp nâl, n’gor Đăk Lăk dôl tă geh njoat pơk hvi nău kan đah tơm gle, ntil tơm geh uănh năl geh âk nău dơi ta nkual neh sât kro. Wa Đặng Thị Thuỷ, Groi giám đốc ntŭk kan tuch tăm n’hanh ntŭk gŭ rêh n’gor Đăk Lăk an gĭt, gay ma dơi geh sŏk dŏng săk rnglăy nău dơi aơ, ta ntŭk mbra geh ntrong kan lĕ rngô9ch, tâm ban bâh nău nchrăp kan tât nkual geh ƀư, leo kan tât nkret ƀư têh jru n’hanh tăch rvăt ndơ geh ƀư.“N’gor mbra geh rgum nău nchrăp kan nkual tăm gle, ntrŭt đă doanh nghiệp, ntŭk kan ndrel ntuh kơl an hun hao ndrel đah pah kan nkret ƀư, nkre lah ntrôl an geh tâm rgop nău kan tĭng rnoh khlăy. Bâ nĕ, n’hao nău khlăy ntil ndơ geh ƀư, pơk hvi ntŭk tăch rgâl tâm dak n’hanh tăch an dak bah dih, ntop pă nău kan, n’hao nău geh an nuĭh ƀon lan”.

Bâh ăp ntrong kan bôk năp an saơ săk rnglăy n’hanh nău mpŏng kan na nê̆ bâh n’gâng kan ta ntŭk, tơm gle dôl ntơm an saơ, aơ mô dơn kanŭng lah tơm tăm tâm di đah nkual neh trôk nar  kro phang ma hôm nha lah trong hăn mhe tâm nău hun hao wăng sa ueh nđir ta Đăk Lăk.  Rnôk geh leo ƀư nău pah kan an tâm di na nê̆, ndrel đah tâm rgop rnoh khlăy n’hanh nkra ƀư, gle mô dơn rgâl mhe nău rêh an ƀon lan nkual jêr ma hôm nha pơk nkual neh hun hao nâp nâl an n’gâng kan tuch tăm ta ntŭk tâm rnôk jŏ jong.