Ntơm dŭt khay 3/2026 tât rnôk aơ, bri duh nar jŏ jong hŏ ƀư 757 ha ba yan vai tâm ăp lŏ tâm mpeh dŭt ba dâng tâm ăp xã Hoà Thịnh, Hoà Mỹ, Tây Hoà ndrel Phú Hoà 2 dôl mô tŏng dak. Năm e, mih lơh khuch trong n’hoch dak ri ma nar njur ntil ba yan vai 2025-2026 la rlau du khay rđil ma ăp năm, ƀư rnôk bŭn ndrel luh tŭp tâm yan prăng bri.

 Gay kơl an ba, mro tâm 10 nar ma aơ, Công ty TNHH du ntŭk kan n’hoch dak Đồng cam hŏ ntơm ndâk 7 ntŭk pom dak. Ndrel ma ăp trạm bom tơm, trong pom dak kŏ geh dŏng ƀư. Tơm dak tŏ tâm ăp dak me geh rgum âk ngăn máy pom dak tâm ăp trong n’hoch nkah. Wa Nguyễn Văn Nhành, Groi Giám đốc Công ty TNHH du ntŭk kan n’hoch dak Đồng Cam, mbơh:

 ‘Đah ma rnoh neh mô tŏng dak rlau 700 ha tâm ntrong n’hoch dak mpeh ba dâng ri ntrong kan lah pom ân năn mô dơi ƀư khuch ngăn tât nau geh dơi âk. Tĭng nau nchrăp mbơh ntơm rnôk aơ tât lôch khay 4 ri bri duh nar hô ri ma âm pơh aơ ndrel pơh ba kơi lah rnôk khuch ngăn, ri công ty hôm pom dak mro, rnôk ma tơm ba hŏ bŭn, luh ri công ty mơ mra huch nau pom dak”.

Gay nau kan pă dak tŏ ân geh săk tam, ăp rmôt tŏ dak geh kâp njrăng tâm măng nar, du ding ăp ntŭk pom dak rdâng prăng bri, du ding rdâng ma rmôt tŏ dak êng bah ăp ntŭk ƀư tâm boh nsum nau kan tuch tăm gay ma ntrŭnh nau pă dak ân tâm di đah nau kan ntơm bah ngai tât dăch, huch ngăn nau ma ƀon lan rvê n’hoch dak mô geh tâm ban tŏ. Wa Đặng Quốc Hoàn, rmôt tŏ dak tâm nkuăl Hoà Đồng, Hoà Mỹ mbơh:

‘Rdâng prăng bri ri nŭih ƀư nau kan kâp njrăng ƀư tâm măng nar gay ma máy nar măng leo n’hoch dak tŏ tât ăp lŏ prêh, ngai ndrel ăp lŏ dôl suăt dak”.

Nau tât khuch bah prăng bri kŏ dôl âk ngăn đah mpeh ba lơ yôk prêh bah n’gor Dak Lak, rnôk ma âk nglau dak dôl ma suăt. Bơi tât du khay ma aơ, tâm 5 nar ri ăp rnăk tâm thôn Hoà Sơn, xã Sơn Hoà hăn tâm lŏ tŏ pom dak, dak tă bah ntu khoan gay ma kơl an ba.

Tĭng kônh wa, dak nglau mô hôm, knŭng geh ntrong khoan ntu dak gay ma pom dak mơ dơi kơl rêh ma, bol ma rnoh khuch khat âk ngăn đŏng:

‘Pom dak du tŏ mhe nơh, jêh ri rnôk aơ đŏng lah rơh tal bar, lah mô geh năn tŏ di grăp ba păng mô geh săk ôh”.

Bah năp nau tât bah bri duh nar hô kơt rnôk aơ, N’gâng kan tuch tăm ndrel ntŭk ntu n’gor Dak Lak hŏ đă ăp ntŭk kan, rmôt kan mêt uănh, nchră mbơh nau kan ân tâm di tơm dak tŏ geh dŏng rnôk aơ tâm trong n’hoch dak kŏ kơt lah nau ntrŭnh ndâk nau kan, nau nchrăp dŏng tơm dak tŏ ân geh săk tam, tâm di, đăp mpăn đah nau ŭch dŏng dak bah ăp nkuăl, ăp ntŭk, ngăn lah ăp nkuăl geh nkah njrăng nau tât khuch bah prăng bri, mô tŏng dak, nkre lah geh nau kan tuch tăm ân tâm di, n’huch nau khuch yor bri duh nar lơn jêng./.