Tĭng nău mĭn way ơm bah nuĭh Rđe, lôch tâm rnăk wâl mô lah ƀon lan geh nuĭh roh, lơn lah tă bah kop ji, mbra hôm geh nău kĭr ar ân dơi ntru lĕ gay nău rêh plơ̆ tay kơt ơm. Yor kơt nê̆, lôch rnôk tâp bôr, rnăk wâl, rnoi deh keh na n’hanh ăp nuĭh râng khĭt way ƀư ŭm bôk pih ndơ, ŭm rao kloh săk jăn n’hanh kho ao ta ndrâm dak mô lah ta n’hong dak me ƀon lan. Che Aê Zôn, ta buôn Wiâo A, xã Krông Năng, an gĭt nău way dja hŏ geh bah jŏ ơm tâm nău rêh nuih n’hâm bah nuĭh Rđe.

“Bu kuăl nê lah nău lah rtuh rao kloh uĕh lĕ săk jăn, hăn pih ndơ rtuh mbân ao ta ndrâm dak mô lah dak me gay dak hoch rdu lĕ nău mhĭk djơh kĭr ar, kop ji krêp tâm mbân ao; ân pih ndơ ndău, rtuh lĕ n’hâm krêp djơh tâm săk nuĭh an kloh uĕh, mô an geh ăp nău mhĭk djơh krêp tay tâm săk”.

Mô dơn lôch râng khĭt, ma lôch hăn ntlơi môch, nuĭh Rđe ƀư ŭm bôk rtuh rao săk jăn kloh uĕh đŏng. Lôch ƀư ôp răch ntlơi nuĭh hŏ roh, lĕ ma ƀon jŭr ŭm bôk, pih ndơ, gĭr tui ka, tôch biăp gay aih bah nuih n’hâm rngot klân n’hanh dăn an n’hâm suan ngăch dăng lăng uĕh an nuĭh hôm gŭ rêh bah kơi. Ama Roma, nuĭh nsing nơm ta buôn Wiâo B nkoch:

“Kăl e nơh lah ƀư kơt nê ngăn, bu ƀư rtuh lĕ nău kĭr ar, chiak kla mƀui tĭng lôch ƀư ntlơi môch blang, n’hanh tâp bôr nuĭh hŏ khĭt, tâm rnăk wâl, rnoi deh keh na ndrel jŭr dak me, ŭm bôk, pih ndơ. Tâm khay wai ri bu nkre ƀư hăn ŭm bôk pưih nhưih ta dak me nkre pih ndơ n’hanh joi ka, ncho rveh rkhul dak gay gĭr ka n’hanh tôch biăp bri gay gâm sa ta bri, gay rtuh lĕ nău mhĭk djơh chiak kla mƀui tĭng n’hanh chuêl nău rngot klâng tâm rnăk wâl. Ntơm nơh, lôch nkra lĕ ƀhiău nău khĭt yot du nar ri hăn dak me pih ndơ ŭm ntu lơh joi ka dĭl, aƀaơ ri uănh tĭng nău geh dơh mơ ƀư”.

Aƀaơ, tă bah nău rêh rgâl, nău way rtuh mhĭk djơh mô hôm dơi ƀư têh kơt ntơm nơh. Bol ma kơt nê, âk rnăk ta Krông Năng, n’gor Dak Lak nha hôm ƀư nău dja kơt du trong rthi aih nuih n’hâm lôch roh yot đŏng. Wa Ama Bi, nuĭh tâm Mpôl ntơh măt nuĭh âk năm deh xã Krông Năng an gĭt:

“Lĕ rngôch tâp ăp ntil nkô̆ nău khĭt, rnăk wâl n’hanh rnoi deh keh na lôch tâp bôr, lôch jêh ƀhiău ta môch blang, nar ôi tay bu leo hăn tât bah meng dak me hoch đah ŭch rŏng: Ngoăy lah mpŏng an ăp nuĭh geh n’hâm suan ngăch dăng, ntru der ăp nău mhĭk ndjơh tâm rnăk wâl. Bar lah ŭm ntu, rtuh lĕ djơh djơt krêp tâm săk jăn, ƀư kloh kho ao, săk jăn bah lĕ rngôch ăp nuĭh tâm rnăk wâl. Pe lah hăn gay chuêl lĕ ăp ntil nău rngot klâng, jâk r’ah ăp nar rlău aơ. Jêng ân ƀư rtuh lĕ nău mhĭk djơh ta dak me, nkre pâl rlưn, nkre joi biăp, nhŭp ka ngêt sa ta bri. Ntơm nơh, ƀon lan geh rveh, bu ncho lĕ ma rveh rkhul dak gay ăp nuĭh lơh joi ka, ri lĕ ma ƀon hăn dĭl. Hôm aƀaơ, yor kol âk đah nău kan, ndơ geh hŏ êng đah kăl e jêng ƀư tâm rnăk wâl nơm, băl mpôl dăch dơm, mô rkhoak lĕ ma ƀon đŏng ôh”.

Nău way hăn rtuh lĕ mhĭk djơh bah nuĭh Rđe ta Krông Năng, n’gor Dak Lak mô dơn ƀư kloh săk jăn lôch khĭt yot ma hôm geh nkô̆ hôr rŏng kon nuĭh đŏng. Aơ lah trong gay ăp nuĭh rthi aih nău rngot klâng roh yot nuĭh tâm rnăk wâl, ntlơi bah nău n’glâng nkah, tâm rthi nsum rêh ngăch dăng tay, rêh rhơn mƀak n’hanh krêp dêh nsum mpôl lam ƀon lan.