Ta xã Măng Ri, ăp nar lơ a geh âk băl mom ntơm njêng nău kan bâh tơm sâm Ngọc Linh. Nô A Lêm, đoàn viên ta thôn Long Láy 2, xã MăngRi lĕ geh tăm rlău 400 tơm sâm Ngọc Linh bâh năm 2020. Bâh ntơm gơih kơt nti, geh dŏng kĩ thuật, mir tơm sâm bâh nô hun hao  jêng tâm ban, du đê̆ tơm lĕ an nău geh ueh.

Nô A Lêm an gĭt, sâm Ngọc Linh lah ntil tơm jêr tăm. Tơm kanŭng geh hun hao ueh jêng ta n’hâm krŏng, ta nău prêh bâh 1.200 mét let lơ. Nuĭh tăm an geh nsrôih, gơih na nê̆ tâm nău mât chăm. "Đah tơm sâm Ngọc Linh, nău khlăy ngăn lah he an geh nău nsrôih, gơih nti kơt ăp yuh ăp nô, ăp nuĭh hăn ba năp, ăp nuĭh lĕ geh nău dơi lor. Kơt nti nău tă blău kan, tât râng âk jrô nti nău kan gay ma khân păng ntĭm leo, dŏng rnoh prăk ơm nơm geh n’hanh manh tay gay ma tăm ntil tơm aơ”.

Aƀaơ, âk đoàn viên mom ndăm ta xã Măng Ri, Tu Mơ Rông, n’gor Quảng Ngãi ntơm nơh ta nkuăl Tu Mơ Rông n’gor Kon Tum rgum hun hao nău wăng sa bâh tơm ƀư dak si. Nuĭh ƀon lan ta ntŭk hôm nha geh n’hao tăm tay ăp ntil tơm êng kơt cà phê, đẳng sâm (sâm rse), thất diệp nhất chi hoa. Âk băl mom geh dŏng rnoh prăk manh bâh ngân hàng Chính sách xã hội gay ma ƀư tăm sâm. Du đê̆ nău kan ntơm nsĭt tay nău geh săk rnglăy, kơl an nuĭh mom geh tay nău geh, đăp mpăn nău rêh jêng.

Tât aƀaơ, ăp doanh nghiệp tăm sâm tâm rgop đah ăp nuĭh kan khoa học ntĭm kĩ thuật tăm, mât chăm n’hanh mât tơm tăm, ntop n’hao nău geh săk rnglăy pah kan. Wa Nguyễn An, Giám đốc Thương maị Công ty cổ phần VinGin an gĭt, doanh nghiệp bâh wa lĕ nta nău dơh nơih kơl an mom ndăm leo kan geh dŏng khoa học - công nghệ, dŏng nău mhe kĩ thuật tâm nău pah kan jan sa. “Mpôl hên mô dơn rlu tay ta nău pă ntil tơm tăm ma mbra hăn ndrel đah ăp băl mom tâm ntrong kan mât chăm, mât ueh tơm. Mpôl hên mbra kơl an ăp băl mom, ngăn lah ăp băl geh nău gĭt blău, geh gĭt ăp nău mhe ngăn, ăp nău mĭn kan, ntrong kan gay ma hun hao, mĭn uănh hun hao ndrel đah nĕ lah du đê̆ nău kan êng gay ma kơl an ăp băl mom gĭt na nê̆ lơn”.

Hun hao tơm ƀư dak si, tâm nĕ pơk hvi rnoh neh tăm tơm sâm Ngọc Linh lah trong hăn mhe geh uănh năl na nê̆ tâm Nghị quyết Đại hôị Đảng bộ xã Măng Ri năm kan 2025-2030. Xã ta nkual tơm hun hao tơm sâm ta Quảng Ngãi. Aƀaơ n’gâng kan ta ntŭk dôl kơl an ƀon lan pơk hvi rnoh neh tăm sâm, geh âk doanh nghiệp ntuh kơl ƀư nkra njêng, ntop n’hao nău khlăy ntil ndơ. Wa Phạm Xuân Quang, Kruanh UBND xã Măng Ri lah na nê̆, hun hao tơm sâm an geh ndrel đah mât ueh bri. “Nău pơk hvi rnoh neh mbra njêng ntil ndơ geh gay ma kuăl jă, an geh âk doanh nghiệp, nuĭh ntuh kơl tât nău pah kan nkret ƀư, njêng ntil ndơ geh ƀư, njêng ntŭk gŭ rêh ueh an nău khlăy ntơ bâh sâm Ngọc Linh. Gay ma pơk hvi n’hanh hun hao, njêng ntŭk hao jêng ueh an sâm Ngọc Linh têh jêng, an geh tăm bri, hun hao rnoh neh bri n’hanh mât ueh bri. Nkre lah, mbơh tơih rgŏ jă ƀon lan tâm nău mât uănh, mât chăm bri ndrel đah hun hao tơm sâm Ngọc Linh n’hanh ăp ntil tơm ƀư dak si êng”.

Ta xã Tu Mơ Rông, n’gâng kan ta ntŭk tâm rgop đah doanh nghiệp pă an tơm ntil an đoàn viên mom ndăm, njêng nău kan n’hanh ntrôl an hun hao wăng sa. Tât aƀaơ, xã aơ lĕ geh rgŏ jă rlău 100 rbăn tơm cà phê ntil gay ma tăm n’hanh rlău 800 kg găr ntil gay ma pă an ƀon lan tăm. Wa Võ Trung Mạnh, Bí thư Đảng uỷ xã Tu Mơ Rông an gĭt, nău đă ntrŭnh lăp tâm nău rêh an geh rdâk njêng nău kan na nê̆ gay ma ntĭm an ƀon lan ƀư tĭng pah kan. "N’gâng kan way kan mpeh kĩ thuật an geh ƀa ƀơ uănh nđôi, ntĭm đă ƀon lan tăm, mât chăm n’hanh mât ueh tơm sâm Ngọc Linh gay ma mât rnoh tơm sâm  ntil, hun hao ta ntŭk. Đảng uỷ xã Tu Mơ Rông lĕ geh njêng ăp mpôl kan ƀa ƀơ jur tât ta ntŭk tăm gay ma uănh nđôi, ntĭm đă n’hanh ntrŭt đă ƀon lan mât chăm, hun hao tơm sâm”.

Bâh ăp nău kan na nê̆, ngăn ngên, Nghị quyết bâh Đảng ta nkual yôk n’gor Quảng Ngãi mô geh rlu tay ta n’ha rđaih ma lĕ hăn lăp tâm nău rêh. Rnôk ƀon lan lĕ gĭt vât, ƀon lan lĕ knơm n’hanh ƀư tĭng, nkô̆ mpŏng kan bâh Nghị quyết lĕ jêng nău kan khlăy ngăn, ntrôl an hun hao pah kan nâp nâl lơn.