Rlău 1 ha sầu riêng bah rnăk wâl wa Nguyễn Thị Hồng, ta xă Ea K’nuếc, n’gor Dak Lak dôl tâm lvang dang nkao, rnôk khlay ntrŭnh an săk geh. Yơn lah, trôk nar duh jêng rnăk wâl wa an rgâl lĕ rngôch nău rêh gŭ âm gay mât chăm tơm tăm. Wa Hồng nkoch:

Trôk nar duh kơt aơ mpôl hên an dâk bah 3 mông ôi hăn kan, jêh tŏ hôm nklăp 8-9 mông lah rlu. Duh ngăn, mô dơi rdâng, dŭt ŏk r’ah đah nuĭh ƀon lan.

Mô knŭng sầu riêng, ăp tơm tăm khlay tâm nĕ geh 210.000 ha cà phê, bơi 29.000 ha tiêu, dôl rdâng ât têh bah nău mô tŏng dak. Âk nuĭh ƀon lan lĕ nchrăp rgâl bah tŏ bak way ơm an tŏ ntêm nkrem gay tâm di. Wa Nguyễn An Sơn, ta xă Cư M’gar, an gĭt, rnăk wâl wa lĕ nglăp trong tŏ ntêm nkrem bah 2 năm aơ, kơl n’hŭch 1/3 rnoh dak nkôp đah bah năp.

Ndơn yor kơt bah năp he tŏ đah dĭng dŭt hoach dak, lŏ roh âk nar. Aƀaơ dŏng trong tŏ ntruh jêt nkre ntêm nkrem dak, nkre n’hŭch nar pah kan, săk rnglăy wăng sa âk lơn.

Ndrel đah nău nchrăp lor bah nuĭh ƀon lan, n’gâng kan ƀon lan n’hanh nău kan lŏ mir dôl mbơh ƀư âk trong mkra tâm di đah nău duh phang jŏ jong, duh phang hao tay. Ta ăp xă, trong rbông dak dơi uănh nđôi, tâm pă dak an di; nkre đă nŭih ƀon lan dŏng dak ntêm nkrem, kơt dŏng công nghệ tŏ mhe. Wa Nguyễn Văn Kiên, Groi Giám đốc Ntŭk Pă an nău rhŏ nău kan nsum xă Ea Knốp, n’gor Dak Lak an gĭt:

UBND xă lĕ jao an ăp gưl way kan kơp uănh lĕ rngôch trong rbông dak gay tâm pă dak tâm di. Nkre, đă nuĭh ƀon lan dŏng dak ntêm nkrem, kơt dŏng công nghệ tŏ mhe gay đăp mpăn dak rhŏ an tuch tăm tâm rnôk duh phang.

Tĭng nchroh mbơh, duh phang ta Dak Lak hôm e geh tâm nar tât, geh mô tŏng dak dơi geh, lơn lah ta ăp kual ngai tu dak mô lah trong dak bât mô tŏng nău ŭch. Wa Đặng Thị Thủy, Groi Giám đốc N’gâng kan Tuch tăm mât rong n’hanh Ntŭk ntô gŭ âm n’gor Dak Lak an gĭt, n’gor lĕ nchrăp ăp trong njrăng n’gang duh phang, ƀư nkra njêng tâm di an yan bah năp tay:

Ăp ntŭk kan way kan dôl tâm rgop uănh nđôi nu nău trôk nar tâm yan wai n’hanh khay tât gay tâm pă dak an di. Nkre, nchrăp tuch tăm yan mih, ntĭm ƀon lan nkra rgâl tơm tăm tâm di đah nău tâm pă tu dak. Bah meng nĕ, kơp uănh tay ăp n’glău n’gâr dak, nchrăp trong pă dak an tuch tăm n’hanh dak dŏng.