Ôi nar 15/4, lôch rnôk wơt gưl Ngih dak ta Đại lễ đường nhân dân, Thủ đô Bắc Kinh, Trung Quốc tĭng nău way dŭt têh an kruanh mât bôk neh dak, Tổng Bí thư Ban Chấp hành Trung ương Đảng Cộng sản Việt Nam, Kruanh dak Cộng hòa xã hội chủ nghĩa Việt Nam Tô Lâm hŏ tâm nchră đah Tổng Bí thư Ban Chấp hành Trung ương Đảng Cộng sản Trung Quốc, Kruanh dak Cộng hòa nhân dân Trung Hoa Tập Cận Bình.

 Bar hê Tổng Bí thư, Kruanh dak ndrel mpơl nău rhơn bah năp ăp njuat hun hao uĕh lăng bah tâm boh bar Đảng, bar dak tâm bah ri aơ nơh, ntoh lư lah tâm ôp gưl têh ƀư dêh bên, ăp trong tâm boh nar lơn ma lam lĕ rngôch, âk mpưm, nsing nơm; tâm boh rnă njrăng- njrăng n’gang neh dak rgâl bah tâm nđŭr jêng tâm boh ngăn ngăn lơn; tâm boh wăng sa – tăch rgâl, ntuh kơl, buăt nthoi ntung trong geh âk đăt ndal; tâm boh tâm n’gor, tâm nđŭr ƀon lan khuh n’gôr; kan nsum âk ding nar lơn ma lhăt jăp. Bar kruanh rđău kan lah rjăp, tâm rnôk duh jêr bah nô nău lam ntŭr neh, bar Đảng, bar dak ân tâm rnglăp lhăt, n’hao dăng nsing nơm têh jong, buăt nthoi trong kơl, tăch rgâl, ndơ dŏng ntung trong, ŭnh nar, ƀư jru hvi lơn tay, n’hao têh lơn tay tâm boh Việt Nam - Trung Quốc tâm rơh mhe, rgop ngăn ngăn an bah tâm lơh tâm su, tâm boh n’hanh hun hao bah nkual n’hanh lam ntŭr neh.

Mpeh trong rƀŏng hun hao tâm boh bar Đảng, bar dak tâm let năp tay, bar kruanh rđău kan lah rjăp mbra rđău đă tay ăp gưl, ăp n’gâng kan grêt dăch rnoh tât nkrum lam “06 rlău”, mât mbro trong tâm nđŭr gưl têh, ntik n’hao nău khlay kan bah trong kan Đảng, n’hao dăng tâm boh ngăn ngăn ta ăp trong kan, rdâk nâp tay jâng nsing rêh jêng an tâm boh bar ding, kan nsum lhăt ta ăp trong tâm boh âk ding, mât kân n’hanh nkre uĕh lơn nău hôm nchiăng khan, mô hŏ tâm ban nău.

Ta tâm nchră, bar Kruanh rđău kan mbơh ngăn ntơm rdâk “Năm tâm boh pâl nđaih Việt Nam - Trung Quốc 2026 - 2027”, tâm ban ŭch ntrôl dăng ăp nău kan tâm boh, nkơnh n’hơ ntrŭt ntrôl ngăch pâl nđaih, tâm boh n’hao têh uĕh ndơ dŏng ntung trong, rhŏ dŏng pâl nđaih, rdâk nâp tay n’hanh mât gơ̆ ntŭk gŭ kan lah ntŭk năch hăn pâl nđaih dŭt têh nsum.