Nar 25/3, ta n’gor Dak Lak, Bộ Nông nghiệp n’hanh Môi trường ƀư “Tâm nchră kơi năp nti an ƀư lam trong rlong ƀoi tơm luh play sầu riêng ta nkual Tây Nguyên”.

 Tâm nchră wăch rgum nău tât râng bah âk mpưm ntơh măt ăp n’gâng kan, ăp n’gor, hiệp hội, doanh nghiệp n’hanh hợp tác xã kan tâm trong mât chăm, nkret njêng, tăch n’gluh sầu riêng. Ta tâm nchră, ăp nuĭh hŏ dơi mbơh gĭt lam bôk nău kan rlong ƀoi tơm luh; rƀah gĭt quy định tăch n’gluh sầu riêng tât Trung Quốc; nkre tâm ôp ăp trong nkra ƀư ma công nghệ, mât nkual tăm n’hanh leo tuch tăm tĭng rêng. Âk nău rgop bah doanh nghiệp, hợp tác xã rgum tâm ăp jêr jŏt tâm rnôk an ƀư, lơn lah nkô̆ nău tâm mbluh rloh mât prăp nău lư n’hanh tŏng an nău ŭch geh bah ntŭk rvăt n’glăp.

Wa Nguyễn Văn Long, Vụ trưởng Vụ Khoa học - Công nghệ, Bộ Nông Nghiệp n’hanh Môi Trường lah rjăp mbra kan nsum tay lhăt đah ăp n’gor, doanh nghiệp gay lôch jêh ăp tŏng nsing ta nău djăt nău rgop bah ngăn ngăn, đăp mpăn nkre tŏng nău ŭch geh mât bôk kan, nkre nta trong dơh an nuĭh mât chăm n’hanh tăch n’gluh.