N’glău Ia Lâm, xă Gào lah ngoăy tâm ăp tu dak tŏ khlay an nuĭh ƀon lan, aƀaơ lĕ kroh. Gay kơl ăp mir tơm tăm dôl kro hoanh duh phang, âk rnăk manh măy kŭih, tơk jru nklang n’glău gay joi tu dak mŭr hôm e nklen. Ndrĭ yơn, rnoh dak đêt aơ ngăch kroh. Nô Nguyễn Phát, ta thôn O Grang, xă Gào, nkoch tâm nău lĕ n’hâm:

Aƀaơ kâp geh đêt dak luh ma tŏ geh 5,7 tơm lah tŏ, tâm pit ma tŏ dơi kơl ri kơl. Tu dak năm aơ nar lơ soăt ngăch.

Mô knŭng n’glău Ia Lâm, n’ăp 5 n’glău, dak bât ta xă Gào dak kroh da dê. Wa Bùi Văn Thỏa ndrel âk rnăk dôl bơm dak bah n’glău Ku Tong an gĭt, kônh wa dôl bơm koar dak đê̆ đă n’glêh dŭt. Tĭng wa Thỏa, lah duh tay, knŭng tâm đêt nar tay, n’glău mbra kroh lĕ rngôch:

Kônh wa aƀaơ dŭt rwê, mô geh dak tŏ, dŭt jêr jŏt. Du đêt rnăk ta aơ geh koar ntu yơn mô geh dak.

Nu nău mô tŏng dak tŏ an tơm tăm ta Gia Lai dôl rêng hvi tĭng nar ngăn lah ta nkual mpeh bah lơ bah n’gor. Wa Rơ Mah Hêng, Groi Kruanh UBND xă Ia Tôr an gĭt, ta năp măt xă rgum nkoch trêng, rgŏ jă nuĭh ƀon lan kơt dŏng ăp trong mkra tŏ ntêm nkrem gay mât tuch tăm:

Duh phang kơt aơ mbra mô tŏng dak, yor tu dak aƀaơ knŭng geh ntu n’hanh dak diăng, mô geh n’glău n’gâr dak bât. Mpôl hên nkoch trêng rgŏ jă nuĭh ƀon lan kơt dŏng ntêm nkrem, tŏng ăp dak tŏ an tơm tăm.

N’hêl na nê̆ an saơ, nu nău mô tŏng dak tŏ an tơm tăm ta Gia Lai geh tay ăp rơh dŭt yan wai, ngăn lah đah nkual mpeh bah lơ n’gor. Tâm lvang mhe nglăp nsum, kruanh n’gor Gia Lai lĕ đă ƀư trong nchrăp rgâl mhe dak bât đah dĭng lĕ rnoh ntuh kơl tât 17 rbăn rmen prăk, tâm năm kan 2025-2030. Hôm tâm nău ta năp măt, ăp xă an mât dŭt n’hâm trong geh ơm. Wa Nguyễn Văn Phương, Jrô kan wăng sa xă Gào an gĭt:

Xă lĕ dăn đă n’gor ntop kơl prăk gay nkra tay ăp n’glău, dak bât ta ntŭk. Ndrĭ ri he mbra ƀư tĭng nău koăih rbông, nklung n’glău gay an geh dak tŏng ăp rnoh tŏ an rnoh neh tơm tăm jŏ năm tâm nkual. Mpeh jŏ jong lah hăn uănh ăp dak diăng gay ndâk ƀư ăp dak bât n’gâr dak jêt gay n’hao rnoh dak mŭr kơt an geh ăp nkual tŏ jêt ta lam xă.