Nklang nar duh n’heng bah n’har bri n’gor Quảng Ngãi, công nhân ta ăp ntŭk ƀư nhih nti phổ thông nội trú rep gưl dôl ndăn ngăch pah kan. Đah nuĭh ƀon lan ta aơ, nê mô dơn lah trong nchrăp ƀư ntŭk ntĭm nti, ma hôm lah nău mpŏng mpeh du ntŭk kơt nti uĕh lơn an oh kon. Lĕ dĭng nuĭh mpŏng nhih nti ơm ƀư lôch jêh n’glăp dŏng da dê.

Ta 5 xã n’har bri lah: Bờ Y, Ia Tơi, Ia Đal, Đăk Long n’hanh Đăk Plô, n’gor Quảng Ngãi, ăp ntŭk nchrăp ƀư nhih nti phổ thông nội trú rep gưl Tiểu học - Trung học cơ sở du rơh ntơm rdâk ƀư bah khay 3/2026. Aơ mô dơn lah njuat hăn tâm ntuh kơl ntŭk ntô ntĭm nti, ma hôm rgop jêng hun hao jŏ jong an nkual neh n’har bri, nkual rnoi mpôl đê̆ mpeh nhâp nar Quảng Ngãi.

Ta xã Bờ Y, du nhih nti têh hvi, ăp tŏng ndơ dŏng lah nău wơl geh bah nai ntĭm n’hanh kon se nti âk năm aơ. Nai ntĭm Võ Thị Tuyên, nhih nti Tiểu học n’hanh Trung học cơ sở Đắk Xú, xã Bờ Y mpŏng trong nchrăp kan dơi an ƀư di rnoh ngăch:

“Aƀaơ dơi Đảng n’hanh Ngih dak mât uănh khlay rdâk njêng an nhih nti nội trú rep gưl, nklăp mbra geh du nhih nti têh hvi n’hanh uĕh reh. Ntơm bah nê njêng trong dơh gay nai ntĭm n’hanh kon se nti bah nhih nti tĭng ƀư jăp nău kan kơt nti bah he. ăp mon kon se nti mbra geh ntŭk kơt nti ta du nhih nti têh uĕh mhe đŏng”.

Aƀaơ n’gor Quảng Ngãi dôl rdâk njêng 9 nhih nti nội trú rep gưl ta ăp xã n’har bri. Ăp ntŭk nchrăp ƀư aƀaơ hŏ ăp kôp, geh nău kan nsum lhăt đah n’gâng kan ta ntŭk n’hanh nuĭh ƀon lan.

Ta xã n’har bri Dục Nông, nău sơch ntŭk ƀư nhih nti dơi mbơh kloh, geh nău tât râng bah nuĭh ƀon lan. Nkual neh ta thôn Ngọc Hiệp đah rnoh hvi nklăp 4,2 héc ta dơi sơch ntŭk rdâk njêng nhih nti. Wa Trần Cao Bảo Việt, Kruanh UBND xã Dục Nông, n’gor Quảng Ngãi, an gĭt, n’gâng kan ta ntŭk hŏ lor rdâk njêng trong dăp rgum, dŏng nhih nti jrô nti:

“Tâm rnôk rdâk njêng nhih nti rep gưl ri mpôl hên dơi tâm ban ŭch âk bah ăp nuĭh ƀon lan, lơn lah ăp nuĭh ƀon lan gŭ wăr thôn Ngọc Hiệp, thôn Dục Nhầy 3, ri nău an ƀư tât aƀaơ đăp mpăn rnoh ngăch”.

Ta ntŭk ƀư Nhih nti phổ thông nội trú rep gưl Tiểu học – Trung học cơ sở Dục Nông, hang rhiăn công nhân ndrel âk ndeh rklư nchuăt ƀư mbro. Thượng tá Vũ Thanh Khương, (Tổng Công ty 319 Bộ Quốc phòng), Kruanh Ban mât uănh ntŭk nchrăp ƀư lah rjăp, ntŭk kan đăp mpăn rnoh ngăch ƀư lôch jêh nhih nti tâm khay 7 tât:

“Ntrŏng aơ lah nău dơn kan chính trị geh nkô̆ hôr dŭt khlay mha êng, mpôl hên hŏ rgum lĕ tơm nuĭh kan, ndơ dŏng n’hanh đăp mpăn rnoh ngăch ƀư. Kơp tât rnôk dja, ntŭk tơm ƀư hŏ an ƀư 13/13 ndơ ntrŭp n’hanh ta ntŭk dja ri bơi 200 công nhân tâm ban kơt 10 bôk máy, ndơ ntrŭp dŏng an ƀư du rơh tâm pleh kan, n’hao âk mpôl kan gay ndăn trôk nar dŭt dơh đŏng, ntrôl ngăch ƀư, đăp mpăn ntŭk ƀư tât di rnoh ngăch”.

Tĭng Ban Mât ŭanh trong nchrăp ntuh kơl rdâk njêng ăp ntung trong, ndơ dŏng an ƀon lan n’hanh công nghiệp n’gor Quảng Ngãi, ăp trong nchrăp rdâk njêng nhih nti rep gưl ta Dục Nông, Sa Loong, Rờ Kơi n’hanh Mô Rai dôl dơi an ƀư du rơh. Tâm nê, ntŭk nchrăp ƀư ta xã Rờ Kơi geh nklăp 43%, Dục Nông n’hanh Sa Loong geh nklăp 40%, hôm Mô Rai geh nklăp 22% rnoh âk kan.

Ndrel đah 4 trong nchrăp dôl ƀư, 5 ntŭk nchrăp ƀư ta ăp xã Bờ Y, Ia Đal, Ia Tơi, Đăk Long n’hanh Đăk Plô hŏ dơi rdâk ƀư đŏng, dôl ƀư lôch jêh siƀŭt gay an ƀư ăp kôp. Wa Y Ngọc, Groi kruanh Rnâng kan UBND n’gor Quảng Ngãi đă ăp n’gâng kan, ăp ntŭk nchrăp ăp ndơ gay ntik n’hao nău dơi tam ăp nhih nti nội trú rep gưl rnôk ƀư lôch jêh:

“Tât năm nti 2026 - 2027, dŭt jêh rơh bôk năp, 4 nhih nti n’glăp dŏng ri rmôt cán bộ mât bôk kan, nai ntĭm ân đăp mpăn gay he an ƀư ntĭm nti ntơm bah bôk năm. Nuĭh tơm ntuh kơl an tĭng ƀư tay, nchrăp rmôt cán bộ mât bôk kan n’hanh nai ntĭm an lvang năm nti 2027 - 2028 rnôk 5 nhih nti hôm ƀa ƀă lăp dŏng. Gâp dăn đă Sở Giáo dục n’hanh Đào tạo n’gor Quảng Ngãi uănh khlay an ƀư ntơm bah aƀaơ gay he đăp mpăn tŏng dơi an nău ŭch geh dơn kan tâm let năp tay”.

Ăp nhih nti nội trú rep gưl dôl mbrơi jêng ntŭk n’har bri n’gor Quảng Ngãi mô dơn lah ntŭk ntĭm nti, ma hôm lah ntŭk ndơ ƀư bah nău nsing nơm. Nuĭh ƀon lan nkual n’har bri n’gor Quảng Ngãi kâp nar ƀư lôch jêh, gay oh kon he dơi kơt nti tâm ntŭk uĕh blău lơn./.