Pe khay bôk năm 2026, nău ngăch hun hao bâh n’gor Đăk Lăk geh klâp ma 7,5%, lĕ rnoh prăk ntuh kơl lam ntŭk rêh jêng geh rlău 12.200 rmen prăk, geh an tơm prăk ngih dak rlău 5 rbăn rmen prăk. Ta rơh rƀŭn nchră, ăp đại biêủ rgum mbơh rblang ăp nkô̆ nău hôm nha klen, nkre lah dăn đă âk nkô̆ nău khlăy geh tât ntrong kan, nău kơl kan n’hanh ăp nău kŏ văk tâ nău kan ngăn. Ăp nău tâm rgop ta rơh rƀŭn nchră Trung ương ơm geh ntrŭnh nău dŏng neh, doh rklaih ăp nău hôm nha kŏ khan, ntrŭnh mbơh na nê̆ nău way pă prăk ntuh kơl nsum lvang năm 2026-2030, nkre lah ƀư lôch nău ntrŭnh mpeh leo kan, ntŭk kan gưl ntŭk kan ba dâng. Mpôl Đại biêủ QH n’gor Đăk Lăk an gĭt, nău dăn đă ntŭk kan, nău kơl kan mô dơn gay ma doh rklaih nău jêr jŏt ma hôm nha geh nău mĭn njêng kan, njêng nău nsrôih n’hanh hun hao nâp nâl. Mpôl kan mbra rgum tŏng ăp, mbơh tơih na nê̆ nău dăn đă tât Quốc hội n’hanh Trung ương gay ma ƀư lôch ntrong kan, doh rklaih nău kŏ văk n’hanh njêng  nău kan pháp lý dơh nơih an nău hun hao ta rơh mhe tay.