Bah năp ndring ngih, Bu ranh-nghệ nhân Rơ Châm Nha dôl ma jut kloh ân đơn gong kơt lah mât du nau nkah ơm, nglau ty păng nkreh tâm sre đơn, jêng geh ăp nau nteh ueh m’ak ngăn. Măt păng uănh bah ngai, uănh tĭng nau nkreh nteh, kơt lah dôl ma nkoch tay nau geh dơi bah ƀon lan ndrel săk păng nơm rnôk hôm ndăm.

Nê lah năm 20 năm, rnôk ma păng râng nau kan du kích tâm n’gor jêh ri râng hăn druh ndăm xung phong, ƀư nau kan nchuăn leo ndơ sa ân tahen lơh Mỹ. Năm 1968, păng gŭ ur ndrel lŏ tĭng ƀư du kích tâm n’gor. Tâm ăp năm khay tâm lơh, bol ma moh nau jêr yơn wa Rơ Châm Nha hôm du nuih n’hâm tĭng Đảng, tĭng Wa Hồ, rgop n’hâm ân nau kan rklaih miền Nam-đăp mpăn neh dak:

‘Ăp năm 1961-1962, gâp lah bu ndăm tâm ƀon. Tât năm 1963 gâp geh lăp Đoàn ndrel tât năm 1965 gâp geh jao ƀư Kruanh rmôt du kích. Dĭng nar ri ƀư nau kan druh ndăm tâm ƀon nâm ơm, tât măng, leo tahen hăn lơh tâm ăp ntŭk gŭ bah phung rlăng, cán bộ ndrel tahen rnôk mô geh nŭih leo trong ri jêr ngăn hăn. Yor gâp lah nŭih tâm ƀon, gĭt kloh nau ƀư bah phung rlăng ndrel ntŭk gŭ bah phung rlăng tâm moh ntŭk, moh yok ri ma leo tahen hăn lơh ntŭk phung rlăng geh dơi lĕ”

Nkah tât lơ 30/4/1975, nar nkah rklaih miền Nam 30/4/1975- măt bu ranh ƀon, nghệ nhân Rơ Châm Nha kơt lah rhơn êng ngăn, păng gơm rum. Păng nkah ma sau păng Rơ Châm Tứ sâm nkreh đơn Tơ-rưng ân ma păng nơm krih đơn gong nsum, nau nkeh rhơn neh dak rklaih đăp mpăn:

‘Nau rhơn ntô̆ n’hao ngăn rnôk ma neh dak nơm geh rkaih. Jêh rnôk nơm lơh lĕ phung rlăng, neh dak geh rklaih, ăp nŭih ntơm bah bu ranh, kon se, druh ndăm kŏ dŭt n’hâm rhơn ngăn kơt lah geh doh rse chăp săk, rhơn ndrel ma ƀon lan. Kơt tĭng nau kan ƀư tĭng nau kuăl jă ndâk ăp rmôt druh ndăm nkoch trêng nau, du rmôt ƀư njroh mprơ, tur chĭng gay ma bonh đă nau kan, du rmôt ƀư kan văng sa, ndâk nâp tay neh dak ƀon lan. Rhơn ngăn ndrel dŭt n’hâm ŭch yor lah geh dah rŏng, ueh lăng, tur chĭng, njroh mprơ dah ŭch ngăn”.

Đah bu ranh-nghệ nhân Rơ Châm Nha, geh nkrih đơn, tur chĭng tâm rnôk nkah 51 năm nar rklaih miền Nam, đăp mpăn neh dak lah nau nkah ueh ngăn, ntŭk ma nau goh nteh geh nsum ma nau ntô̆ n’hao ƀon tơm neh dak rgâl mhe./.