Nai Lê Hiếu Vy, Bí thư Đoàn Ngih samƀŭt THPT Ngô Gia Tự (phường Phú Yên) lah ntoh măt du hê dơm n’gor Dak Lak dơi đă sŏk ndơ nkhôm Lý Tự Trọng năm 2026. Yuh nchrăp rgâl mhe trong ƀư gay wăch rgum, kuăl jă đoàn viên, kon hŏk. Tâm rơh mih dak lip têh dŭt năm 2025, mô klach nji, yuh Vy lĕ rgum rlău 30 đoàn viên lăp ăp nkual geh nkhah êng gay ndơ̆ ndơ ntop kơl tât nuĭh ƀon lan dôl geh ji ngot. Nuih n’hâm hăn lor, nsơr soan bah yuh mô knŭng kơl nuĭh ƀon lan rlet rlău jêr jŏt ma hôm rêng hvi tâm kon hŏk, kuăl jă nuih n’hâm lĕ đah nău kan n’hanh nuih n’hâm tâm pă. Đah yuh Vy, trêng nău gơih nđơr n’hanh hăn ndrel đah druh ndăm lah trong tăm ăp grăp ntil đah nău kan, nuih n’hâm tâm yô̆ n’hanh nuih n’hâm nsơr soan tâm ăp kon hŏk n’hanh ăp băl mom.

Rnôk hăn ndrel ri gâp ƀư kan nsum đah kon hŏk. Saơ he ndrel ri ntrôl nuih n’hâm ŭch êng, dâk êng, hăn lor bah kon hŏk, jêng he rgŏ jă mô di he ntĭm, ƀĭt joet. Kon hŏk mbra dăn ƀư, n’hanh rnôk dăn âk mro. Ăp nău ƀư mbra du nău ƀư ngăn dôl nkah gĭt đah ăp oh.

Knơm trong ƀư mhe, săk rnglăy, lvang 2020-2025, Đoàn ngih samƀŭt THPT Ngô Gia Tự lah ngoăy tâm âk ntŭk kan ntoh lư bah n’gor Dak Lak. Êng năm 2025, Ngih samƀŭt Ngô Gia Tự geh 8 kon hŏk lap dơi nglăp mŭt Đảng.

Ndrel đah ngih samƀŭt, trong kan đoàn dơi mbơh ƀư ta Dak Lak đah nău khlay hăn ndrel nău ƀư đah nău ŭch ngăn ta bah dâng. Ta phường Buôn Ma Thuột, jêh rnôk pơk dŏng n’gâng kan ƀon lan 2 gưl, đoàn viên druh ndăm dơi tâm pă nău kan na nê̆, râng ntop kơl nuĭh ƀon lan gĭt nău rhŏ nsum trực tuyến, ntĭm kỹ thuật mrô ta tĭng ntŭk ƀon lan gŭ. Tĭng yuh Lê Thị Anh Trâm, Bí thư Đoàn phường Buôn Ma Thuột, druh ndăm mô ƀư rgâl, ma ntĭm an nuĭh ƀon lan dơi ƀư êng, nchrăp tâm ntŭk ntô mrô.

Tâm năm mhe rlău ri đoàn phường lĕ ndâk ƀư rmôt ka na nê̆ ntop kơl Ntŭk rhŏ an hành chính nsum kơt mbơh ƀư lam hvi tât 89 tổ dân phố n’hanh ƀon. Mô rlu ta nău ƀư kơl an ma hôm ntĭm tât nău ƀư ndrel đah nuĭh ƀon lan gay ntĭm nuĭh ƀon lan geh nău blău mrô gay khân pơng dơi nchrăp dơi ƀư samƀŭt hành chính ta ntŭk ntô mạng.

Tâm rnôk ƀư tĭng ntrong ƀư n’gâng kan ƀon lan 2 gưl, đă n’gluh an đah rmôt Đoàn an săch di nău kan, jao di nuĭh, mât uĕh nău ƀư tơm druh ndăm tă bah dâng. Rnôk nău kan dơi mĭn na nê̆, ntrong leo trong ƀư, ma hăn ndrel đah ăp nău kan ngăn ngên.

Knŭng tâm đêt khay, ăp rmôt druh ndăm kơl kan ta n’gor Dak Lak lĕ ntop kơl hăng rbăn nuĭh ƀon lan gĭt tât nău rhŏ nsum n’hanh ăp trong mrô. Aơ lah rmôt boăt nthoi khlay đah n’gâng kan mrô n’hanh nuĭh ƀon lan, ngăn lah ta nkual jru ngai. Nô Lương Minh Tùng, Bí thư N’gor đoàn Dak Lak mĭn lah, gay tâm di nău ŭch mhe, rmôt Đoàn an rgâl mhe trong ƀư, tĭng nău ngăn.

Rmôt đoàn an geh nău rgâl dŭt lah uĕh. Cán bộ đoàn ta bah dâng an ngăch ƀư tĭng nău kan chính trị ta ntŭk. Năm aơ cán bộ đoàn gưl bah dâng săch ăp nău khlay, ƀư tơm, tĭng đah nu nău ngăn bah ƀon lan, ngăn lah rnôk nglăp nsum, gay ta bah dâng dơn ăp nău jêr, ăp nău an ƀư tơm bah druh ndăm tâm n’gâng kan ƀon lan 2 gưl.

Wa Y Giang Gry Knơng, Groi Bí thư N’gor ủy, Kruanh Ủy ban MTTQ Việt Nam n’gor Dak Lak an lah, tâm rnôk rgâl mhe, rmôt kan Đoàn an rgâl mhe tay trong ƀư nău kan, tâm di đah trong hun hao bah rnôk mhe. Lơn lah, đoàn viên, druh ndăm an lah rmôt hăn lor tâm rgâl mhe n’hanh rgâl mrô, ăp ntil nău geh nkô̆ tơm khlay đah hun hao bah n’gor, neh dak. Đah nău dơi gĭt ngăch nău nti n’hanh công nghệ mhe, druh ndrăm lah rmôt tơm dơi ơm ndơ̆ an ăp nău ƀư mhe, kơt dŏng mrô tâm nău ngăn, rgop ntrôl hun hao wăng sa-rêh jêng n’hanh mĭn lah bah rơh nuĭh ƀư tơm rgŏ năp bah neh dak.

Rgâl mrô dơi mĭn lah nău mhe n’hanh druh ndăm an dơn lor tâm nău kan aơ. Mô knŭng hăn lor dŏng công nghệ, ma hôm lah rmôt tơm ntop kơl nuĭh ƀon lan ƀư tĭng nău rhŏ nsum trực tuyến, rgâl nkra hành chính. Nău kan bah Đoàn lah an ndơ̆ công nghệ mrô sĭt ƀon lan, ntĭm kônh wa gĭt nău mhe, nsrôih jŭt jăng tâm ƀah mrô đah nkual têh n’hanh thôn ƀon, nkual jru ngai.

Tâm rnôk đă hun hao nar lơ âk, n’gor Dak Lak mĭn lah druh ndăm ngoăy tâm âk nuĭh khlay gay ƀư rgâl mpŏng ŭch hun hao, nkre mâng treh an nău hun hao nâp nâl. Yor rĭ, nău kuăl jă ƀư tơm, lĕ đah nău kan n’hanh mpŏng ŭch nsơr soan bah druh ndăm lah nkô̆ nău khlay, rgop ndâk njêng Dak Lak hun hao ngăch n’hanh nâp nâl./.